النائب اللي يحب البلد بإخلاص .... يضرب المتظاهرين بالرصاص !!! أحمد السعيد

وفي إحدى البلاد السنيّة ، وتحت قبة برلمانها السماوية ، الذي يتكون أعضائه من خمسين بالمائة من الزارعي أرضهم لسنين قمحا والطالعة بعد ثواني كوسة وقرعات عسلية ، والخمسين بالمائة الأخرى أرزقية على فيض الكريم والباقي صنايعية ، تقدم النائب الهمام الأسطى / وطني ابن الحاجة وطنية ، بمشروع قانون لحماية البلد من الخارجين على القانون من المتظاهرين والمطالبين بالإصلاح ونحوه من الكلام الفارغ من السفهاء والبلطجية ، وقد كتبت مواده وصيغت صياغة ألمعية ، حتى تنجو من سهام النقد لكل ذي عين ردية ، من الذين لم يصلوا على النبي في قلبهم ويقعدون للساقطة واللاقطة بغير صفاء نية , سواء من النواب الزراعيين أو النواب الصنايعية ، وقد افتتح الحاج / فتّوح المفتّح جلسة البرلمان الصباحية ، بعد أن وُزع القانون على النواب حسب الأصول المرعية ، وقد جاءت مناقشاتهم بعد حذف " الذي منه " من المضبطة كالتالي يا عنيّه :
فتوح المفتح مخاطبا النواب : " أظن ما فيش أحسن من كده قانون متوازن وآخر حلاوة وربنا يكرم بالصلاة على النبي ونقول موافقون يا جماعة ونلطع الموافقة الكريمة وننتقل لجدول الأعمال ؟ !! "
النائب المحترم الحاج أبو كرم : " لا لا لا موافقون إيه وبتاع إيه يابا الحاج فتوح ده كلام ده ؟!! ، إحنا لسه قولنا حاجه يا راجل ، أني عندي اعتراض جامد قوي ولابد من كل بد تتم مناقشته ويترد عليه امال احنا قاعدين هفق في البتاع ده ولا ايه ؟ ، طب ايه رأيك بقى اني عندي اعتراض على مادة واحد منه واعتراض مهم كمان "
فتوح المفتح غاضبا : " يا فتاح يا عليم يا رزاق يا كريم احنا لسه اصطبحنا يا بو كرم ، اعتراض على مادة واحد يا راجل انت ايه اول القصيدة عندك كفر !! قول يا حبيبي ايه اعتراضك الجامد ده ؟ اشجينا يا سيدي قسم وسمعنا "
النائب المحترم الحاج أبو كرم : " بغض النظر عن ترقيتك عليا يابا الحاج فتوح ، الا ان احنا في صرح من صروح الديمقراطية ، يعني القلب الابيض وصفاء النية ، والواحد برضه لازم يقول الصح ورزقه على الله لا مؤاخذه ياباشا ، أني اعتراضي على مادة واحد اللي ورد فيها إن أي نايب يشوف الجماعة البلطجية المتظاهرين بتوع حركة " 6 أبريق " أو حركة " عشايا عليك يا رب " أو غيرها من الحركات اللي كلها خونة وعملا وبيقبضوا من برة والعياذ بالله وهما متجمعين بغرض التظاهر وقلة الأدب يضربهم بالرصاص الحي علطول والأجر والثواب عند الله ، وأني زي ما فهمني واد ساقط رابعة حقوق من بلدنا إن دا يبقى فيه افتئات على عموم الشعب الوطني الأصيل اللي احنا هنا نواب عنه وبنمثله لأن القانون ذكر نواب الشعب ولم يذكر الشعب الذي هو صاحب الاختصاص والحق الأصيل في هذا ، لذا اقترح تغيير كلمة نائب وذكر أي فرد وطني أصيل بدلا عنها ، ها ينط لي واحد من الجماعة المعذورة اللي قارفينا الدورة دي في المجلس ويقول لي ازاي يا فالح والقانون يحظر على اي فرد من ابناء الشعب حمل السلاح إلا بترخيص ؟! نرد نقول بأن اللي المرخص يضرب واللي مش مرخص أهي برضك قوات الأمن بتاعتنا كدا كدا بتبقى واقفة ومعاها أسلحتها ومحاوطين المظاهرة ، أهو يبقى يستلف منهم سلاح يضرب بيه البلطجية دول ويبقى يرجعوا تاني " .
فتوح المفتح : " الله عليك يا بو كرم يا محترم درر يا حبيبي والله لا وكلك وطنية ياسلام ... اللي موافق على الكلام ده يا جماعة يرفع إيده ... موافقة ، وتحذف كلمة قارفينا والمعذورة من المضبطة حد عنده حاجة تاني ؟ !! ".
النائب الحزبجي عبد الحليم البوهيجي محتدا : " ايه يا حاج فتوح انتو عشان اغلبية يعني ولا ايه ؟!! انا اعترض على هذا القانون قلبا وقالبا حركة " 6 أبريق " و "عشايا عليك يا رب " حركات وطنية واللي فيها مواطنين من البلد دي برضه وكونهم مختلفين عننا في افكارهم فلأن ليهم مطالب وحقوق شايفين إنها بتضيع ومش عارفين يطولوها فبيتظاهروا عشان الاغلبية تحس بيهم نقوم نعمل قانون يبيح للنواب ضربهم بالنار والأنكت نوافق دلوقتي على تعديل يبيح لأي حد مش متفق معاهم في الفكر يضربهم بالنار أيضا ، يا نهار اسود !! ودي تبقى بلد يا جدعان امال شريعة الغاب تبقى ايه انا اعترض واعترض بشدة كمان " .
فتوح المفتح : " ايه يا حاج عبد حليم غاب إيه وهباب إيه ... هوا خلافك مع معلمك الكبير بظاظة لحس نافوخك ولا ايه ؟ ".
عبد الحليم مقاطعا في فورة غضب عارم " معلمي مين البتاع ده أنا أصلا عمري ما اعترفت ولا هاعترف بيه ، غيرشي بس هيا ارزاق وجات له على الطبطاب أشوف فيك يوم يا بظاظه ... آه يا بظاظة حسبي الله ونعم الوكيل " مرتميا على الأرض في نوبة صرع مفاجئ وهو يصرخ مكررا اسم بظاظة ، مما اضطر المجلس لايقاف الجلسة خمس دقائق لاسعافه ونقله إلى المستشفى .
فتوح المفتح : " سجل اعتراض عب حليم عندك ونبقى نناقشه لو فيه فرصة لما ربنا يتم شفائه على خير وتحذف جميع الشتائم لحبيبنا الحاج بظاظة وربنا يهدي المفروض ان الخلاف في الراي لا يفسد للود قضية ... ما علينا حد عنده حاجه تاني ؟ !! "
النائب الحاج " الكسباني ومن الحكومة آه ياني " رافعا يده ومستلما دفة الحوار : " منكم يا نواب الحكومة آه ياني ، أنا بأرى وبعض إخواني يا ريس إن القانون ده غير وطني بالمرة لأن التظاهر حق كفله الدستور ذات نفسه فلازمته إيه نطلع قانون يسقط صريعا لعدم الدستورية بعد تطبيقه وبعدين ها نعرف ازاي مطالب الناس من غير ما نسمع صوتهم ولا هيا قوانين والسلام ؟!! " .
النائب الأمني " رجب حوش صاحبك عني " رافعا يده ومبادرا بالرد " لا لا .. اسمح لي يا ريس أرد بالنيابة عن المجلس الموقر ... هوا يعني عشان ربنا كرمكم انت وكتلتك ودخلتوا الدورة دي ها تنظروا وتنطوا في كل حاجة .... دا وطن مش لعبة مش يجوا شوية عيال ايموز وعبدة شيطان يضيعوه بأجندات وأموال أجنبية دي عناصر هدامة والعضو اللي يضرب فيه العفن لابد من بتره ".
فتوح المفتح : " جائني طلب موقع من ربعمائة عضو باقرار القانون بالتعديل الأخير لأبو كرم وقفل باب المناقشة في هذا الموضوع الموافق على ذلك يرفع يده ... موافقة ، يقر القانون ويبصم بخاتم الدولة ويصدر كقانون من قوانينها ويعمل به بعد خمس دقائق من نشره بجريدة الوقائع الوطنية " والله الموفق .
صحفي
ahmadelsaeedmahmoud@gmail.com