مفاجآت حول الضغوط "السياسية" لوقف "جت في السوستة"

كشف الكاتب الصحفي محمد الجارحي مفاجآت كبيرة حول جروب "جت في السوستة" ، مؤكدًا وجود محاولات ل"تفخيخه" من الداخل حسب تعبيره .
وقال "الجارحي" في تدوينة عبر حسابه ب"فيس بوك" تحت عنوان : "10 ملاحظات عن جروب جت في السوستة وسياسة التفخيخ من الداخل" : "1- جروب جت في السوستة للي ما يعرفهوش، هو جروب بدأ في مايو اللي فات، بيناقش فيه الشباب والرجالة من كل الأعمار والأطياف مشاكلهم وهمومهم، البوستات المنشورة فيه إما عن مشاكل في الحياة أو حاجات شخصية الناس بتتكسف تقولها على صفحتها أو قضية اجتماعية، بيقدموا مثلا نصايح لعريس جديد أو شاب بيدور على عروسة أو حد مزنوق في معلومات حولين موضوع معين، مفيش خطوط حمراء في النقاش.. الكل بيتفاعل وبيناقش ويقترح وينصح لكن هو مش جروب كله حاجات قبيحة زي ما بعض الناس واخدة فكرة عنه" .. مضيفًَا: " 2- يعني فيهم شباب دمه خفيف، وناس عندها طموح، وناس محبطة، وناس عاوزة تتعلم وشباب بيدور على فرصة عمل أو بيسوقوا منتجاتهم أو بيعرضوا خدماتهم أو مواهبهم على السوستجية.. اه ده التعبير الدارج بينهم.. خلوها صفة ليهم.. كإن الجروب بقى بيتهم وعيلتهم ومكانهم زي العرايشية أو كإنه مهنتهم وشغلتهم أو حاجة بتجمعهم زي البوسطجية كده".
وأضاف: "3- الجروب بعيد تماما عن السياسة لكن حصل التطور المهم، وبقى الجروب يعلن عن كفالة حالات ودعمها ورعايتها، حالات إنسانية، بيساعدوا ناس مريضة لكن مرضى النفوس كان ليهم رأي آخر لإن الجروب اللي بدأ في الفضاء الإلكتروني بدأ يخدم ناس على أرض الواقع.. لو حد مزنوق أو عنده مشكلة الكل بيحاول يساعد لو قادر" .. مضيفًا: "4 - الجروب تجاوز أعضاؤه مليون و400 ألف عضو! هنا بقى لب المشكلة.. هنا مكمن الحكاية.. الجروب ده بقى خطر .. لازم يتصفى.. يتضرب.. يباد.. وبدأت الخطة المعتادة المكررة منذ قديم الأزل.. التفخيخ من الداخل" .. مستدركًا: "5- نعم زي ما حصل مع أحزاب وحركات وجماعات في السياسة، نفس الدماغ، نفس الأفكار، نفس الطريقة، نفس النتيجة، ومحدش بيتعلم من الدرس.. فخخهم من الداخل واعمل منهم جبهات.. جبهة نحطها في السجن وجبهة ناخدها بالحضن" حسب تعبيره.
وأردف: " 6- دخل مجموعة من الشباب، عرضوا الانضمام كمشرفين في الجروب وبعدين خرجوا كمنشقين.. وأسسوا جروب تاني.. وبقى عنوان الفيلم الجاي.. ماليش في السوستة ضد جت في السوستة.. ما أتوقعه الأيام المقبلة هو استضافة المنشقين لرجم الجروب الأصلي وضربه وتشويه المسئولين عنه" .. متابعًا: "7 - انتظروا بقى حاجات زي امسك دول إخوان.. امسك دول ضد الدولة.. دول عليهم شبهات وعليهم علامات استفهام .. وما تنساش تزود الموضوع بتحبيشات زي دول حرامية.. دول بيستفيدوا من فلوس المساعدات وهكذا" .. مضيفًا: "8 - كل ده ليه؟؟ علشان الناس صدقتهم .. علشان الناس اتجمعت في مكان.. مكان مفيهوش سياسة.. لا يزال بعبع صفحة كلنا خالد سعيد يسيطر على أدمغة الجميع".
وتابع: " 9- الرعب الحقيقي من جروب جت في السوستة إنه في يوم من الأيام ممكن ( واخدلي بالك) ممكن يكون أداة أو وسيلة أو بديل أو نافذة للحشد لتجميع الناس .. هي وصلت للدرجادي خايفين من جروب .. خايفين من ناس بتنفس عن نفسها؟ بيتكلموا في مشاكلهم؟" .. مضيفًا": 10- طب إنت قفلت المناخ العام كله.. لا سياسة ولا صحافة ولا قنوات ولا مواقع ولا شارع ولا أحزاب ولا أي حاجة خالص.. تتوقع إيه اللي هيحصل لما جروبات زي جت في السوستة تركز معاها كده؟؟ المرحلة الجاية هتقفل جروبات الطبخ وجروبات مدارس العيال وموقع فتكات ما ده اللي ناقص" حسب تعبيرخ.
واستدرك : "ملحوظة : كتبت البوست ده بعد ما شفت فيديو لمؤسس الجروب.. بيقول إنه هيقفل الجروب.. لإن التشويه والضغوط عليه تجاوزت الحدود.. حرب قذرة.. بلا هوادة.. راحوا علشان يستنطقوا ويخلوا ست ساعدوا بنتها إنها تشكك فيهم.. هي ضريبة.. لكن القذارة ما توصلش لكده .. عيب.. انضفوا بقى.. الناس هتطق من الخنقة.. الناس لو فرقعت الفرقعة هتفرقع في وشكم .. مش هتستحملوا" .. مضيفًا: "نصيحة أخيرة للقائمين على الجروب : خلوا بالكم وتجنبوا الظهور الإعلامي لإنه ممكن يكون فخ لتوريطكم.. وبلاش سذاجة بزيادة وكل حاجة تتحكي".