تعرف على مطلب الأول على الثانوية العامة من الرئيس

"كنت متوقع إني أنجح وممكن أكون من العشرة الأوائل، بس عمري ما توقعت أني أكون الأول علي الجمهورية حستها كبيرة بس الحمد لله".. كلمات قالها باسم محمد عبد المجلي إدريس، الأول مكرر علي الجمهورية، بمجموع 409.5 ونصف درجة.
وأضاف "محمد" ل"المصريون"، "إن شاء الله هدخل كلية طب عين شمس وهكمل علي نفس النمط بتفوق، ونظام البوكليت فعلا ساعدني كتير ووفر عليا وقت ومجهود في الامتحان".
وتابع أول الثانوية العامة: "كانت مواد الحفظ بالنسبة لي هي اللي بتسبب لي المشكلة وخاصة العربي، بس الحمد لله الفضل يرجع لأساتذتي ووالدي وأخوتي لمساندتهم المستمرة لي".
وأوضح أنه إذا التقي الرئيس في حفل تكريم أوائل الثانوية العام سيطلب منه الاهتمام بالصعيد؛ لأنه يوجد تقصير في كل أنواع الخدمات التي يتم تقديمها.
ووجه رسالة إلي طلبة الثانوية العامة القادمين، قائلا: "لكل مجتهد نصيب، مش تخافوا من ثالثة ثانوي هي صعبة بس لازم تذاكروا وربنا هيعوضكم عن تعبكم".
وأنهي كلمته قائلا: "الحمد لله علي كل اللي وصلتله وربنا يقدرني اشكره علي النعمة".
وقال والده بدموع الفرح: "الصعيد كلها فرحانة وفي ناس من أسوان بتتصل تبارك لنا، الحمد لله أن ربنا جبر بخاطرنا، البيت كله فرحان حتى أخواته البنات غابوا عن شغلهم علشان يحتفلوا بيه، مامته مش مصدقة نفسها من الفرحة".
وأضاف الوالد في تصريح ل"المصريون"، "مش كنا متوقعين ولا متصورين أنه يطلع الأول علي الجمهورية، بالرغم من أنه كان متفوق في الإعدادي وأولي وثانية ثانوي"، مضيفا "كنا مهيأين البيت علشانه وكان بيذاكر 16 ساعة في اليوم، وأحيانا كانت والدته تلاقيه نايم علي الكتاب، هو عمل اللي عليه وزيادة، وهو دايما غاية في الأدب والأخلاق".
ووجه رسالة إلي كل أب لديه ابن في الثانوية العامة، بأن يهتم به و يوفر له المكان الملائم للمذاكرة، وأن يبعده عن زملائه غير المستقيمين".
شاهد الصور..