كشف ناشط عبر الفيس بوك يدعى "أحمد محسن" تفاصيل مذهلة عن أزمة السكر ، مشيرًا إلى أن الأزمة الحقيقية بدأت عام 2012 واستمرت بسبب سوء التخطيط . وسرد "محسن" في التدوينة التي حصلت على ما يقرب من 10 آلاف إعجاب و10 آلاف مشاركة طريقة إنتاج السكر في مصر وبدء الأزمة بعد توقف مصر عن إنتاج السكر واتجاهها للاستيراد لأنه أرخص وحسب قوله. وإلى نص التدوينة: فيه شركة مصرية كبيرة حجم اعمالها 16.2 مليار جنيه اسمها ( الشركة القابضة للصناعات الغذائية ) اتأسست سنة 1983 واندرج تحتها عشرات الشركات القديمة والحديثة اهمهم على الاطلاق ( شركة السكر والصناعات التكاملية ) واللي تحتها برضه مصانع سكر ضخمة جدا اهمهم ( مصنع سكر الحوامدية ) .. واللي انتاجهم بيوصل لاكثر من 2.2 مليون طن سنويا .. الضحك انهم مادفعوش تجديد اشتراك سيرفر الموقع فاتوقف ومعروض للبيع ب 3 الاف دولار على موقع ( هوز للاستضافة ). الشركة دي اتأسست لوحدها سنة 1953 واتفتح معاها زراعة قصب السكر والبنجر في الصعيد لمساحات واسعة جدا من الاراضي .. وبالفعل الانتاجية فاقت التصورات .. وصدرت الشركة انتاجها من السكر لاكثر من 30 دولة منهم دول العالم الاول زي ( بريطانيا - فرنسا - استراليا - كندا - هولندا ..الخ ) الشركة دي طبعا حكومية ابا عن جد والسيادة الكاملة عليها من الدولة .. والمفروض ان غالب توزيعها بيكون على مواطنين الدولة .. لحد ما المواطنيين يتغرقوا سكر تموين .. فبعد كده يطلعوا السكر الفايض يتصدر .. لكن طبعا الكلام ده مبيحصلش والحكومة هي اللي ليها القرار تصدر قد ايه وتبقى قد ايه .. وكانت فيه فضيحة كبيرة في 2006 لتصدير كميات مهولة من السكر المصري لدولة كينيا ( معفية الجمارك ) بهدف تعطيش السوق المصري .. المفاجئة ساعتها ان كينيا اعدمت الشحنة بالكامل في البحر لسوء المواصفات . طيب ايه اللي حصل دلوقتي ؟ * زي ماقلنا فيه شوية بيروحوا للمواطن عن طريق بطاقة التموين اللي وصل عدد المنتفعين بها ل 70 مليون فرد منهم 20 مليون غير مستحقين حسب وزارة التموين .. يعني اكتر من 77 % من الشعب بيتدعم .. وفيه شوية سكر تانيين بيروحوا استيراد عشان يجيبوا عملة صعبة ودولارات .. بالضبط في اواخر 2012 ظهرت ازمة مكنتش موجودة قبل كده ابدا وهي ( اغراق السوق بالسكر المستورد ) !! المستورد ؟ .. اه الابيض الحلو ده ؟ .. اه الابيض الحلو ده. اللي حصل ان البرازيل اللي بتنتج 25 ٪ من اجمالي السكر في العالم .. العملة بتاعتها وقعت وطبعا الكل قال هات اللي عندك لا عملتك تغلى من جديد .. وكانت جمارك السكر ضعيفة اياميها في مصر لان محدش حط في باله ان هيحصل استيراد بصورة كبيرة .. خصوصا وان السكر المحلي اصلا موجود . نشرت جريدة الاهرام الاقتصادية تقرير مطول عن الازمة دي ساعتها وحذرت منها .. واكبر المحذرين كان الكيميائي / عبد الحميد سلامة رئيس شركة سكر الدلتا ومن اقدم العاملين في المجال ده .. وكرر الراجل تحذيره في 2015 ان ده هيعمل ركود للسوق المحلي عشان تكلفة تصنيع السكر في مصر بقت اكبر من تكلفة استيراده .. والحل ان لازم الحكومة تزود الجمارك عالمستورد .. لكن محدش سمع كلامه .. وبالفعل اللي حذر منه كان .. تم تسريح عمالة وايقاف خطوط انتاج وتم الاعتماد على السكر المستورد .. وكمان دخلت اسواق تانية زي بعض انواع السكر الخليجي .. الحكومة غطت العجز البالغ 700 الف طن بالاستيراد من الخارج برضه وده بدل ما تغطيه برفع الانتاجية وزيادة المحاصيل وتدعيمها !!.. طب ايه نتيجة كده ؟ * الحمد لله النتيجة واضحة جدا ... .. لبسنا كلنا في الخيطة وحصل الاتي : * - الجنيه لما وقع فمبقاش قادر يشتري اللي كان بيشتريه قبل كده من السكر المستورد . * - الحكومة لقت الموضوع كده قالت تستنصح وتسمع كلام الخبراء وراحت مغلية التعريفة الجمركية من 2 ٪ الى 20 ٪ .. بس الوقت كان فات وكمان زاد الطين بلة لان الاستيراد هيقل بسبب زيادة السعر . * - الدول المصدرة لينا قالت ضمنيا ان قليل من المصريين اللي هيقدر يشتري بالاسعار العالمية خصوصا وان دخل المواطن في مصر واحد متغيرش وعملته انهارت . * - والمصيبة الاكبر ان عقود التصدير من مصر للدول الاجنبية سارية ولازم تتصدر في ميعادها زي عقد ( كينيا ) .. وصدرنالها ( الشهر اللي فات ) غصب عننا . - التجار واصحاب المصانع اما حسوا بعجز الحكومة في اول شهر مارس اللي فات فكل اللي عنده سكر خزنه زيه زي الدولار . * - اما اتخزن السكر شح في السوق واتضاعف تمنة 3 مرات من 5 جنيه لحد اما وصل 15 جنيه بالرغم ان زراعته وصناعته محلية بالكامل ولاتعتمد عالدولار لا من قريب ولا من بعيد .. اللهم الا جزء صغير بيتورد عصارة قصب من البرازيل ودي اسعارها قليلة وعددها محدود . * - وناس تانية من التجار مظلومين .. استوردوا سكر بالدولار فلما الجنيه انهار فطبعا هيخسروا كتير لو باعوا بنفس السعر القديم .. * دلوقتي طبعا الاتجاه لدعم السكر من الميزانية اللي هي خربانة اصلا .. ثم الجري ورا اللي مخزنين سكر والقبض عليهم وسحلهم زي تجار الهيرويين .. وتحديد عدد اكياس معينة لكل شخص سواء في المحلات او في منافذ الجيش اللي دخل جديد في الموضوع .. * ماننساش برضه الحلول العبقرية اللولبية للمسئولين .. زي اقتراح مسئول مرموق استخدام العسل بدل السكر عشان هو اصلا راجل عسل .. واقتراح القبض على ( الخلايا الاخوانية السكرية ) كده والله بنفس اللفظ وطبعا معروف انهم بيخزنوا سكر مصر بالكامل .. وكمان اختراع كام مانشت صحفي جهنمي زي ( القبض على حوووووت السكر ومصادرة 100 مليون مش عارف كام كيلو سكر ) .. او يطلع رئيس الجمهورية ويقول كل همكم الزيت والسكر ؟. اخيرا .. في كل العالم بتحصل ازمات وحلها بيبقى عن طريق جلسة واحدة مع متخصصين بيفهموا وبيحبوا البلد فبينعدل الحال المايل .. اما لو عايزين مثال للي احنا فيه نفتكر ( ماري انطوانيت ) ملكة فرنسا لما سالوها عن حل لازمة العيش اللي الشعب مش لاقي ياكله .. فقالتلهم خليهم ياكلوا ( كعك وبيديفور ) .. فكانت الثورة الفرنسية ( أم الثورات ) عليها هي وجوزها الملك لويس .. والشعب الجعان هو اللي حكم
