أولتراس أهلاوي ل"الداخلية": "مش مكسوفين من نفسكم"

شنت رابطة أولتراس أهلاوي هجومًا ناريًا ضد وزارة الداخلية، وذلك في بيان رسمي لها على مواقع التواصل الاجتماعي، بسبب القبض على عدد من أعضائها، على خلفية مباراة الأهلي والجزيرة في دوري كرة اليد.
وجاء نص على النحو التالي:
مسرحية جديدة من مسرحيات الداخلية
من يوم الجمعة اللي فاتت واحنا بنتفرج على مسرحية وحتى كنا شايفين انها مش مستاهلة مجرد التعليق عليها وقولنا إن ده أكيد تهريج وأكيد المسئولين هيتكسفوا من الاتهامات المكتوبة في المحضر.
خلينا نقول مبدئيا كدة ماتشات دوري كرة اليد طول السنين اللي فاتت بجمهور وهو الدوري الوحيد اللي بيتلعب بجمهور بشكل رسمي، وجمهور الاهلي كل ماتش كرة يد بينسق من قبليها مع رئيس اتحاد كرة اليد شخصيا وده اللي حصل في الماتش ده فبالتالي المشكلة مش عند الجمهور المشكلة عند أي طرف من الاتحاد أو النادي أو الأمن .
وبالمناسبة لحد دلوقتي الماتشات بجمهور ومفيش قرار رسمي من الاتحاد المنظم للعبة بيقول كلام غير ده، كلام الاتحاد ملزم للأندية والداخلية في أي مكان في الدنيا.
وفي مصر بيبقى على حسب المزاج، بمعنى إن اتحاد كرة القدم بيلعب الماتشات بدون جمهور والداخلية دايما بتقول إنها بتطبق قرار اتحاد كرة القدم.
طاب لو النادي جه طلب الماتشات بجمهور هل الداخلية هتسمح ولا هتقول الاتحاد المنظم للعبة مانع ؟!!
ده بالظبط اللي حصل ماتجيش تقولي النادي بيطلب عدم تواجد الجمهور في حين أن الاتحاد المنظم للعبة بيسمح .
احنا بس مش فاهمين مين في الاخر اللي بيعادي مين؟ ومين اللي بيحاول بكل جهده يبعد الجمهور عن المدرجات ويحاول يخليه يتواجد في الشارع بيجري ورا صحابه المحبوسين ؟؟.
بس احنا فاهمين كويس مين بيدير موضوع الجمهور في مصر والاشيك ليكم ولشكلكم أن وزارة الداخلية تبقى بتدير اتحادات كرة القدم واليد والسلة عالملأ والمكشوف لأن بجد طريقتكم خايبة وشكلكم وحش.
من ضمن الاتهامات محاولة اقتحام النادي وهو الماتش بجمهور وكمان الجمهور ماراحش ناحية النادي والامن كان مانع أي حد في الشارع يعدي من عند الاوبرا .
في اتهام تاني بالتجمهر ،، ياعم والله الماتش بجمهور !!!
اتهام كمان بمحاولة الاعتداء على قوات الامن .. طاب مفيش ولا محضر واحد ولا تقرير طبي مثلا باللي تم الاعتداء عليهم ؟!!.
وفي اتهام بقطع طريق بس لحد دلوقتي لسة محدش يعرف أنهي طريق!!.
بعد الطريقة الخايبة والمفضوحة دي كلها القضية اتحالت لمحاكمة عاجلة بكرة -التلات- للشباب المحبوسين وعددهم 19 راجل من جمهور الأهلي.
محاكمة عاجلة لجمهور كان رايح يحضر ماتش بجمهور ودي طبعا جريمة وجريمة أكبر من جرايم القتل وتجارة المخدرات في بلدنا عشان كدة اتحالت في يومين لمحاكمة عاجلة.
مش مكسوفين من نفسكم ومن اللي بتعملوه ؟!
خلونا نشوف المسرحية دي اخر فصولها هيكون ايه.
الحرية للجمهور