ألتراس أهلاوى يهاجم "الجبلاية" بسبب مباراة الشرطة

شنت رابطة ألتراس أهلاوى، هجوما حادا علي مسئولي اتحاد الكرة برئاسة جمال علا، حيث أصدرت الرابطة بياناً عبر صفحتها الرسمية بموقع التواصل الاجتماعى "فيس بوك"، عقب القرار الذى صدر أمس بنقل مباراة الأهلى واتحاد الشرطة المقرر لها غداً السبت فى إطار منافسات الجولة ال 20 بالدورى العام، من ملعب المقاولون العرب لاستاد الدفاع الجوى، من أجل منع الجماهير من حضور اللقاء.
جاء نص بيان الألتراس كالتالى:
” لما جمهور الأهلى فى نهائى الكونفدرالية حاول يفهم الناس حاجة بديهية أن الكورة للجماهير بكل لغات العالم ..قولنا فى رسالتنا يمكن تفهموا.. وللأسف كنا متعشمين فى شوية جهلة وفشلة أنهم يفهموا. .عندنا فى بلدنا اللى متحكمين فى الكورة فى مصر لاعب كرة طائرة ومحاسب فاشل بيتحكم فى أكبر اتحاد كرة محلى فى إفريقيا.. ناس مش مهم ليهم الجمهور يكون موجود فى الماتشات ..ناس فرحانة بوجود أندية المؤسسات والشركات اللى بتقرر مين يحضر ومين ميحضرش.
فى الدور الأول لما قولتوا أن الدور التانى هيبقى بجمهور حطيت شرط ليه يخلى أى حد مش عايز جمهور أنه يطلب ده ..يعنى ايه أصلا حد بيلعب كورة وفى الدورى الأقوى على المستوى الإفريقى والعربى يقول مش عايز جمهور ..بتلعبوا كورة ليه؟
الفاشل لو فضل فى مكانه هيفضل يفشل الفاشل اللى فى عهده منتخب مصر مصعدش 3 كأس أمم وراء بعض ده غير تدهور منتخبات الناشئين.. لو فى حد بيحاسب حد فى البلد مكانش ده بقى الحال ..اتحاد الكورة اللى المفروض والطبيعى لما أندية تطلب أنه مش عايز جمهور يسأله أومال بتلعب كورة ليه هو اللى حط بند بيتيح لك أنك ممكن تلعب من غير جمهور !!!!..وييجوا فى الأخر يسألوا هو مين اللى بيستعدى الجمهور والشباب ؟!!
والأندية اللى طلبت أن الماتشات تبقى من غير جمهور ..متخيل لما تقابل الفرق الجماهيرية بعد سنة او اثنين أو عشرة ممكن يستقبلوك إزاى ؟!!
لما كان قبل كدة عساكر الجيش والشرطة بيجوا يشجعوا فرقهم كان على قلبكم زى العسل
بس عشان دلوقتى فى استعداء واضح لجمهور الكورة وللشباب عموما فحصل تواطؤ عشان تمنعوا الجمهور. .انتوا اللى بتزرعوا الكراهية وانتوا اللى هتحصدوا نتائجها ده وعد !
وطبعا إدارة الأهلى كعادتها الفترة الأخيرة قايمة بدور المتفرج ..مفيش قوة شخصية مخلى اتحاد الكورة ياخد قرارات زى دى ويظلم الأهلى عشان عارف أن مفيش أى رد فعل هيتم من جانبكم حتى لما طلبتوا حكام أجانب وهى حاجة فى لوائحهم بس مفيش حد استجاب لكممحتاجين حد يفوقكم ؟!!ولا محتاجين حد يفكركم أنكم إدارة النادى الأهلى ؟
افضلوا اتحايلوا على القوانين وانقلوا الماتش من استاد لاستاد تانى .. بس فى يوم هتلاقوا الجمهور قدامكم غصب عنكم.. وساعتها مفيش لوائح شاذة هتساعدك ..لن يكون لجروب أولتراس أهلاوى تواجد فى مباراة الغد.. نلقاكم فى مباراة وادى دجلة ..دامت الكرة للجماهير . ودمتم فشلة”.