الجارحي يروي بالتفصيل ما حدث ل"ليليان داوود"

روى الكاتب الصحفي محمد الجارحي - رئيس تحرير برنامج مانشيت الذي كان يُقدم على شاشة أون تي في - تفاصيل مع حدث مع الإعلامية ليليان داوود.
وقال "الجارحي" في تدوينة عبر حسابه الشخصي بموقع "فيس بوك" : "خلاص ليليان اترحلت؟ ارتحتوا كده؟؟ المؤامرة على مصر انتهت؟؟ .. كانت هي يا حرام سبب الكوارث اللي احنا فيها؟؟ الحقيقة لا يا غبي.. الحقيقة إنكم لبستم فضيحة في العالم كله وشكلكم عرة ..وهتفضل ليليان دَاوُدَ من أشطر وأنضف الإعلاميين وأكثرهم مهنية" بحسب رأيه.
وأضاف: "عرفت بخبر القبض على القديرة ليليان دَاوُدَ من الصديق العزيز زياد العليمي.. كنت يا دوب لِسَّه بأبدأ الفطار. مش مستوعب اللي حاصل واللي بيحصل واللي حصل.. حاجة تجاوزت حد الجنون" ، متسائلًا : "أيه خطورة ليليان دَاوُدَ علشان تتعاملوا معاها بالطريقة (...) دي؟؟ أيه اللي عملته علشان الحقارة دي كلها؟؟ تاخدوا أم قدام بنتها من غير ما تاخد هدومها حتى؟؟ من الدار للمطار؟؟ كان راعبكم ظهورها على الشاشة؟؟ ما البرنامج اتوقف خلاص؟؟ يعني قعدت في بيتها خلاص وكل القنوات خلاص بقت تحت ايديكم يعني مش هتطلع في قناة تانية.. هتقول لي أصل وضعها غير قانوني؟؟ أصل الإقامة خلصت؟ إقامتها كانت قانونية وبتسافر وترجع وعمر ما كان فيه مشكلة" بحسب قوله.
وتابع : "أمال أيه الحكاية؟؟ .. الحكاية إن (ال....) ليها ناسها.. وتصفية الحسابات في دم النظام.. الحكاية أن اللي ما يطبلش ويسمع الكلام نقطم رقبته.. كل حاجة مترتبة ومتظبطة.. العقد يتفسخ من هنا ( مقر قناة أون تي في الزمالك ) قوم إيه القوة الأمنية تروح على طول تقبض عليها من بيتها ( في الزمالك برضه ) بعد نص ساعة .. ده لو الجن السحري ما كانش هيعرف.. يعني فيه مخبر متابع ومحضر ومرتب كل حاجة.. للدرجادي وصلت (....) ؟؟"
وأنهى كلامه موجهًا رسالة ل"ليليان" قال فيها: "عذرا يا ليليان.. دي مش مصر اللي بتحبيها بس تأكدي إن يوما ما قريب جدا هيجي وترحب بيكي مصر الحرة من تاني.شكرًا على مهنتيك وحبك لمصر وجدعنتك وتأكدي إن زي ما فيه أوساخ نالوا منك بالشتايم والسباب وقلة الأدب، فيه ناس كتير قوي بتحبك وبتحترمك.. ربنا يحميكي ويحفظك