نفسى أقابلك يا ريس

نفسى أقابلك يا ريس وأشكيلك همومى.. إللى خلتنى طقيت وطلعت من هدومى.. نفسى أحكيلك يا ريس عمايل المسؤولين.. إللى قايلينلك الشعب كويس وإحنا مطحونين.. علاوتك يا ريس أول ما بيصرفوها.. بيغلوا الأسعار ويرجعوا ياخدوها.. من زيادة الأسعار يا ريس بقيت بخاف.. لمرتبى ما يكفيش يجيب عيش حاف..
والخضروات والفاكهة سرطنوها.. وبمية المجارى بقوا بيرووها.. وكل ما بحاول أتعالج على نفقة الدولة.. مابكسبش فى الآخر غير شرف المحاولة.. حتى نائب دايرتى بالتزوير فرضوه عليا.. ولما أجى أشتكيلوا مايردش عليا.. صدقنى يا ريس أنا ما اختارتوش.. ده أنا حتى اسمه ما أعرفوش..
 إوعى تصدق يا ريس تقاريرهم عنى... عمرهم ما كانوا واخدين بالهم منى.. ولا يوم حد كلف خاطره وسألنى.. إيه إللى ع الرصيف منيّمنى.. يا ريت يا ريس تزرنا فجأة وتشوف.. كل حاجة بتحصل ع المكشوف صدقنى يا ريس كل حلمى.. إنى أتكلم وتسمع منى!!
رامى محمد زين - محامٍ
remozeen@hotmail.com