طويل القامة، مفتول العضلات، يسير فى الشارع فلا يعترض أحد طريقه كأنه قطار سريع أو «آلة للخناقات». هكذا يعبر عزام فهمى عن نفسه كبودى جارد محترف، ورياضى حصل على بطولة الجمهورية فى المصارعة الحرة ولعب لصالح نادى اتحاد الشرطة والمنتخب المصرى. عزام الذى يبلغ من العمر (21عاما) يرى المجتمع المصرى مصابا بالازدواجية « الناس كلها بتتصرف بشكل مزدوج.. يعنى مثلا السيكيوريتى رغم أنه مهم جدا وشغلانته ماحدش يقدر يستغنى عنها، لكن الناس بتعتبره مجرد بواب وساعات بيتريقوا عليه.. لكن ماحدش يقدر يعمل كدا معايا لأنهم خايفين من عضلاتى وجسمى وده ازدواجية غريبة». بدأ عزام مشواره مع الرياضة من صالات الجيم هناك تدرب لشهور طويلة، وحافظ على معدلات تمرين عالية وصبر كثيرا على نظام غذائى «مايخرش الميه». عزام بطل الجمهورية فى المصارعة الحرة، بدأ لعب هذه الرياضة قبل 7 سنوات، ويعتبر هذا سنا صغيرة، فهناك من يمارسها بعد 25 وأحيانا كثيرة بعد 30، رآه مدربه أفضل من يلعب فى الفريق، فرشحه للمنتخب ومن ثم رآه مدربو اتحاد الشرطة فأخذوه للعب فى نادى الاتحاد، ثم قرر أن يكمل باقى حياته كبودى جارد يعمل لدى الشركات والأشخاص، ويحلم بالسفر للعمل كبودى جارد فى الخارج. «مش كل الناس تقدر على الجيم، ده بيحتاج مصاريف كتيرة وأكل معين، ومواظبة وتفرغ وإن يكون قدامك هدف تحققه.. شباب كتير ما بيقدروش على تكاليف الحديد». يتحدث عزام عن عمله الحالى كبودى جارد لصالح شركات أو أشخاص: «الجارد الحقيقى إذا دخل خناقة مش هايضرب وبس، ده ممكن يتسبب فى عاهات مستديمة، واللعبة دى مش سهلة، أنا بحب العنف والخناقات، لكن فى نفس الوقت رياضة المصارعة الحرة علمتنى الصبر، يعنى مش هامشى فى الشارع أضرب فى الناس، وفى النهاية أنا إنسان زيى زى أى حد، لو مثلا سواق ميكروباص استفزنى، هاعمل زى أى حد، هتشاكل معاه، وممكن أنزل أضربه، وده ممكن يحصل مع أى حد، إلا أن الفرق هو أنى مش بضرب زى أى حد، وعمرى ما ظلمت حد». يضيف عزام: «الناس فكرانى آلة للخناقات وجر الشكل.. بس أنا شغلتى التخويف، لكن فى وقت الشغل بسمع كلام صاحب الشغل بدون مناقشة يعنى مثلا كنت بشتغل مع رجل أعمال إيطالى، بينه وبين شريكه المصرى خلافات وصلت للمحكمة، والمفروض إن المصنع بتاعه يستمر فى الشغل، كنت أنا كل شغلتى ساعتها إن العربيات اللى محملة البضاعة تدخل المصنع، وصاحب الشغل قال تدخل يبقى تدخل، برضاهم من غير رضاهم هاتدخل، وكان الموقف ده أكثر موقف صعب فى حياتى، لأنه بقى فيه ضرب نار، وخناقات، وطبعا مش زى الخناقات اللى بتكون فى الشارع، لا دى خناقات بين جاردات». فى عالم «البودى جارد» لا يوجد فصل تعسفى، فصاحب العمل دائما بحاجة إلى كتلة العضلات التى تحميه « محصلتش ولا مرة إن صاحب الشغل اتخلى عن الجارد بتاعه، يعنى هو جايبه يحميه، ويمشيله شغله، وبعدين أضمن شغل هو اللى بيكون من خلال شركات الأمن، بيبقى فيه ساعات قلق من ناحية اللى بيشتغلوا عند أشخاص، لأنه ممكن الخناقة تكبر ويبقى فيه ضحايا، خصوصا إن الشغلانة دى مفيهاش تصاريح، ومش بتعتبر مهنة مضمونة أوى، وبعد ما بخلص شغل، وباخد حقى، بنسى كل حاجة حصلت، وأحيانا بمسح رقم تليفونه من عندى، لأنه الراجل ده بتبقى كل أسراره عندى، وكل تحركاته، وتفاصيل شغله وشركائه، وأحيانا كثيرة أوراق وسجلات خاصة بشغله، ولو بشتغل جارد لأسرته، كمان بتكون كل تفاصيل بيته معايا، فلازم إنى بعد انتهاء الشغل معاه، أنسى كل حاجة خاصة بيه، ولو إن مش كل الجاردات كده، وفيه منهم بيستغل التفاصيل دى فى ابتزاز ولعب مش نضيف». «البودى جارد» ليس مهنة تطمئن صاحبها فكما يقول عزام: «دى مش مهنة ثابتة، غير إنها بتتطلب مواظبة على نظام لفترات طويلة، طول ما أنا بشتغل بودى جارد، ملتزم بالتغذية والتمارين فى النادى والجيم، وأنا بشتغل الشغلانة عشان تنمية نفسى وأبقى حاجة أحسن، لكن معظم الشباب بيبصوا لأنهم يكونوا أصحاب عضلات بس، يعنى بالتمارين يكون جسم الشاب قوى وضخم، لكن مش بيكون رياضى، مجرد شكل يعنى». ورغم حرص عزام على «وصفة البودى جارد الحقيقى» كما يسميه وهو البودى جارد الذى يمزج الرياضة بالعمل فإن أصحاب العمل لا يدققون فى اختيار حارسهم الشخصى «مش كل الناس بتنقى بودى جارد محترف، فيه ناس بتجيب جارد محترف عشان تخليص المصالح لكن مثلا العرب اللى بييجوا مصر هما بيحبوا المنظرة، وزيهم أصحاب الكازينوهات، والسائح الخليجى ده غالبا مش بيكون محتاج جارد يحميه، لكن يروح يأجر اثنين أو تلات جاردات ويمشيهم جمبه فى كل حتة، منها لفت انتباه ومنها منظرة ويعرف الناس كلهم إنه عنده فلوس وحريم بيخاف عليهم».
