ترررررنك .. من بره

■ أنا الطالب عبمعطى عبحق جادالحق شراب.. عضو البعثة التعليمية بالمعهد الزراعى بإدفين آلو.. هنا بياخدوا بالهم مننا وبيأكلونا وبيقولولنا اغسلوا رجليكوا قبل ما تناموا لا تموتوا.. آلو.
■ عبارة أتذكرها للحبيب الصابر الراقد فى استسلام لقدره جورج سيدهم كلما سافرت للخارج.. ولا تسألنى لماذا تتوارد على خاطرى.. أهه بتتوارد وخلاص.. أصل أنا برة مصر حاليا.. ذاكرت واتفحت وشقيت ولفيت وناديت وانبح صوتى ولا حدش عبرنى.. لحد ما لقيت شوية ناس كده الظاهر مجانين ما تفهم ولاّ ملاحيس ولاّ ضاربهم السلك عبرونى ودعونى والظاهر الظاهر من غير شر ناويين يقدرونى.. سافرت وأنا بقدم رجل وبأخر التانية وبقرا المعوذتين وأكور إيدى على صدرى وأتمتم «رب اشرح لى صدرى ويسر لى أمرى واحلل عقدة من لسانى يفقهوا قولى» وأقوم فارداها عسى الدعاء يحوق وعقدة لسانى تنفك وأشرح وأسهب وأقول.. والكورة تخش الشبكة.. وعصام الحضرى يرقص فوق العارضة.
■ وصلتنى دعوة كريمة من الدكتورة زينب الديب، رئيس اللجنة المصرية الدولية للفيلم والثقافات برعاية المجلس الدولى للسينما والتليفزيون والاتصالات بهيئة اليونيسكو CEIFT، اللى شرفتنى بمنحى لقب عضو فعال.
■ فرحت أنا باللقب قوى وبالذات فعال دى وقلت يا حليلة.. والله وبقيت يونيسكاوية.. راحة فين يا باتعة؟.. راحة اليونيسكو.. جاية منين يا باتعة.. جاية م اليونيسكو.. بكرة ألبس واتطقم وأطلع فى الصور مع السادة والسيدات اليونيسكاويين وصورى تطلع فى نشرة أخبار روتانا.. بدأت أقرأ الموضوع والبرنامج والأهداف والذى منه.. ويالهول ما قرأت.. ده ولا الثانوية العامة.. كمية معلومات وأنشطة وهوم وورك لازم أعملهم قبل ما أحط رجلى فى الطيارة.. يا غلبك يا بنت يونس.. هو أنا ناقصة؟
■ ودون ما أصدع دماغكو بالتفاصيل.. وبعد عدة لقاءات لسه لم تكتمل مع مختلف اللجان والمنظمات والأنشطة داخل وخارج وحوالين اليونيسكو.. أردت فقط أن أنقل لكم بعضاً مما يدور فى هذه المجتمعات.. الناس دى معنية جدا بالحفاظ على الإنسانية الموجودة على ظهر الأرض.. مستقتلين فى الحفاظ على الثقافات الأصيلة التى بنتها الحضارات وتعريف بعضها بالبعض بعد طول خصام.. يبحثون عن الأصول فى الأشياء ويحاولون حماية الهويات.. ويمدون يد المساعدة لكل جنس بنى آدم مهدد بضياع شخصيته الأصلية واضمحلال ثقافته أو السطو عليها أو تلوينها وإذابتها فى هوية أخرى.. يبحثون عن المجتمعات العاجزة عن الدفاع عن أصلها ويحاولون مد يد المساعدة لها.. كل بلد لديها شوية ثقافة بتلات تعريفة تجاهد معهم وبمساعدتهم للإبقاء على لحسة الثقافة اللى عندها.. فما بالك بمصر.
■ عندما سألت بخباثة إشمعنى أنا؟.. كان الرد.. يا نهار أزرق.. أنتم أقدم بلد على وجه الأرض.. أنتم الذين أسستم الحضارة والعلم.. أنتم الذين سار العالم على خطاكم.. وقلدكم واتمحك فيكم.. أنتم الذين بسبب حضارتكم اخترعولكم مبدأ الغزو والاحتلال.. أنتم الذين حاولت كل بلاد الأرض سرقتكم بدعاوى مختلفة.. قادة وزعماء كثيرون اعتبروا دخول بلادكم هو ال«سى فى» اللى قدموه للعالم عشان يدخلوا التاريخ.. بس ساعتها ما كانش فيه نشرة روتانا..
 آثاركم مالية المتاحف والشوارع فى بلاد كتير من اللى بتاكل الفينو والأفوكادو والكيوى.. ولأننا بنساعد الدول والمجتمعات على الحفاظ على تراثها.. ولأننا شايفين إن تراثكم وثقافتكم فى خطر.. وإنكم مستهدفين لسحب كل الكليم والسجاد والحصير من تحت رجليكم.. فنحن نريد المساعدة.. ولأنك بتتكلمى وتبعبعى وتهلفطى كتير وبتوزعى بيانات تحذر من نهب الثقافة المقروءة زى مكتبة الإسكندرية وغيرها..
 فهمنا منك إن عندكم مشكلة قرصنة بتسحب دم الريادة من عروقكم.. عندكم ثروة لا تقدر بكنوز الأرض من أبحاث وعلوم وآداب وتراث وأصل الفلسفة والإبداع بأوسع أشكالها.. أفلام محتاجة ترميم وإعادة اكتشاف.. عندكم تلت آثار العالم وتلات إربع حضارات متعاقبة منسوخة من الحضارة الأعظم وهى الفرعونية.. عندكم سينما من أزيد من قرن.. ولكن.. عندكم أزمة.. بعد إذنك سلطحى دماغك شوية كده عشان حانرزعك بلطة تقسمها نصين.. وابقى لمى الشظايا براحتك.
■ هل تعلمين أن السينما الرائدة فى العالم الآن هى هوليوود؟.. هل تعلمين أن السينما الثانية الآن هى بوليوود التى هى السينما الهندية؟.. قلت أيوه عارفة.. إيه المعلومات الحامضة دى؟! قالولى وإيه يا شطورة السينما التالتة؟.. تنحنحت وقلت «بسم الله الرحمن الرحيم.. الإجابة إيجوليوود.. يعنى السينما المصرية طبعا يعنى».. قالولى اجرى قومى الزقى وشك فى الحيط.. السينما التالتة فى العالم هى نوليوود.. مين يا حبايبى نوليوود دى؟.. قالولى السينما النيجيرية اللى بدأت فى نيجيريا سنة 1980.. تذكرت كلام صديقى الدكتور شريف حافظ لما قاللى كده وافتكرته بيهرأ.. قلتلهم ولدى نية للردح « بأمارة إيه بقى إن شاء الله؟»..
قالوا بأمارة ما هى بتنتج ألف فيلم فى السنة.. وتعدادها 120 مليون نسمة بيتفرجوا على كل الأفلام دى.. وبيحترموها ويشجعوها ويمولوها لمجرد إنها صناعة وطنية.. وفى تلاتين سنة فقط قفزوا للمركز الثالث على العالم.. يا نهار بلون السبانخ.. ألف فيلم فى السنة؟؟.. يعنى بينتجوا تلات أفلام فى اليوم؟؟؟؟؟؟.. فتحت أشوف الأفلام لقيت بعيد عنكم هبل مالوش أول من آخر.. سألتهم هو بالكم ولاّ بالكيف؟.. قالوا بالاتنين.. إنتوا متأخرين فى الكم والكيف.. وكمان بتتقلبوا فى ثقافتكم متناسين إن ما كنتوش ناسيين فعلا إن ثقافتكم دى تخص العالم زى ما تخصكم.
■ أنا الطالب عبمعطى عبحق جادالحق شراب.. الرسالة ما خلصتش.. لكن اللغة اتغيرت.. بعد ما كانت اغسلوا رجليكوا قبل ماتناموا لا تموتوا.. أصبحت.. إصحوا للون وتبتوا فى اللى ربنا اداهولكم لا تفوقوا ما تلاقوش لكم مكان على الكرة الأرضية من أصله.
zahqanin@gmail.com