كله محصل بعضه

■ مواطن يتمشى على الكورنيش مع صديقه: فكرك مين اللى هيحكم مصر؟
- وهى تفرق معاك؟
- ....... طب أنت عرفت أن البرادعى أجل رجوعه؟
- يا سيدى خليه يأجل وعلى رأى المثل إن راح منك يا عين هيروح من قلبى فين.. قولى، معاك خمسين جنيه سلف؟.. - ليه؟
- أصل البالوعات اتسدت عندى فى الشقة والمية غرقتنا والكهرباء ضربت وعايز أشترى حاجة تسلك البالوعات... - طب ما تشوف سباك وكهربائى.
- سافروا فى عمرة... – طب شوف غيرهم.
- وعلى إيه.. بكرة يرجعوا.. وعلى رأى المثل شوف عهدى مين بعدى هيصونهولك مين.
- تصدق بالله طول ما احنا زيك كده عمرنا ما هنعرف نعمل أى تغيير
- انت عايز تغير؟ روح محطة فيصل ممكن تغير من هناك وتاخد أوتوبيس ستة وعشرين والأحسن تاخد المترو هيوصلك طوالى ولا تغير ولا توجع قلبك.
- يابنى خليك معايا.. سواء البرادعى أوغيره لازم يحصل تغيير، مش كفاية إنهم فشلوا فى الإصلاح وبيضحكوا علينا ويقولوا إنه ماشى بطىء؟..
- أكيد طبعا ماشى بطىء وعلى رأى المثل ماتبطل تمشى بحنية ليقوم زلزال.
- إيه اللى بتقوله ده؟! يابنى البلد فى مرحلة حرجة.. طب انت حسيت بفرق لما نظيف قعد أسبوعين رئيس جمهورية؟
- هو بقى رئيس جمهورية! يا بركة دعاء الوالدين.. أصل الدنيا دى أرزاق وأقدام.
- تصدق بالله أنا ابتديت أحس إن البرادعى نِفسه اتسدت منك ومن اللى زيك وشكله كده مش هييجى تانى.
- يا عم ماتاخدهاش على صدرك كده، مسيره هييجى، وعلى رأى المثل ماما زمانها جاية، جاية بعد شوية جايبة لعب وحاجات.