كل سنة وإحنا.. إيه

إيه الإحراج ده؟.. اكتشفت وأنا أستعد لكتابة المقال أنه سينشر فى اليوم الأول من العام الجديد.. يعنى النهارده واحد/ واحد.. وانتوا بتقروا الجرايد الصبح.. يعنى أول استفتاح على وشى.. يا ليلة بيضا..
وبعدين؟.. إنها حوسة كبرى.. طب ح اكتب إيه؟.. هل أتحدث عن العام المنصرم؟.. ما هو كل الناس تحدثت عنه.. وبما إنه منصرم فقد ناله من معنى الكلمة الكثير.. ودع بالصرم والقباقيب واتدشت وراه تمانين قلة وزير.. واتقالُّه روح إلهى ما توعى ترجع ولا ينكتب علينا نشوف وشك تانى.. قال يعنى فيه أى حاجة م الزمن بترجع تانى..
أكتب عن المواجع التى أكلت أكبادنا خلال هذا المنصرم.. وأقعد أعدد وألطم وأنوح.. طب إيه الغم ده؟.. ثم إن الزملاء والأساتذة لم يقصروا.. بقالنا أسبوع بنفكر بعض بالبلاوى التى حدثت بدءاً من الأزمة الاقتصادية التى بدأت تتمطع فى أواخر المنصرم اللى قبله.. لحد ما ابتدى المنصرم ده راحت البونية لابسة ف وشوشنا..
مروراً بحوادث الطرق والقطارات والمعديات والاعتصامات والخنازير وقانون الضريبة العقارية واعتصام المنتقبات واكتشاف جرايم رشوة وسرقة آثار وبواخة واحد داعية سئيل ومفلوت عياره ونازل شتيمة فى العالم وانتشار جرائم النصب والقتل وأحكام الإعدام التى سادت برامج التوك توك شو..
وقضيناها الحقيقة عاملين زى أخينا اللى خد تلاتين قفا على سهوة..
كنا متقمصين شخصية حرامى اتقفش فى حفلة لعمرو دياب.. نتلدع القفا من هنا عبال ما نقول آى، تكون اللوكمية لبست فى العين.. ثانية ويكعبلك حذاء بيادة ميرى مقلب حرامية.. تتكوم على الأرض يدوس عليك لورى.. تقف تطس ف كاروحماره عصبى.. تتدور تلاقى ف وشك عبّارة داخلة عليك تبططك.. إيه اللى جاب البحر عند عمرو دياب بقى؟.. ما تسألش.
طب أكتب عن المتميزين والمتميزات من الفنانين والفنانات؟؟.. من باب إنه مجالى يعنى.. وماله؟.. وأفتح فى مواويل الشعر وأتغنى بالمواهب وأعدد الحسنات.. وأتقعر وأتفرد وأتنى وأخبط كام لفظ نقدى تحليلى ومايضرش كلمتين أجنبى أجيبهم من أى قاموس.. وأفبرك أى أرقام إحصائيات م اللى بسمعها ع القهوة من الريجيسيرات والكومبارسات..
وأقعد أنفخ فى أورام وأضغط على أزرار جنون العظمة اللى بتخللى بعض النجوم يتملوا هوا لحد ما يقربوا يطيروا زى المناطيد لدرجة إنى ساعات ببقى باصة للنجم من دول وعايزه أقوم أربطه بفتلة وأثبتها ف طوبة ع الأرض عشان يركز كده ويستهدى بالله.. ذلك لأنى لن أكون حقيقية ولا صادقة.. طبعاً.. لأسباب كثيرة بقى مش حاقولها وبلاش وجع قلب.. فذلك سوف يعطينى الرخصة لأن أهجص كيفما شئت..
وأديها استفتاءات مضروبة.. وأروح أطبع فى الفجالة كام ورقة لحمة ملغمطين بصدى حلل ألامونيا قديمة.. قال يعنى بردية م التراث الفرعونى وراس سحلية متصبرة إعزنّها راس الإله سحلل كا طش إله اللزوجة والرخامة.. وأجيب م النملية حاجات أرصها على ترابيزة بمفرش..
وأوزع بقى.. جائزة الكسرولة الذهبية.. المقورة الفضية.. البستلة البرونزية.. قمع الإخراج الأول.. وكده يعنى.
طيب ومش حاجيب سيرة اللى لغمطوا الدنيا وبوظوا الصناعة وركبوها على حمار بالمقلوب؟.. يعنى المناسبة حتمر دون أن أفش غلى وأعمل رثاء وحفل تأبين لمرارتى التى انفقعت وفتحوا لقوها مليانة حصى زى بمب العيد دى؟.. مش حارفع عقيرتى واغجر واتهم وأشجب وأدين وأتحمق واتفتف والمناظر دي؟.. آآآه..
كده حندخل فى خصومات ولوى بوز ومقاطعات وتحالفات ومؤتمرات صحفية م اللى بتطرقع فيها بلالين ملونة وتصريحات من عينة حانغير وجه الصناعة وحاننتج 880 فيلم فى الساعة وحانخترق العالم الغربى وحانقطع السيما الأمريكية والهندية وحانموت الوليه دى.. وعلى إيه.. ما الطيب أحسن.. بلا سيما بلا خوتة دماغ.. ياللا أهه صناعة وغارت..
يعنى حاتكون أحسن من أختها واللى قبلها واللى قبلها.. خدنا إيه م الثقافة والفنون والريادة والوجه الحضارى والقرف ده؟
خلينا إحنا فى القضايا المصيرية اللى بتحدد خط سير البلد.. خلينا فى الموضوع اللى بيهم الناس بجد ومجتمعة عليه كل الرءوس المتكلفة اللى بتشرعلنا قوانيننا وتدسترلنا دساتيرنا.. الموضوع المطروح على الساحة وصفحات الجرائد وبرامج التوك توك الجامدة.. واللى حايدخل موسوعة جينيس بصفته أكثر المواضيع علماً وتحضراً ورقياً وفلسفياً..
الموضوع الذى حارت فيه كل العقول المفكرة من حملة حرف الدال فى جميع المجالات ودخلوا فيه مناظرات لبعض.. وانعقدت من أجله حلقات البحث والدراسة والتحليل.. وبذلت الجموع فيه مجهوداً خارقاً لحل اللغز.. هو قاله ح اطلع دينه وللا روحه؟؟؟.. فقد تبارى الخطباء المفوهون فى شرح القضية التى استعصت على الدهماء من الشعب.. حينما انبروا للدفاع عن العضو الموقر الذى وشى به عضو آخر موقر برضه وراح فتن عليه للصحافة وكشف ستره..
حضر الجلسة المغلقة على من يرسمون لنا خط سير الحياة.. وخرج منها جرى يفتش السر والحقى يا اختشى الحق يا خويا.. ده قاله ح اطلع..... قال يعنى ما فهمناش إحنا بقى إنها دينه.. ثم خرج علينا بيان إنها يا جماعة روحه مش دينه.. ثم توالت البيانات بقى.. ده هو قاله؟ لأ أنا كده حازعل منك.. وفى قول آخر.. حاخاصمك.. وثالث يقول ده هو اتقمص منه بس.. ورابع يقول هو بصله من فوق لتحت بقرف كده وقاله يا سم..
طب وأنا إيه اللى يدخلنى فى المتاهات دى؟.. بنقول واحد واحد وعام جديد وكده.. ما نمشيها لطافة وأمنيات فى الطيابة والسأسأة.. بُقين حنية على ابتسامة ودية وأسبل عينيا وأحاول إنى ما احولش.. حَكِم أنا لما بسبل بحولّ على طول.. وكل سنة وأنتم طيبين يا حبايبى..
تفاءلوا.. والنبى تتفاءلوا.. سايقة عليكوا النبى لا تتفاءلوا.. إنه عام الرخاء.. والعدل.. والحرية.. والديمقراطية.. وأى حاجة فيها إيه.. عام إن شاء الله ليس به حوادث طرقية.. ولا جثث مرمية.. ولا خنقة مرور مزرية.. يخلو من نشاط الجماعة ديه.. عام تخلع فيه النقاب الوليه.. ويخلو من الوقفات الاحتجاجية..
والعمال حياخدوا حقهم ميه الميه.. وحانتصالح مع الداخلية.. والتعليم حايتصلح من ابتدائى للثانوية.. وحماس وفتح حايبقوا سمن على مهلبية.. ونخلص إحنا م الورطة ديه.. ونشوف حالنا بقى وماحدش يقرفنا م البلاد الغلاوية.. وتتكتم المحطات الحنجورية.. وكل الأمنيات الطيبة ليكوا وليه.. ومش لاقية حاجة تانية فيها إيه.. غير إن الحب هو اللى حايحيينا السنة اللى جايه.
zahqanin@gmail.com
isaadyounis@gmail.com