«لو فكرت في نفسي كان زماني النائب».. مرتجي يكشف كواليس جلسته مع الخطيب بشأن منصب «العامري»

كشف خالد مرتجي أمين صندوق النادي الأهلي، عن كواليس جلسته مع محمود الخطيب رئيس النادي الأهلي، بشأن منصب نائب رئيس النادي بعد وفاة الراحل العامري فاروق
وقال مرتجي في تصريحات تليفزيونية عبر شاشة إم بي سي مصر 2: «بعد وفاة العامري فاروق، الكابتن الخطيب اجتمع بيا وقالي يلا يا مرتجي ده وقتك انك تاخد نائب رئيس النادي الأهلي، ولو أنا كنت بفكر في نفسي كنت وافقت وقولت يلا انتخابات».
وأضاف: «فكرت في النادي الأهلي وده اللي رباني عليه أبويا، ابويا رباني على إنكار الذات، لما حبيت اترشح في مجلس الإدارة سنة 2004 أبويا قالي روح ل حسن حمدي لو خدك معاه أنزل».
وتابع: «اللي عايز أقوله إني مفكرتش في نفسي بل في الأهلي، وقولت للخطيب يشرفني إني أبقى نائب معاك وبعتبره أخويا الكبير مش رئيس النادي، وقولتله لو سيبت منصب أمين الصندوق في ناس من الزملا بتوعي هيحدث صراع بينا، وبدل ما هنعمل انتخابات على منصب واحد هنعما انتخابات على 4 مناصب، وده هيخلينا نكلف فلوس كتير أوي على النادي».
وأكمل خالد مرتجي: «شورت عليه وقتها بأسمين هما اللي ينزلوا على منصب نائب الرئيس وكانوا ياسين منصور، ومصطفى مراد فهمي، وبعدها لم يحدث انتخابات، فلو كنت بفكر في نفسي كان زماني دلوقتي نائب رئيس النادي».