يوسف زيدان يهاجم الموالد: لا يعلمون تاريخ ميلاد الدسوقي.. والاستغلال يطغى على الروحانية

تحدث المفكر والروائي الدكتور يوسف زيدان، عن الموالد الشعبية والتصوف، مؤكدًا أن ما يحدث في الموالد لا يمتّ بصلة إلى التصوف الحقيقي.
وقال زيدان، خلال لقائه مع الإعلامي عمرو حافظ، ببرنامج «كل الكلام»، المذاع على قناة "الشمس": «الجماعة اللي بيجتمعوا النهارده في السوق طبعًا هيفرحوا شوية، ده كويس وكل حاجة، بس هم عرفوا منين إن النهارده اتولد إبراهيم الدسوقي؟، ده غالبًا الشيخ إبراهيم الدسوقي نفسه ما كانش يعرف هو اتولد إمتى، لأنه ما هو أكبر منه عبدالقادر الجيلاني، لما ابنه سأله: إمتى اتولدت؟ قال له: لا أعلم، ولكني دخلت بغداد في السنة التي توفي فيها التميمي، وكان عمري 18 سنة بالتقريب.»
وأضاف: «زمان إحنا نعرف وفيات العلماء الكبار والشخصيات المهمة يوم وفاتهم عشان بيبقى في جنازة، إنما الميلاد ما كانش عندهم شهادات ميلاد ولا سجل مدني، فالناس دي يعني في الهواء كده، حلو الهواء بس يبقى محدود وما يتمش توظيفه واستغلاله من قبل بعض المنتفعين.»
وتابع: «أنا شفت بعض المنسوبين للتصوف دول في الحسين، الناس الفقراء اللي مش لاقيه تاكل، هم رايحين بقى يزوروا، والناس جماهير وراهم، ويحط يا عيني 10 جنيه ولا 15 جنيه في ظرف، يحدفهم على أقدام الشيخ، وواحد من ورا عمال يلم المظاريف، ده تصوف إيه ده؟ ولا شيخ تاني بيزعم إنه صوفي يطلع لابس عِمّة شكلها غريب، ده مظهر التصوف ضد المظهر، التصوف هو انتقال من المظاهر إلى الجواهر، من الشكل إلى المضمون».
واستطرد قائلًا: «اللي بيعملوه ده عكس التصوف، فعلى الأقل ما يستغلوش جهل العامة والنزوع الفطري الإنساني ويوجهوه للتوجيه الخاطئ العديم المعنى، اللي بيخلينا كبلد في حالة هوس».
واستعرض زيدان أصل ما يسمى بملابس المجاذيب، قائلًا: «في نفس الوقت اللي كان فيه بيسموهم الدجاويش، ودي كلمة غلط، هم الأدق المجاذيب، من مجذوب، اللبس ده ليه تاريخ، دي اسمها المرقعات، وعلامة على الانتقال من الحياة الدنيوية إلى الحياة الصوفية، لما بدأ التصوف في بغداد في الزمن العباسي الأول، كان في بزخ وطرف وإنفاق، فعالجوا بالضد، زهدوا، وكان من علامات الزهد إنهم ما يلبسوش حاجة شيك ولا نظيفة، فلبسوا ثيابًا بالية مرقعة علشان يدو إشارة للزهد في الدنيا، ومع الوقت بقت المرقعات ولبس الصوف علامة على التصوف، لكنها علامة مرحلية مرتبطة بوقت معين، فبالتالي ما ينفعش نفتكر إن التصوف هو الصوف أو لبس الصوف».
وقال: «اللي بيبلسوها المجاذيب دي دلوقتي، هو بيعملها مخصوص، يجيب حتة قماشة حمراء وحتة صفراء ويخيطهم في بعض، ده شيء مش من جوهر التصوف».