«الإداريين السبب والشباب صعبانين عليا»... شوبير يهاجم مسؤولي منتخب الشباب

وجه الإعلامي أحمد شوبير، رسالة للجهاز الفني والإداري لمنتخب الشباب، بعد الفوز على تشيلي في بطولة كأس العالم للشباب المقامة في تشيلي، بسبب صعوبة موقف صعود المنتخب.
ويواجه المنتخب صعوبة في الصعود لدور ال 16 رغم الفوز على تشيلي بسبب التساوي في عدد النقاط، والاتجاه إلى تطبيق قاعدة اللعب النظيف، في الوقت الذي حصل فيه لاعبي المنتخب على 7 بطاقات صفراء مقابل 5 للاعبي تشيلي.
وقال شوبير في تصريحات إذاعية: «الحقيقة أنا كنت مرتبط بسفر وصعبان عليا تضيع مباراة مصر وتشيلي وقعدت أحارب مع نفسي وقولت لا لازم أتفرج وعشت دور المشجع بقا».
وتابع: «بدأنا البطولة بشكل سيء جدا جدا، أنا هتكلم والناس هتزعل مني بس مش مهم، معروف قاعدة اللعب النظيف دائما والواجب كل الواجب على الجهاز الفني والإداري يقولوا لللاعيبة مش عايزين إنذار وبالتالي مينفعش أصلا الإداريين اللي يأخذوا إنذارات».
وتابع: «حققنا المكسب وكلنا كنا فرحانين بالصعود إلى أن حد بعتلي وقالي متكتبش حاجة تشيلي اللي صعدت، بكل أمانة مفيش فيها أي مجاملة، يا جماعة الخير يا إداريين حضراتكم لازم تفهموا اللاعيبة وتوضحوا مفهوم اللعب النظيف، قبل كدا كنا بنلعب مع الجزائر وصعدنا في صدارة المجموعة».
وواصل: «الحقيقية مندهش ومستغرب ومذهول من أننا اللي حاطين نفسنا في الموقف دا لأن البطولة دي وأحنا مستنين نشوف القصة دي عاملة ازاي لأن المجموعة اللي فيها المغرب والمجموعات التانية في منهم اتنين ضمنوا أحسن توالت».
وواصل: «وبالتالي واحنا مستنين ونفضل على فيض الكريم، بعد ما مجموعتين عدوا مننا، والمجموعات صعبة جدا جدا، وهننتظر ماتشات اليوم الأخير بس أنا عايز أعرف ليه بنحط نفسنا في هذا الموقف؟! وأنا شايف أن الدنيا بقت صعبة والولاد دول صعبانين عليا لأنهم انظلموا بما يكفي وأرجو الدنيا تمشي ونقعد نفهم الدنيا عاملة ازاي».