«مش هتفوقوا إلا على كارثة».. شوبير يهاجم رابطة الأندية المصرية

شن الإعلامي أحمد شوبير، حارس مرمى الأهلي ومنتخب مصر السابق، هجوما عنيفا على مسؤولي رابطة الأندية المصرية بسبب إقامة المباريات في الرابعة عصرًا لعدد كبير من الأندية في مسابقة الدوري المصري الممتاز.
وقال أحمد شوبير في تصريحات إذاعية اليوم الثلاثاء: «يا جماعة احنا اللي بينزل الشارع الساعة 4 أو 5 بيطلع يجري على البيت الدنيا نار الله الموقدة وموجة حارة مستمرة لمدة أسبوع، وييجي الناس المسؤولين عن المسابقة الله يباركلهم عندهم بصراحة ضمير وإحساس ومسؤولية وحاسين بالناس جدا فعملوا المباريات مشكورين الساعة 4!».
اقرأ أيضًا: كولر يجري تغييرين على تشكيل الأهلي أمام الترجي.. شوبير يكشف التفاصيل
وأوضح شوبير: «الساعة 4 وعايز تتفرج على كورة وعايز تتفرج على لاعيبة بتجري ازاي طب أنا أراهن لو فيه مباراة للأهلي أو الزمالك اتعملت الساعة 4 انتوا مستنيين لاعيب يجيله ضربة شمس ولا يموت ويقع مننا في الملعب».
وأضاف شوبير: «موضوع أحمد رفعت في وقتها كله سخن، وأراهنكم لو فيه حاجة اتغيرت في الماتشات وكابتن أدهم السلحدار وقع في مباراة درجة ثانية وتوفاه الله ولولا وجود المستشفى بجوار استاد الإسكندرية والتحركات الجادة والسريعة وقتها لما كان نجا أحمد رفعت».
وتابع شوبير: «المرة دي إحنا بفعل فاعل عايزين نعمل كارثة، هو انتوا عايزين إيه عايزين تخلصوا على اللاعيبة واحد واحد دي المباريات امبارح سيئة جدا وكلها تعادل سلبي ومباراة 1-1 من ركلتين جزاء، دي البلد مش مقصرة في حاجة بنية تحتية قوية وملاعب كتير عايز تلعب في أي مكان روح، ولا هما دول عشان أندية غلابة بتلاعبهم الساعة 4، إزاي الداخلية يلاعب البلدية النهارده الساعة 4 حضرتك قولي بس عرفني هو الجو في المحلة مثلا زي ما نكون بنلعب في باريس ولا موناكو».
وأردف شوبير: «هو إحنا بنطلب طلب صعب ولا حاجة، وإزاي عايز جمهور يروحلك الساعة 4 ده لما لاعبيتنا بيروحوا يلعبوا في افريقيا بنقول ربنا يستر ويعينهم، ما تقولوا لنا عايزين إيه..؟ هو احنا عاملين تفرقة بين الأهلي والزمالك وباقي الأندية ليه، هما دول عشان عندهم جماهير وإعلام ووسائل ضغط تقول أبعد عن الدوشة يا عم مليش دعوة، ليه يعني كل الفرق سواسية وكل الفرق اللي مبيلعبش على بطولة بيلعب عشان يقعد في الدوري أو يروح بطولة أفريقية أو عربية».
واختتم شوبير: «ما يحدث غير مقبول وغير معقول انتوا متعمدين ومش هتفوقوا إلا على كارثة ولو حصلت محدش هيسيبكم».