معركتك خسرانة.. كريم العدل يوجه انتقادات حادة لمخرج فيلم «اختيار مريم»: انتحار فني كامل

شن المخرج كريم العدل هجومًا لاذعًا على مخرج فيلم «اختيار مريم» محمود يحيى، بعد الجدل الذي أثير حول احتجاجه واعتصامه بسبب عدم عرض الفيلم في سينما «زاوية».
وقال العدل في منشور له على حسابه الرسمي بموقع التواصل الاجتماعي «فيسبوك»: «يا أيها المخرج.. انا اسف اني اصدمك بالحقيقة اللي ممكن تضايقك بس انا عندي سؤال.. هل لو فيلمك اتعرض، وهشطح معاك بالخيال واقول انه عجب الناس جدا.. وهشطح معاك بالخيال اكتر واكتر اقول انه جاب فلوس كتير فشخ، بص، عمل اعلى ايراد في السوق السنة دي.. خيال يعني.. هل انت متخيل أن فيه منتج أو موزع أو دار عرض أو ممثل أو مدير تصوير أو أي كرو، ممكن يخاطر ويشتغل معاك بعد اللي انت عملته ده؟ ليه؟ هل انت فاهم أن الناس بتحب وجع الدماغ مثلا؟ هل انت عارف أن كله هيقول لك بناقص وأن الشاطرين على قفا من يشيل؟؟ هل فيه حد علمك انك تبقى مريح ده جزء من الشطارة؟ طب هل انت تعلم أن انت هتبقى بيُشار اليك للأبد ب«المخرج اللي عمل إضراب ده، فاكره؟»
وتابع: «الحقيقة أن إضرابك أو صيامك أو ايا كان هتسميه ايه ماكانش انتحار بدني قد ماهو انتحار فني كامل… وأنا دايمًا بقول لأي شاب مخرج صغير لسة بيبدأ choose your battles- اختار معاركك.. بس انت بقى اخترت معركة صغيرة قوي تكسبها بأى وسيلة كانت حتى لو بلوى الدراع.. بس ضحيت قصادها بمستقبل فني كامل.. فأصبحت معركة خسرانة».
واختتم المخرج كريم العدل رسالته للمخرج الشاب محمود يحيي: «انت كنت عدو نفسك الأول.. قبل مايكون أي دار عرض أو موزع عدوك».
الجدير بالذكر أن فيلم «اختيار مريم» للمخرج محمود يحيى أثار حالة جدل واسعة خلال الأيام الماضية بعد اعتصام المخرج أمام سينما «زاوية» احتجاجًا على رفض عرض فيلمه، وهو ما قوبل بتعاطف من البعض وانتقادات من آخرين.