«أنا فنان حر».. أمير عيد يكشف نصيحة والدته له ويعلق: «مش كيس شيبسي عشان أبيع أكتر» (فيديو)

قال الفنان أمير عيد إن الفنان الحقيقي يقاس بأعماله القيمة وليس بالمشاهدات أو قائمة الأكثر مشاهدة أو استماعا عبر مواقع التواصل الاجتماعي والمنصات الرقمية.
وأوضح «عيد»، خلال حفله في ختام مهرجان العلمين الجديدة في دورته الثالثة، مساء أمس الجمعة، أن «الناس بتتباهى بالفلوس وبالعربيات والساعة، افتكر مرة أمي قالتلي كلمة، عمرك ما هتبقى غني إلا لما يكون عندك حاجه الفلوس مبتشتريهاش».
واضاف: «دلوقتي السوشيال ميديا بتحسسنا اننا مش عايشين وبنشوف ناس عمله نفسها مبسوطين وفرحانين، دي مش ناس حقيقة، انت اللي ناس حقيقة، عشان مش محتاجين توري حاجة لحد».
وتابع: «عايز اقول وانا جي العلمين على الطريق ناس كتير قابلتني وطلعت التيكت من العربية وكان فيهم حماس شديد، الموضوع عمره ما كان بالعدد، الموضوع بالروح اللي هما بيدهولنا، حتى لو الحضور انهارده كان نص الناس أو عشر أشخاص بس كنت هعمل الحفلة وهكون فخور بده حقيقي».
واختتم: «المهم مش كام، المهم بالقيمة مش بالكم، انا بعمل أغاني بحبها مش عشان اكون براند أو سلعة، انا مش كيس شيبسي عشان ابيع اكتر حاجة، انا فنان حر والشي اللي بيحركني هو عقلي».
وأعرب أمير عيد عن سعادته الشديدة بجمهور حفله في ختام مهرجان العلمين الجديدة بدورته الثالثة، وحرص الآلاف من الجماهير على الحضور في عدد غير مسبوق من الشباب من مختلف الأعمار خلال فعاليات المهرجان.
وشهد الحفل غناء فريق كايروكي لأغنية «يا أبيض يا أسود» وسط تفاعل كبير من الحضور، إذ قال أمير عيد: «عايز أقولكم شكرا ليكم إنكم جيتوا، وبقولكم هنعمل حفلة عمركم ما هتنسوها.. يلا جاهزين».
وكان مطرب الراب «توليت» أحيا فقرته الأولى في حفل الختام، وسط حضور جماهيري غير مسبوق ضمن فعاليات المهرجان، حيث قدم أغنيته الشهيرة «لعبالي في دماغي» التي أشعلت حماس الجمهور بالرقص والتصفيق، ليعلق قائلًا: «بحبكم جدا».