«قبل ما أحمد سعد يطلع يغني حسيت إني مش قادرة أقف».. منة القيعي تكشف كواليس حفل زفافها

كشفت الشاعرة الغنائية منة عدلي القيعي عن كواليس مفاجئة من يوم زفافها على الفنان يوسف حشيش، مشيرة إلى أنها تعرضت لحالة شديدة من الإجهاد خلال الحفل بسبب كثرة الرقص والغناء، وهو ما تطلب تدخّل طبي سريع خلف الكواليس.
وقالت منة، خلال استضافتها مع زوجها في برنامج «معكم منى الشاذلي» عبر قناة ON: «من قبل الزفة وأنا تعبانة، ضربات قلبي كانت دايمًا فوق ال100، وكنا عاملين خطة إني أقعد كل ساعة ربع ساعة من غير ما حد يلاحظ، لكن بسبب الزحمة والفرحة ما لحقتش أرتاح، وفضلت أغني وأزغرد وأنسى نفسي».
وأضافت: «قبل ما أحمد سعد يطلع يغني، وقّفنا شوية علشان فرقته تجهز، وقتها حسيت إني مش قادرة أقف، قلت ليوسف أنا تعبانة، ودخلنا الباك ستيج، وبدأ الدكتور يدخل، وكان كل خوفي الناس تقول العروسة وقعت أو مفستكة، كنت عايزة اليوم يفضل حلو في نظر الكل».
وعن رد فعل الفنان أحمد سعد، قالت منة: «أحمد دخل الباك ستيج، وبهزار زعق وقال لي: إنت جاية عندي وتقعي؟ قومي!، وده كان أكتر حاجة كنت خايفة منها، إني أبان ضعيفة قدام الناس».