«مش على حساب الدولة».. شوبير يوجه رسالة لوزير الرياضة حول مؤازرة بيراميدز

وجه الإعلامي أحمد شوبير حارس مرمى الأهلي ومنتخب مصر السابق رسالة إلى وزير الشباب والرياضة الدكتور أشرف صبحي بخصوص مبادرته في الساعات الماضية لدعم بيراميدز في نهائي دوري أبطال أفريقيا أمام صن داونز.
وأعلن وزير الشباب والرياضة عن حشد 10 آلاف متفرج لتشجيع فريق بيراميدز في مباراة العودة بالقاهرة أمام بطل جنوب أفريقيا.
وقال أحمد شوبير: «بيراميدز هيلعب مع صن داونز وماتش العودة هنا وبإذن الله بتمنى من كل قلبي التوفيق لفريق بيراميز في مباراة الذهاب يوم السبت المقبل».
وتابع شوبير: «الوزير قال هنحشد ناس عشان يشجعوا بيراميدز، هيحشد إزاي هيكون من مراكز الشباب الموضوع مفيهوش مشكلة، والبعض غاضب جدا وقال للوزير أنت ما تحشدش على حساب الدولة، لأ مش هيبقى على حساب الدولة هيبقى على حساب بيراميدز وده اللي بطلبه من الدكتور أشرف صبحي، هو هيقول لهم أنا هجيب لكم ناس بس، حضراتكم كنادي بيراميدز هتتكفلوا بالمصاريف والتذاكر والانتقالات والوجبات والحاجات دي كلها، فلا غبار على ما يفكر به الوزير وده دور دولة».
وأوضح شوبير: «هنا الأزمة السؤال هل الناس دي هتروح تشجع، ما هو أصل جماهير الكورة له طبيعة خاصة أنا عايز الناس تروح تشجع من قلبها أنا مش أحط ناس في المدرجات قاعدة ملهاش لازمة لكن قصة أقعد ناس في المدرجات فقط للمنظر، زي فيلم عادل إمام المنسي لما مع محمد هنيدي قال يا كابتن الفيلم ده قصة ولا مناظر إحنا مش عايزين الموضوع يبقى قصة ولا مناظر عايزين الموضوع يبقى مشجعين بجد ولو 5 آلاف بس».
وأضاف شوبير: «الناس اللي عمالة تهاجم الوزير أنا شايف الوزير قام بدوره حاجة متزعلش يعني، يرجع يقولوا طيب مبيعملش كده ليه مع الأهلي والزمالك، الأهلي مش محتاج والزمالك مش محتاج، فالمهم يعني المضمون مش الشكل والمهم إن بيراميدز يكسب ويفوز بالبطولة».