«ولا تكتموا الشهادة».. رانيا فريد شوقي تعلق على خلاف بوسي شلبي وأبناء محمود عبد العزيز

علقت الفنانة رانيا فريد شوقي، على الجدل الدائر مؤخرًا حول أزمة الإعلامية بوسي شلبي قائلة: «في حاجات صعب تتقال، بس الأصعب إننا نسكت عنها».
وأضافت الفنانة عبر حسابها الرسمي على موقع التواصل الاجتماعي «فيس بوك» قائلة: «في حاجات صعب تتقال، بس الأصعب إننا نسكت عنها، لما تكون ست محترمة، عاشرت راجل بكل إخلاص لأكتر من 20 سنة، في النور، والناس كلها كانت شاهدة، وفجأة يتقال إنها ما كانتش زوجته؟ ده مش بس ظلم، ده طمس للحق، وتجريح في سيدة كانت زوجة بكل معنى الكلمة، في العِشرة، في الستر، في الوفاء».
وتابعت الفنانة رانيا فريد شوقي: «وإزاي ننسى وقفتها جنبه في اضعف لحظاته؟ في مرضه و كانت معاه في المستشفى، مقيمه و بترعاه بكل الحب و الموده و الخوف عليه كانت السند، والونس، والحياة اللي عاشها باختياره، مش غصب عنه».
واستكملت الفنانة: «والمؤلم أكتر إن اللي بيحصل دلوقتي ضد رغبته هو، الراجل اللي عاش معاها ومكانش يوم اعترض أو أنكرها. فلو كانت فعلاً مش زوجته، ليه عاش معاها قدام الكل؟ وليه سكتوا كل السنين دي؟ ليه الكلام بدأ بس بعد ما رحل؟ هل الإنصاف بيتأجل لحد ما صاحبه ما يقدرش يدافع عن نفسه؟ واللي مؤلم بجد، إن في الكلام ده إساءة لجميع الأطراف».
وأشارت الفنانة رانيا فريد شوقي قائلة: «اللي بيحصل مش مجرد خلاف، ده جرح في ضمير كل حد بيعرف الحقيقة، وبيداريها. كل الدعم لصاحبتي، الست الأصيلة اللي عاشت في النور، واتبنت حياة على الاحترام، واللي بتدفع النهاردة تمن وفائها، الحق عمره ما يضيع، حتى لو اتأخر، والناس اللي عندها ضمير هتعرف تميّز».
كما طالبت الفنانة قائلة: «وياريت اللجان الالكترونيه تهدي شوية لأنها بقت مفقوسة، وأتمني النقاش يكون بأحترام الطرفين، والضمير بيقول إن إي حد يكتب حاجة يجنب مشاعره ويقول كلمة الحق و كما تدين تدان خليها قاعدة في حياتكم، ربنا يظهر الحق، ويدّي لكل واحد على قد نيّته».
واختتمت الفنانة رانيا فريد شوقي، حديثها بآية قرآنية قائلة: «وَلَا تَكْتُمُوا الشَّهَادَةَ ۚ وَمَن يَكْتُمْهَا فَإِنَّهُ آثِمٌ قَلْبُهُ»، «بَلْ نَقْذِفُ بِالْحَقِّ عَلَى الْبَاطِلِ فَيَدْمَغُهُ فَإِذَا هُوَ زَاهِقٌ»
صدق الله العظيم».
اقرأ أيضا:
مفيدة شيحة: «حضرت عزاء محمود عبدالعزيز في منزله.. واستقبلتنا زوجته بوسي شلبي»