«اشكروا الدولة الأول».. وزير الصحة ردًا على شكوي مرضي الغسيل الكلوي بالمنيا: هنعمل عندكم حاجة مش موجودة في أي محافظة

طالب الدكتور خالد عبدالغفار، نائب رئيس مجلس الوزراء وزير الصحة والسكان، عددًا من مرضي الغسيل الكلوي بمستشفي العدوة بمحافظة المنيا بتوجيه الشكر للحكومة على ما قدمته من خدمة طبية وصفها بأنها «لم تحدث في أى محافظة أخرى» ، جاء ذلك ردًا على شكوى أحد المرضي من الانتظار فترات طويلة قبل موعد الغسيل الكلوي وسوء معاملة الأمن.
وكان عدد من المرضى المنتظرين أمام غرفة الغسيل الكلوي بالمستشفي استوقفوا الوزير وعرض أحدهم مشكلتهم قائلًا:« نفسنا بس ميتعاملوش معنا على اننا تلاميذ ابتدائي»، فرد الوزير: «لأ انت في ثانوي بس ايه اللى مزعلك؟» فتابع المريض شكواه قائلًا: «الأمن بيتعامل معانا وحش وبيمنعنا نشرب أو ناخد أى حاجة وبنتأخر قبل موعد الغسيل وبنوقف هنا بالساعات».
فرد الوزير قائلًا :«لا هنا المكان جديد وله نظام جديد ولازم نلتزم به علشان مصلحتكم أولا وعلشان نحافظ عليه، بس أنا مستغرب منكم يعنى الدولة عملت لكم المكان الجميل ده، على حساب الدولة، واللى مافيش زيه في أي محافظة ثانية، ومسمعتش حد قال شكرًا للدولة على مجهودها ده».
وأضاف:«يعني لو حد في أهل بيتك كل مايشوفك يقولك مشكلة ففي الأول يا أخى قول متشكرين على المبني الجميل والأجهزة الجديدة اللى جبتوها لنا بس عندنا بعض الطلبات» .
وتابع: «الصعايدة مش بيفوتهم الأصول دى احنا هنا جايين نعمل حاجة مش موجودة في أى محافظة في مصر».
ووجه أحد المرضي بالأقسام الداخلية في مستشفي العدوة شكوى أخرى للوزير قائلا: «مش بيبقي موجود في القسم غير 2 تمريض ولا يكفي خدمة المرضي وممكن ننتظر بالساعات للحصول على الخدمة الطبية »وأشار المريض إلى تواجد عدد كبير من الأطباء والتمريض خلال زيارة الوزير وقال: « أول مرة نشوف المنظر ده علشان حضرتك موجود»، فرد عليه الوزير: «يعنى علشان في زيارة جابوا الناس دى كلها دى ملاحظة مهمة وهنشوفها حاضر».
جاء ذلك خلال جولة تفقدية لوزير الصحة بمحافظة المنيا تضمنت عددًا من المستشفيات والمراكز الطبية وأعلن خلالها الانتهاء من استعدادات المرحلة الثانية لتطبيق منظومة التأمين الصحي الجديد، خلال الفترة المقبلة، داخل 5 محافظات علي مستوي الجمهورية، بتكلفة 68 مليار جنيه، لتقديم خدمة صحية ذات جودة عالية، طبقًا لما نص علية الدستور المصري، بالتعاون مع الجامعات المصرية.