سلوى عثمان عن محمد سامي: «ربنا يديمه علينا نعمة»

تحدثت الفنانة سلوى عثمان عن المخرج محمد سامي، بعد قرار اعتزاله الدراما التلفزيونية، ومشاركتها معه في مسلسل «سيد الناس»، مؤكدة أنه مخرج موهوب ويحب عمله.
وقالت سلوى عثمان خلال تصريحات تلفزيونية عبر «قناة صدى البلد»: «ربنا يديمه علينا نعمة، لأنه مخرج شاطر وجميل جدا وفاهم هو بيعمل إيه ربنا يحفظه.. شخصية على الحقيقة جميلة وبيعشق الممثل وبيوجهه عشان يبقى أحلى واحد في الدنيا، هو بيحب شغله وبيحب الممثل بتاعه فهو حتى على الحقيقة شخصية خيرة ومشوفتش منه غير كل خير».
View this post on Instagram
A post shared by Elbalad TV صدى البلد (@baladtv)
وكان المخرج محمد سامي قد أعلن اعتزاله قبل يومين، ونشر «سامي» منشورًا على صفحته الرسمية على «فيسبوك»، صباح الخميس، عنونه ب«وداعا الدراما التلفزيونية»، موضحًا أن «سيد الناس» و«إش إش»، هما آخر أعماله الدرامية في التليفزيون.
وقال في نص منشوره: «السنة دي كانت آخر أعمالي التلفزيونية، واللي فيها بودع المسلسلات، رحلة طويلة حولي 15 سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير ومع شركات وقنوات كلها مهمة، وكان دايما الجمهور بيشجعني، سواء بردود الأفعال أو بتصويته ليا في الجوائز».
وتابع سامي قوله: «أي نجاح حققته كان بفضل ربنا والجمهور، يمكن المقربين ليا عارفين إني واخد القرار ده من فترة وهو اعتزال الإخراج التلفزيوني، ولكن كنت بنتهي من التزامات موقعة مع شركات ونجوم والحمد لله انتهيت منها وكان آخرها 2025».
وواصل: «معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي، ومن الوقوع في فخ التكرار ودائرة المتوقع والملل، والوحيد القادر على الدوام هو الله وحده».
واستكمل: «الحمد لله، آخر عملين ليا «إش إش» و«سيد الناس» حققوا نجاح أنا سعيد بيه، كل يوم بلدي العظيمة مصر بتطلع صناع جداد موهوبين ومثقفين ويقدروا يقدموا أفضل من اللي قبلهم، وهنفضل طول الوقت بنقدم أعمال مصرية يلتف حولها الجمهور العربي».
وأضاف: «بشكر كل حد ساعدني في الرحلة وبشكر كل زميل منافسته كانت دافع للتميز، بعتذر عن أي مشهد قدمته أثناء الرحلة ولم يلقَ استحسان الجمهور أو إعجابهم، في الآخر الفنان دايما بيجرب والفنون جنون زي ما بيقولوا.
ودعا «سامي» الجمهورة للدعاء له بالتوفيق، وقال: «ادعولي الفترة الجاية عندي سفر خارج مصر لمدة عامين، بتعلم فيهم حاجة جديدة بدرسها، حاجة كان نفسي أتعلمها من زمان وأجلتها كتير لحد ما لقيت نفسي بكبر وخايف يفوت العمر قبل ما أعمل حاجة نفسي فيها، مقتنع إن الشخص يقدر في أي وقت يقرر يوقف حاجة بيحبها علشان يعمل حاجة تانية بيحبها برضه، وعايز يجربها بس محتاج عيلة تسانده على اتخاذ قراره».
واختتم: «كل التوفيق لكل زمايلي، وبحبكم وبشكركم على سنين المنافسة الجميلة اللي عملت أسمائنا كلنا وأتمنى لنفسي التوفيق في الخطوة الجديدة».
اقرأ أيضًا:
فريدة سيف النصر تدافع عن محمد سامي بعد اعتزاله: «هي خناقة مدرسة؟!»