«أحرج إدارة الأهلي».. تعليق ناري من حازم إمام على احتفال إمام عاشور ب «البالونة»

انتقد حازم إمام نجم الزمالك ومنتخب مصر السابق، احتفال إمام عاشور لاعب خط وسط الفريق الأول لكرة القدم بالنادي الأهلي ب «بالبالونة» عقب تسجيله هدف في مباراة سموحة في الدوري المصري.
وقال حازم إمام في تصريحات عبر قناة «أون تايم سبورت»: «موضوع احتفال إمام عاشور بالبالونة مستفز، وبشوف إن هو أكتر واحد هيخسر، وبيحط ضغط على نفسه ومش ذكي».
وأضاف نجم الزمالك السابق: «إمام عاشور لاعب كويس جدًا لكن مش ذكي ودايمًا بيحط نفسه تحت الضغوط، ودي أصعب حاجة على لاعب الكرة».
وتابع: «الزمالك كان من أسباب شهرة إمام ومعملش فيه حاجة وحشة ولو فكر 1% مكنش عمل كده، لكن أكيد هو لم يفكر في الأمر وإن هيحصل مشكلة (عدت عليه)».
وواصل: «إمام عاشور لو كان رايح الأهلي من حرس الحدود أو المحلة مكنش هيبقى بالنجومية الحالية، ولكن الزمالك السبب في نجوميته».
وأكمل: «عبدالله السعيد مثلا كان جمهور الأهلي غاضب منه جدًا ولكن الناس بتحترمه دلوقتي، لأنه مش بيستفز حد، وعلشان كده بيلعب لحد دلوقتي».
وأتم: «إمام عاشور بيحرج إدارة الأهلي وكابتن محمود الخطيب، من تصرفاته لأن الأهلي مش بتاع الحاجات دي، ومبيعجبهوش الكلام ده».