«طلاق حسام حبيب وخناقة روتانا وابتزاز ابنتها» الأزمات تلاحق شيرين عبدالوهاب (تقرير)

شيرين عبدالوهاب اسم كبير في عالم الغناء، ولا نبالغ إن قلنا أنها من أهم المواهب الغنائية في مصر، ارتبط اسمها بالغناء وبالأزمات للأسف الشديد سواء تسببت فيها أو ارتبط اسمها واسم عائلتها بها.
في السطور التالية سنستعرض آخر ثلاث أزمات تعرضت لها شيرين عبدالوهاب خلال الفترة الأخيرة بداية من طلاقها من حسام حبيب حتى حبس المتهم بابتزاز ابنتها.
تبادل الاتهامات والتصريحات بين شيرين عبدالوهاب وحسام حبيب
شيرين عبدالوهاب كشف هذه المرة، عن كواليس الانفصال وفترة زواجها من حسام حبيب، إذ أن الانفصال تم بهدوء، واتفق الطرفان أن هذا الحل هو الأفضل لهما، إلا أنهما تبادلا الاتهامات حتى هذه اللحظة.
وبدأت حرب التصريحات والاتهامات هذه المرة عندما خرجت شيرين، منذ شهور لتطمئن جمهورها ومحبيها على حالتها الصحية بعد أزمتها الأخيرة مع حبيب التي اتهمته فيها بالتعدي عليها بالضرب وإحداث إصابات كبيرة بها وانتهاء الأزمة بالصلح في النيابة.
وأرسلت شيرين برسالة صوتية إلى جمهورها، وذلك عبر حسابها الرسمي بمنصة «إكس»، وقالت :«جمهوري الغالي، عيلتي الكبيرة اللي عايشة بحبهم ليا ربنا يديكم نعمه في حياتي، وحشتوني أوي».
كما أكدت شيرين في تصريحات تهديد حسام حبيب بابنتها، كما كشفت عن توليها مصاريفه الخاصة خلال فترة زواجهم، كما تم سرقتها منه من خلال حسابتها البنكية، مؤكدة أنه السبب في تأخيرها وإحباطها في تقديم أعمال غنائية جديدة.
حسام حبيب يهدد ب«حبس» شيرين
رد حبيب على اتهامات شيرين له بسرقتها. وقال حبيب في تصريحات صحفية ل «ET بالعربي»: «أنا حزين من اللي بيحصل ومش عارف أقول إيه للناس طبعا الناس عندها حق تزهق والله ده ما أنا ولا دي شيرين التصرفات دي بريء منها تماما أنا مستغرب اللي بيحصل أكتر منكم ممكن يكون ده حصل عشان خاطر هي بتحاول تتصل بيا بقالها يومين تلاتة وأنا رفضت أرد عليها تماما وقولت المرة دي مش هينفع أسامح زي كل مرة».
وأضاف: «كل اللي قالت اتهامات شيرين كاذبة يحاسب عليها القانون، الورقة اللي شيرين بتقول بيها إنها حولت ليا مبلغ مالي، مكتوب فيه غرض التحويل لزوج، فأول حاجة كدا هو أنا زوجها، ثانيا حتى لو كنت الزوج وهي بتدلعني بالمبلغ دا إزاي تخرج تقول أني عايز أموتها، يا هي بتكدب لما قالت إننا اطلقنا يا هي بتكدب على البنك وقالت إني زوجها وحولتلي».
وأشار: «شيرين عبدالوهاب دمها بقى تقيل والمرة دي بجد هحبسها، وهي خرجت النهاردة وقالت الكلام دا لأنها عمال تتصل بيا لحد إمبارح بليل عشان نرجع لبعض، وأنا مبردش عليها، عشان أنا رافض نرجع تاني بعد كل اللي حصل آخر مرة لما الأمر وصل للنيابة والحوار كبر، وفي الآخر عشان أنا زهقت عملتلها بلوك».
«فيه مؤامرة عليا وهنزل الأغاني على البوتاجاز».. ماذا قالت شيرين عبدالوهاب مع عمرو أديب؟
أزمة كبيرة بين الفنانة شيرين عبدالوهاب، وشركة روتانا، امتدت طوال الشهور الماضية، واشتعلت أكثر مع مداخلة الفنانة شيرين عبدالوهاب مع الإعلامي عمرو أديب في برنامج الحكاية، وبالطبع جاءت مداخلة الفنانة شيرين عبدالوهاب عاصفة مدوية تحمل الكثير من الكواليس.
في السطور التالية نرصد أبرز ما قالته شيرين عبدالوهاب في مداخلتها مع الإعلامي عمرو أديب
شيرين عبدالوهاب تنفعل على الهواء: «تاخدو كام وتحلو عني»؟
تحدثت الفنانة شيرين عبدالوهاب عن أزمتها مع شركة روتانا، والتى أثارت ضجة خلال الأيام الماضية، وذلك بعدما قامت الشركة بحذف 4 أغاني للفنانة مؤخرًا.
وانفعلت شيرين عبدالوهاب على الهواء أثناء حديثها عن الشرط الجزائي والتعويضات للشركة خلال مداخلة هاتفية ببرنامج «الحكاية» مع عمرو أديب قائلة: «شغلي مش هدية لحد ده رزقي ورزق عيالي، مش كفاية واخدين منى 8 مليون جنيه بالغلط، دي فلوس عيالي يافندم».
وأضافت: «آخر تليفون حصل بينى آنا وتوني سمعان، لما يئست من الدنيا واللى فيها، وكلمته قولتله قول للأستاذ سالم ياخد كام ويحل عنى وترد عليا خلال 24 ساعة، رجع برد يحرق الدم ومتفقين عليا، قالي استاذ سالم بيقولك عايزين الشرط الجزائي وتعويض، ونولت الأغاني ومش هتكلم عنها».
«هنزل الأغاني على البوتاجاز».. لماذا ترفض شيرين عبدالوهاب التصالح مع روتانا؟
قالت الفنانة شيرين عبدالوهاب إنها لم تتصالح مع شركة روتانا، حيث أعربت عن استيائها الشديد من التعامل مع الشركة، وما حدث لها خلال الفترة الماضية، وحذفت أغانيها من المنصات بشكل متعمد.
وأضافت خلال المداخلة الهاتفية مع عمرو أديب قائلة: «تواصلت مع توني سمعان موزع روتانا، وطلبت منه أن يأخذ منها الأغاني، ولكن رفضوا استلام الأغاني».. «مش عايزين يستلمو الأغاني، عايزين شيرين عبدالوهاب حصري، مهما روتانا عملت هنزل الأغاني على البوتاجاز، والنجاح اللى أنا فيه دلوقتى الفضل فيه يعود للناس».
شيرين عبدالوهاب: «روتانا عايزة شيرين عبدالوهاب حصري في الحفلات»
كشفت الفنانة شيرين عبدالوهاب تفاصيل وكواليس أزمتها مع شركة روتانا.
وقالت في مداخلتها مع الإعلامي عمرو أديب في برنامج الحكاية: «روتانا عايزة شيرين عبدالوهاب حصري بالحفلات».
وتابعت: «الفلوس اللي هما دافعينها لي، أنا باخدهم في حفلة، عشان كده هما عايزين شيرين حصري لحفلات اللايف».
وأوضحت: «الأغاني كانت جاهزة وخلصانة مسلموهاش ليه، قسما بالله أن روتانا امتنعت عن استلام الأغاني، عشان عايزين شيرين حصري في الحفلات وده مكنش اتفاقنا يا أفندم».
شيرين عبدالوهاب: «فيه مؤامرة معمولة عليا عشان أقعد في البيت»
كشفت الفنانة شيرين عبدالوهاب كواليس أزمتها مع شركة روتانا
وقالت في مداخلتها مع الإعلامي عمرو أديب في برنامج الحكاية: «فيه مؤامرة عليا عشان أقعد في البيت، وصوتي مش هينقطع أبدا».
وتابعت: «هفضل أغني وهفضل راكبة القطر بتاعي، ومفيش حد هيقدر يوقفه، أنا سكت كتير».
وأوضحت: «بناقش القضاء المصري زي ما اتحكم لهم بالغلط أنهم ياخدوا مني 8 مليون جنيه لكن مش مشكلة أنا فلوسي كتيرة».
وتابعت: «بناشد القضاء المصري أن القضايا اللي رفعاها يتحكم فيها بسرعة».
شيرين عبدالوهاب: «أنا فلة شمعة منورة»
كشفت الفنانة شيرين عبدالوهاب كواليس أزمتها مع شركة روتانا
وقالت في مداخلتها مع الإعلامي عمرو أديب في برنامج الحكاية: «أنا فلة شمعة منورة، واللي مشيني ومنجحني هو ربنا، ومش محتاجة شركات».
وأردفت: «ربنا يخلي جمهوري ليا اللي بيعمل كل ده ليا، من غير شركات، أنا مش هبقى حصري لحد تاني».
واستطردت: «دفعت لنصر محروس من 15 سنة 3 ونص مليون جنيه دفعتهم شرط جزائي ومشيت، والكل يلزم حده ومحدش يجيب سيرتي».
شيرين عبدالوهاب ل عمرو أديب: «أنا نفسي أجرب سجن النساء»
كشفت الفنانة شيرين عبدالوهاب تفاصيل وكواليس خلافها مع شركة روتانا.
وقالت في نهاية مداخلتها مع الإعلامي عمرو أديب في برنامج الحكاية: «جمهوري كبير أوي أوي، وهو اللي هيوقف لهم، وكل الناس اللي تكلموا مبصوش في ورقة».
وتابعت: «يا ريت تخليني أقفل، عشان مش عايزة أقول حاجة تخليهم يمسكوا عليا حاجة، وأنا سجن النساء وحشني جدا، ونفسي أجرب تجربة سجن النساء دي».
ليرد عليها الإعلامي عمرو أديب قائلا: «هو أنتي ناقصة يا بنتي، سجن إيه يا شيرين، ليه ده كله؟ أنتي ممكن تبقى ملكة زمانك وتعملي فلوس قد كده».
عمرو أديب لشيرين عبدالوهاب: «سجن إيه يا بنتي ...هو أنتي ناقصة»
وجه الإعلامي عمرو أديب رسالة للفنانة شيرين عبدالوهاب بعد حديثها عن أمنيتها في زيارة سجن النساء بعد خلافها الأخير مع روتانا.
وقال في برنامجه الحكاية: «سجن إيه يا بنتي، هو أنتي عايزة على طول يبقى فيه مصايب، انبسطي أنتي لسه صغيرة».
وتابع: «أنتي تعبتي كتير، من حقك تنبسطي بشبابك وبفنك وبأولادك».
وأوضح: «موضوعك مش هيخلص غير قانوني، وشيل ده من ده يرتاح ده عنده».
هددها بنشر فيديوهات وحبس 3 سنوات.. القصة الكاملة ل ابتزاز ابنة شيرين عبدالوهاب
حالة من الجدل حدثت على مواقع التواصل الاجتماعى خلال الأيام الماضية، بسبب الابنة الكبرى ل شيرين عبدالوهاب بعد انتشار تفاصيل تهديدها وابتزازها من شاب طلب منها 100 ألف جنيه مقابل عدم نشر صور وفيديوهات لها، وتعود القصة لعام 2023.
والد ابنة شيرين عبدالوهاب يقدم بلاغًا
قدم الموزع الموسيقي محمد مصطفى زوج المطربة شيرين عبدالوهاب السابق ووالد هنا الابنة الكبرى ل شيرين، بلاغًا في عام 2023 ل مباحث الإنترنت في العباسية بتعرض ابنته «هنا»، البالغة من العمر 12 عاما للابتزاز والتهديد من قبل حساب مجهول عبر منصة «تيك توك».
تصريحات والد ابنة شيرين عبدالوهاب
وأكد الأب في تصريحات خاصة ل «المصري اليوم» أن المدرسة التي تدرس بها ابنته هي التي استدعته وأخبرته بحالة ابنته النفسية وتعرضها للتهديد والابتزاز، وأن مباحث الإنترنت تمكنت من الوصول لمرتكب الواقعة وهو مقيم بمدينة المنصورة.
وقال والد ابنة شيرين: «اللي حصل إن المدرسة اللي فيها البنت بلغتني إنها حالتها سيئة وإن جالها تهديدات على موبيلها على حساب تيك توك، ولما رحت المدرسة شرحولي الوضع بالتفصيل وأن حالة البنت صعبة وأذيت نفسها وأنها بتفكر في الانتحار بسبب ضغطها النفسي من الموضوع، والمدرسة تفهمت الموضوع وجابت خبير نفسي للبنت وشرحت الحالة لي بالتفصيل أن بيجيلها رسائل ابتزاز مقابل مبلغ مالي بسبب صور لها وهي طفلة، والكلام ده اتعرف بسبب إن البنت حكت لواحدة صاحبتها قريبة لها والبنت دي راحت حكت الكلام ده للأخصائية اللي في المدرسة».
وأضاف: «والمدرسة بلغتني وشرحت لي الموقف وإن البنت خايفة جدًا وبناءً على كده توجهت إلى مباحث الإنترنت بالعباسية، وبلغت بالواقعة لاتخاذ الإجراءات القانونية اللازمة وحصلوا على أقوالي والصور من تفريغ المحادثات وقاموا بتفريغ هاتف الطفلة ابنتي، وعليه تم التواصل معي واستدعائي لجلسة تحقيق رفقة ابنتي بنيابة قسم أول المنصورة، وعليه حضرت ولكن تعذر حضور ابنتي لذات جلسة التحقيق رفقتي؛ نظرًا لإقامتها رفقة والدتها بمنزل آخر لانفصالي عن والدتها منذ حوالي عشر سنوات تقريبًا«.
حبس المتهم في ابتزاز ابنة شيرين عبدالوهاب
وقضت محكمة جنايات المنصورة بحبس المتهم بابتزاز ابنه شيرين عبدالوهاب، 3 سنوات، ومصادرة هاتفه ومسح الصور والفيديوهات موضوع الشكوى.