«موته عشان أحرق قلب أمه عليه».. ننشر نص التحقيقات في واقعة مقتل طفل على يد والده

حصلت «المصري اليوم» على نص التحقيقات بواقعة مقتل طفل يبلغ من العمر 10 سنوات، على يد والده ويعمل جزارا، انتقامًا من طليقته «والدة الطفل» بمركز المراغة شمال محافظة سوهاج، وكان ذلك على طريقة ريا وسكينة حيث أقبل الأب على خنق نجله ووضعه ببرميل بلاستيك ودفنه ومن ثم صب خرسانة عليه لإخفاء معالم جريمته وكتم الرائحة، وإليكم نص التحقيقات:
- ما تفصيلات اعترافك؟
اللي حصل إن في خلافات بيني وبين أم ابني عبدالمعز والخلافات ديت كانت خلافات زوجية وهي عصبية وأنا كمان عصبي ومديت أيدي عليها مرة واحدة وتعبت مني في الوقت ده وفضلنا متزوجين حوالي سنة ونص وخلفت منها ابني إبراهيم وبعد كده طلقتها واتجوزت غيرها وبعد ما أموت غيرها بحوالي 3 سنوات رجعت وقعدت معايا حوالي ست سنين وخلال فترة الجواز دي كان في مشاكل ما بينا باستمرار بسبب مراتي التانية وأنجبت منها في أول سنة ابني عبدالمعز.
- متى وأين حدث ذلك؟
الكلام ده حصل يوم 11/11/2023 حوالي الساعة الرابعة مساء في بيتي بقرية الأخيضر مركز المراغة بسوهاج.
- ومن كان برفقتك آنذاك؟
كنت لوحدي.
- وما هي طبيعة العلاقة فيما بينك والمجني عليه سالف الذكر وهل من صلة قرابة فيما بينكم؟
هو المتوفى إلى رحمة مولاه ابني ومكتوب على اسمي.
- وما هي بادرة لقائك بالمتوفى عبدالمعز؟
هو أنا شوفته عند الكوبري اللي قبلي البلد وكان ماشي على الطريق من الناحية التانية للترعة وأنا كنت في الناحية المقابلة ليه من الترعة.
- وهل من ثمة حوار بينك وبين المتوفي آنذاك؟
أيوه هو أنا ندهت عليه وقولتله تعالي ورايا على البيت عايزك عشان أديلك فلوس.
- وهل قمت باصطحابه آنذاك؟
لا أنا مشيت قدامه وهو لف من على الكوبري جه ورايا.
- وما الذي جعلك تقوم بإخباره بأنك تريد إعطاءه مبالغ مالية؟
هو أنا متعود إني بديله الشهرية بتاعته هو وأخوه إبراهيم كل شهر.
- وهل أتى ميعاد إعطائك للشهرية لنجليك آنذاك؟
أيوه هو كان فاضل عليها ثلاثة أيام تقريبًا وأنا قولت أديهم الشهرية بتاعتهم بدري.
- وهل أنت معتاد على إعطاء نجلك الصغير/عبدالمعز الشهرية الخاصة به وبشقيقه؟
أيوه هو في حكم النفقة، عبدالمعز وأخوه إبراهيم بمبلغ 700 جنيه ليهم هما الإتنين.
_ وهل من ثمة إيصالات تقوم بأخذها نظير تلك المبالغ المالية التي تقوم بالإنفاق بها على أبنائك؟
أيوه هي أم ولادي بتروح تمضي على الإيصالات عند المحامي.
_وهل قام نجلك المتوفي بتلبية رغبتك بالانتقال معك إلى منزلك آنذاك؟
ايوة هو جه بعد ما دخلت البيت بحوالي دقيقتين أو ثلاثة تقريبًا.
_ وهل من ثمة شاهد أبصرك حال طلب نجلك بالذهاب معه إلى منزلك آنذاك؟
لا هو انا مشوفتش حد ساعتها.
_ ولما لم تقم بانتظار نجلك المتوفي لمرافقته إلى المنزل؟
معرفش أنا مفكرتش في كده واللي حصل أنا قولت عليه.
_ وما الذي قمت به حال وصولك لمنزلك آنذاك؟
هو انا كنت قاعد مستني ابني عبدالمعز عشان اديله الشهرية بتاعته هو واخوه.
_ وهل من أمر آخر كنت تريده من نجلك المتوفي غير إعطائه المبالغ المالية؟
لا.
_ ولما لم تقم بإعطاء نجلك تلك المبالغ المالية حال رؤيتك له لأول وهلة؟
هو مكنش فيه سعتها فلوس في جيبي تكفي.
_ وما الذي حدث عقب ذلك؟
هو ابني عبدالمعز جه ورايا البيت ودخل فأنا سألته ومسكته من خده وبقوله انت بتحبني يا عبدالمعز فرد عليا وقالي آمال لأ.
_ هل من مشادات حدثت بينك وبين نجلك المتوفي؟
لا هو مفيش غير كده.
_ وما الذي بدر منك آنذاك؟
هو أنا في الوقت ده مدرتش بنفسي غير وأنا بقول لأبني/ عبدالمعز طيب أنا هكتفلك أيديك فهو قالي ماشي وبعدين أنا جبت حبل كان جنبي وكتفت أيديه الاتنين وبعدين جبت حبل تاني وقمت خانقه في رقبته من ورا.
_ وما الذي دعاك آنذاك للقيام بخنق نجلك آنذاك؟
هو أنا في الوقت ده افتكرت كل الكلام اللي كان بيقولهولي اخوه ابراهيم واللي أعرفه عن امه ومدرتش بنفسي غير وأنا بخنق في ابني.
_ ولما لم تقم بمحاولة الانتقام مع والدة نجلك المتوفي؟
هو أنا حاولت اني اموتها وفكرت في الموضوع ده أنا كنت براجع نفسي وفي مرة أنا حطيت سم في الأكل اللي كنت ببعته ليهم بس هو محدش أكل منه عشان أنا كلمتها في التليفون وقولتلها هاتوا حاجتي محدش يأكل منه وراحت بعتت ليا الأكل وأنا مسكته رميته في الترعة.
_ لم يقم نجلك بمحاولة الدفاع عن نفسه حال قيامك بخنقه آنذاك؟
لا.
_ وما الذي حال دون مقاومة نجلك المتوفي آنذاك؟
معرفش بس هو طفل ومش هيقدر يدافع عن نفسه أو يقاومني وكمان هو ممكن ميكنش مصدق أني هموته.
_ وما هي الأفعال المادية التي قمت بها حال ارتكابك لواقعة خنق نجلك المتوفي إلى رحمة مولاه آنذاك؟
هو أنا قمت بتكتيف ايدين ابني/ عبدالمعز من ورا بحبل طوله حوالي متر تقريبًا وبعدين قمت باتيان حبل آخر وقمت بإمساكه بإيديه الاتنين وقمت بوضعه على رقبة ابني من الأمام وشديت الحبل للخلف وأنا كنت واقف وراه وبعد حوالي ثلاث أو أربع دقايق لقيت جسم ابني ساب وزي ميكون مفيهوش نفس فأنا قمت سبت الحبل من أيدي وقمت نومته على الكنبة اللي جنبي في مدخل الصالة وبعدين قعدت أفوق فيه بس هو مكانش فيه النفس وبعدين قمت جايب برميل بلاستيك وكان فيه في البيت حفرة في الأوضة اللي في مدخل البيت وقمت بوضع البرميل في الحفرة وبعدين قمت شايل ابني عبدالمعز وقمت بوضعه في البرميل وهو قاعد على قرفيصه وكانت رأسه مايلة للقدام ومسنودة على البرميل من جوة وايديه مكتفة من ورا وبعدين قمت جايب الشبشب اللي كان لابسه وحطيته في البرميل فوق ابني وبعدين جبت غطاء البرميل البلاستيك وغطيت البرميل وبعدين قمت جايب شوية ظلط من قدام البيت ودخلت بيهم وكان فيه في الصالة شوية رملة وأسمنت فقمت مخلطهم بالمية والكريك وبعدين قمت عبيت المونة والخرسانة اللي عملتها بالجردل وروحت صبيت فوق البرميل اللي دفنت ابني فيه وبعدين قمت جايب لوحين خشب كبار وقمت بوضعهم على مكان الحفرة والخرسانة وبعدين قمت جايب نيش قديم وقمت واضعه على الألواح وبعدين قمت جايب شيكارة كيماوي ووضعتها بجوارهم عشان محدش يعرف باللي انا عملته.
_ ولما قمت بصب مكان إخفاء الجثة آنذاك؟
عشان محدش يعرف المكان اللي حطيت فيه الجثة.
_ وما الذي قمت به عقب إخفائك جثة نجلك؟
قمت بالاستحمام وبعدين جه ابني رياض من طليقتي الثانية وخبط عليا وطلب مني اني اروح معاه إلى مركز المراغة لتصويره للتقديم للمدرسة وروحت معاه وبعدين رجعت على الأخيضر بعد المغرب تقريبًا بعدين اتصلوا بيا وقالولي أن ابنك متغيب وانا روحت على المباحث علشان اعمل بلاغ وهناك قالولي تعالي بكرة فانا اخدت بعضي وروحت على البيت وبعدين على الساعة 2 صباحًا روحت على القهوة وهناك كان موجود يحيي اخو طليقتي وشدينا مع بعض وروحت على البيت وعلى الساعة 9 صباحًا سافرت على اسكندرية وبعدها دمياط وبعدين الأميرة وبعدين الدقهلية وبعدين طنطا وبعدين بني سويف وبعدين روحت مركز الفشن وبعدين روحت مغاغة وبعدين روحت المنيا وبعدين روحت على أسيوط وبعدين روحت على طهطا ومن هناك اخدت توكتوك وطلعت بيه على مركز شرطة المراغة وهناك حكيت ليهم على كل اللي حصل.
_ وما هي الأدوات وطبيعتها التي استخدمتها في ارتكاب الواقعة آنذاك؟
هو أنا استخدمت في الخنق والكتيف حبلين واستخدمت في عمل المونة والخرسانة اسمنت وظلط ورملة وكريك وجردل.
_ وأين كانت تتواجد الأدوات آنذاك؟
كانوا موجودين في البيت.
_ وما هو طبيعة الحبل الذي قمت بخنق نجلك به؟
هو حبل بلاستيك رفيع طوله متر ونص تقريبًا.
_ وما هي الحالة التي كنت عليها والمتوفي إلى رحمة مولاه حال قيامك بالتعدي عليه؟
كان ضهره في وشي.
_ وهل من ثمة علاقة أو خلافات فيما بيتك والمتوفى إلى رحمة مولاه من قبل؟
هو ابني كان فيه خلافات بيني وما بينه وشد معايا في الكلام وقعد يضرب فيا بالبواني قدام الناس.
_ ومتي حدثت تلك المشادات فيما بينك وبين نجلك؟
الكلام ده كان من حوالي سنة تقريبًا.
_ وما هي طبيعة تلك المشادات التي كانت فيما بينك ونجلك المتوفي؟
هي كانت مشادات بالأيدي والكلام وقلة أدب منه قدام الناس كلها.
_ وما هو قصدك من قيامك بالتعدي على المتوفي؟
هو أنا موته عشان أحسر امه وأحرق قلبها عليه.
_ ومتي تولدت في نفسك نية إزهاق روح المتوفي تحديدًا؟
هو أنا مكنتش مبيت النية اني اموته وحصل كله مرة واحدة فجأة لما تذكرت الحاجات اللي بتعملها امه.
_ وهل لك سوابق جنائية أو تم ضبط في ثمة قضائية مماثلة من قبل؟
هو انا كنت متهم في قضية ضرب من ام اولادي وهي اصطلحت فيها.
_ انت متهم بقتل المجني عليه الطفل/ عبدالمعز عمدًا مع سبق الإصرار والترصد بأن بيت النية وعقدت العزم على ذلك ولكن باستدراجه إلى منزلك موهمًا إياه بإعطائه مبالغ مالية له وأعددت لذلك سلفًا الأدوات والسبل اللازمة وقمت بخنقه قاصدًا قتله على النحو المبين بالتحقيقات؟
انا موته بس حاسس أن كل ده من غير إرادتي.
_ كما أنك متهم بإحراز سلاح أبيض عدد 36 ستة وثلاثون ما بين سكينًا وساطورًا وكذا عدد 2 حبل بدون مسوغ قانوني؟
الحاجات دي بستخدمها في الجزارة والحبال دي بتكون عندي في البيت.
_ هل أجبرك أحد على الإدلاء بتلك الأقوال؟
لا أنا قولت كدا بإرادتي لأني حاسس بالذنب تجاه ابني وضميري مش مرتاح.
_ هل انت بكامل قواك العقلية حال سؤالك الآن ووقت ارتكاب الجريمة؟
ايوة.
_ هل تعاني من ثمة أمراض نفسية أو عصبية؟
لا