«بيبو حط الكورة في المقص».. إعلامي ينتقد قرار بيراميدز بشأن تذاكر مباراة الأهلي (فيديو)

أشاد الإعلامي إبراهيم عبدالجواد، بموقف النادي الأهلي بشأن تحمله تكاليف جماهيره في مباراة بيراميدز، مؤكدًا أن إدارة بيراميدز غلست على الجمهور وليس المنافس، ورئيس النادي الأهلي محمود الخطيب استغل الموقف وشاطها في المقص جاب جول.
وقال إبراهيم عبدالجواد خلال تصريحاته ببرنامجه «الهدف» المذاع على «أون تايم سبورتس»: «اتقال إن بيراميدز رفع سعر تذاكر مباراة الأهلي عشان التسويق، ومش هنضحك على بعض تسويق أيه اللي افتكره بيراميدز»، مشيرًا إلى أنه في حال كان الكلام صحيح فبالتأكيد التسويق ده مليون و500 ألف جنيه، بيراميدز بيصرف قدهم مرتين في معسكر الفريق للمباراة والفندق والإقامة، فبلاش مبررات ساذجة مع الناس.
وأضاف: «من حق نادي بيراميدز إنه يحدد أسعار تذاكر مباراته ويحط الأرقام اللي عايزها، وعادي إنك تغلس على المنافس بتاعك ولكن انت كدة غلست على الجمهور مش المنافس خالص».
وأكمل: «بيراميدز قال عملنا كده وزودنا سعر التذاكر عشان الأهلي عمل كده في الماتش بتاعه خلى الدرجة التالتة زي ماهي ب75 جنيه، ورفع الدرجة الأولي كانت ب 150 رفعها ل 400 جنيه، والمقصورة كانت ب 300 رفعها ل 750، لو عايز تزود خليها بالمعقول وبلاش تزود في تذاكر الدرجة التالتة دي بتاعت الجمهور البسيط».
وزاد: «الأهلي زود عليك شوية فأنت مفروض تزود حبتين أو 3 حبات بس مش تزودها 5 حبات مينفعش تزود 10 لأضعاف فدي لعبة اتعملت وممارسة إدارية اتعملت والمقصود منها أغلس وأصعب الدنيا»، لافتًا إلى مكاسب بيراميدز من هذا القرار لا تذكر أمام الخسائر.
وتابع: «جمهور الأهلي هتروح الماتش متحفزة، وحفزت لاعبي الأهلي أكتر وأكتر أنهم عايزين ينزلو بغل كروي عشان تكسب فرقتها وتفرح جمهورها، وصدرت رسائل سلبية ل لاعيبتك مع أن المفروض كان العكس».
وأكد إبراهيم عبدالجواد: «قرار بيراميدز مش حكيم ومش مدروس، لكن كابتن بيبو اتلقف الحركه دي وحطها زي ما كان لعيب في المقص، وقالك أنا هتحمل ثمن الدرجة التالتة كامل ولك خبر حلو التالثة هتبقى ب 50 جنيه، وأي حد دفع حق التذاكر انا هدفعها لكم».
وأتم: «إدارة بيراميدز أدت للأهلي كره متصلحة، وخلت في ترابط لأكبر بين الأهلي والجمهور، وأصبح هناك تحفز ضدك للمارد الأحمر أكثر ما هم متحفزين عشان يفوزوا بالدوري».