«أرجوكم تصلوا عليّا».. سر وصية للفنان تامر ضيائي كشف عنها قبل رحيله

توفي الفنان تامر ضيائي، منذ قليل، وذلك إثر حادث اعتداء تعرض له من أحد الأشخاض، أثناء تواجده بصحبة زوجته التي تعالج من مرض السرطان.
وفاة الفنان تامر ضيائي
وكان قد كشف الفنان تامر ضيائي عن وصيته حال وفاته، بعد تعرضه في الفترة الأخيرة إلى وعكة صحية وإصابته بجلطة وخضوعه لعملية في القلب.
وصية الفنان تامر ضيائي قبل رحيله.. هل شعر بقرب الأجل؟
ونشر تامر ضيائي منشورًا عبر صفحته الرسمية على موقع التواصل الاجتماعي «فيسبوك»، تحت عنوان «وصية».
وكتب تامر ضيائي: بوست الوصية ده هيفضل باين على صفحتي لحد ما أموت، الحقيقة اللي كلنا عارفينها ومتأكدين منها أننا كلنا ربنا كاتبلنا إننا نموت في ميعاد محدد غير معروف، وعشان كده كتبت الكلام ده لأنى محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفة، ووقتها طبعًا مش هعرف أقولها لحد.
بنود وصية تامر ضيائي قبل رحيله
وذكر تامر ضيائي تفاصيل وصيته، والتي تتمثل في 10 بنود:
1- صلاة الجنازة أهم من العزاء وهي اللي كل ما العدد زاد كل ما ثوابى ما كان أكتر، فأرجوكم تصلوا عليا.
2- مش شرط تيجى العزاء وياريت لو اتعمل في البيت أو مكان بسيط بفلوسه تطلعولي صدقة جارية أفضل.
3- من فضلكم لم يثبت أو يتفق عليه عمل ختمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش، وادعولي الوقت اللى هتقروا فيه جزء فضوا نفسكم واقعدوا ادعوا فيه.
4- بلاش صدقة جارية تقليدية وسهلة ومش مستفاد بيها يعنى المصاحف كتير في مصر أوى وكل بيت فيه كتير فممكن نحط الفلوس في جامع بيتبنى أو كرسى متحرك في مستشفى يستفيدوا بيها المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة.
5- دي نقطة مهمة أوى بالنسبة ليا.. محدش يقول لحد بتعيط عليه ليه، ومتعيطش عشان هو بيتعذب، الكلام دة غلط، سيبوهم يعيطوا لحد ما يطلعوا كل الشعور اللى عندهم ومفيش حاجة بتقول إن العياط معناه عدم رضا بقضاء ربنا «وأبيضت عيناه من الحزن فهو كظيم».
6- أهم حاجة تاني هي الدعاء وبس والصدقة.
7- من فضلكم تكثروا الدعاء وقت نزول القبر وتتصدقوا بأى حاجة بنية إن ربنا يجعل قبري روضة من رياض الجنة ويثبتني عند السؤال لأن ده أهم وقت ليا وياريت كمان بعد ما تدفنوني أقعدوا معايا شوية ومتستعجلوش تمشوا عشان تونسوني في ليلة زى دي.
8- الموت علينا كلنا حق وإحنا كلنا أمانات ربنا وهيردنا تانى، فالحزن على الفراق هونوا على نفسكم بالدعاء ليا عشان أبقى في سعادة لحد ما أقابلكم تاني.
9- اللي بيحبوني يدعولي كتير عشان لو مفيش حد يدعيلي.
10- دى مهمة أوي.. عاوز الكل يسامحني على أي حاجه عملتها فيه بقصد أو بدون قصد.
تامر ضيائي يكتب وصيته ويوصي أصدقاءه بها
واختتم تامر ضيائي وصيته قائلا: «اللهم إن كثر موت الفجأة من حولي وكثر موت الشباب غفلة، يارب إن كنت أنا القادم فأحسن خاتمتي ويسّر طلوع روحي وهوّن عليّ سكراتي فإني أحب أن أرحل في هدوء وسكينة وطمأنينه، ولا تقبض روحي إلا وأنت راضٍ عني لكي أكون عبدا مقبولا عندك حتي أليق بلقائك العظيم وإن كان لي من العمر باقي فأغفر لي ذنوبي ومعاصي نفسي الأمّارة بالسوء وأعفو عني وأمحو لي كل ما يعرقل طريقي إليك وردّني إليك ردًّا جميلًا يارب العالمين».
اقرأ أيضًا:
وفاة الفنان تامر ضيائي بعد أزمة صحية مفاجئة
إصابة تامر ضيائي بجلطة مفاجئة.. ما القصة؟
«صدقة جارية أفضل من العزاء».. تامر ضيائي يكشف عن وصيته بعد نجاته من الجلطة
صديق السيناريست شريف بدر الدين يكشف سبب وفاته بشكل مفاجئ عن 45 عاما