رسائل نارية من شوبير بعد أزمة أحمد رفعت

وجه الإعلامي أحمد شوبير، رسالة نارية بشأن أزمة أحمد رفعت، جناح الفريق الأول لكرة القدم بنادي مودرن سبورت، والذي وافته المنية السبت الماضي، بعد تدهور حالته الصحية.
وقال أحمد شوبير، في تصريحات تلفزيونية عبر فضائية «أون تايم سبورتس»: «أنا لسة راجع من عزاء أحمد رفعت، الحقيقة كانت مظاهرة في حب هذا اللاعب الخلوق الطيب المؤدب جدًا، محدش شاف منه غير كل خير وكل احترام، عزائنا لأسرته ولمحبيه ولأسرة كرة القدم بالكامل».
وأضاف: «عايز أوجه نصيحة، أي حد متضرر من أي حاجة لدينا في مصر قضاء مصر العادل المحترم، لا الشاشة مجال إنك تتكلم وتحكي، عندك السوشيال ميديا الخاصة بيك اتكلم فيها زي ما أنت عايز، إنما الشاشة ملك المشاهد، وبالتالي عندك قضاء ومباحث إنترنت، عندك وسائل كثيرة جدًا لو شعرت بالظلم ولك حق عايز تاخده تقدم ببلاغ في مباحث الانترنت، هو ده الأسلوب الصح، متدخلش نفسك في متاهات مش هتكسب حاجة في الأخر، ليك حق هتاخده ولو عليك حق هيتاخد منك».
شوبير: سأتخذ إجراءات قانونية ضد كل من تكلم عني
كان أحمد شوبير قد قال في برنامجه الإذاعي: «مستمر في موضوع الله يرحمه الكابتن أحمد رفعت، وأول مرة هتكلم بشكل شخصي لأني بقالي 48 ساعة أو أكتر عمال أسمع وأشوف تعليقات وكلام كتير أني من المتسببين في أزمة أحمد رفت».
أضاف: «أنا بس عاوز حاجه أنا متهم بيها عشان أطلع أدافع عن نفسي، لأن كل الحاجات اللي بتتقال من أولها لأخرها بجمعها كلها، الحاجات المهمة طبعا، وهتخذ كل الإجراءات القانونية لأن ده حقي».
أكمل: «كل من تكلم في حقي، ليس أمامي سوى القضاء المصري العادل، هو الفيصل، لأنك ممكن تكون مذيع بتعرف تتكلم كويس وصفحات عاوزه تضحك على الناس وبلا ضمير ليها هدف معين».
واختتم تصريحاته: «أنا قدامي دلوقتي حاجتين، الحاجة الأولى قضاء مصر العادل، لأن كلنا لازم نقف أمامه والمخطئ ياخد عقابه، الحاجة الثاني العبارة الشهيرة (وعند الله تجتمع الخصوم)، لأن الحمد لله الحقيقة ظهرت وبان جدا جدا قدام الناس أيه اللي حصل».