«تصريحاتك غير مقبولة.. ومينفعش تغير كلامك».. وائل القباني يوجه رسائل نارية ل حسام حسن

علق وائل القباني، نجم نادي الزمالك السابق، على تصريحات حسام حسن، المدير الفني لمنتخب مصر، خلال جلسته مع الصحفيين.
وتعرض حسام حسن، لانتقادات لاذعة في الساعات الماضية، بعدما قال خلال جلسته مع الصحفيين التي عُقدت مساء الإثنين: «لا يوجد هناك لاعبين في الدوري المصري تستحق الانضمام إلى المنتخب الوطني خلال الفترة الأخيرة»، مضيفًا: «إيه حلو شايفينه في مباريات الدوري المصري والباص بيكون غلط أصلًا والأمر أصبح صعب للغاية».
وقال وائل القباني، في تصريحات تلفزيونية عبر فضائية «أون تايم سبورتس2»: «أنا بزعل أوي لما أبقى بره المطبخ وأقول كلام ولما ادخل المطبخ أقول كلام تاني، حسام حسن، كل تصريحاته قبل توليه تدريب منتخب مصر كانت غير كده خالص، كل تصريحاته إن منتخب مصر لديه لاعبين مميزين وقادرين على التتويج ببطولة، لما تيجي تمسك منتخب مصر، مينفعش تغير الكلام».
وأضاف: «هل الكابتن حسام حسن، بعيد عن الدوري المصري؟ لأ، بعيد عن اللاعبين المصريين؟ لأ، انت لما تتكلم عن إن مستوى لاعبي الدوري المصري ضعيف وبتتكلم على إن عدد اللاعبين المحترفين قليل، هل الكلام ده مكنتش تعرفه قبل ما تمسك المنتخب؟ أكيد تعرفه، مسكت المنتخب بناء على إيه، عشان نشوف بصمتك ده الطبيعي، إنت جاي وعارف إمكانيات اللاعبين جاي وعارف الدوري المصري».
وتابع: «إزاي أنا ابقى مدير فني منتخب واتكلم على اللعيبة بالشكل ده، التصريحات دي تعمل مشاكل بينه وبين اللعيبة وتسبب إحباط لهم، إنت إزاي تتكلم على لعيبة في المنتخب بالشكل ده وعاوزهم يتمرنوا معاك وإنت بتقول عليهم لا يصلحوا للمنتخب».
وأكمل: «إزاي قبل ما تمسك المنتخب بتقول في لاعبين يستحقون الانضمام للمنتخب أول ما مسكت المنتخب بتقول مفيش حد! هل دي حجة؟ أنا مبحبش المدير الفني اللي بيقول حجج قبل ما يشتغل»
وواصل: «لو إنت شايف إن إمكانيات لاعبي منتخب مصر في الدوري مع اللاعبين المحترفين، تقدر تاخد بيهم بطولة إنت هتمسك المنتخب، لو إنت شايف غير كده طبيعي إنت هتعتذر».
وأتم: «الكابتن حسام، من زمان نفسه يمسك منتخب مصر معقولة بعد ما يمسك المنتخب يقول التصريحات دي، وجهة نظري الشخصية كلام غير مقبول».