«لسانك حصانك وكل كلمة محسوبة عليك».. مدحت شلبي يفتح النار على حسام حسن

فتح الإعلامي مدحت شلبي، النار على حسام حسن، المدير الفني لمنتخب مصر، بسبب تصريحاته خلال جلسته مع الصحفيين.
وقال مدحت شلبي، في تصريحات ببرنامج «يا مساء الأنوار»، الذي يُقدمه عبر فضائية «إم بي سي مصر»: «إللي أنا هقوله لمصلحة منتخب مصر، حسام حسن، عمل ما يسمى جلسة مع مجموعة من الصحفيين تحت عنوان ودية، وجهة نظري الشخصية وأنا اشتغلت في اتحاد الكرة 4 سنوات، كنت مدير الإعلام والمتحدث الرسمي وأعلم جيدًا هذا البرتوكول».
وأضاف: «أتصور أنه كان يجب أن يكون مؤتمر صحفي والكاميرات تتواجد، حتى لا يأخذ أحد الكلام وينشر التصريحات بطريقة تسيء لحسام حسن، أو يطلع على موقع اتحاد الكرة المصري ويتحدث كيفما يشاء دي أول خطوة غير جيدة من حسام حسن».
وتابع: «حسام حسن، ممكن يقيس على زمن فات مثلما كان يحدث في عهد الراحل محمود الجوهري، هذا الأمر مختلف تمامًا حاليًا، احنا في عهد أخر يوجد الكاميرات والإنترنت.
وواصل: «حسام حسن، تحدث في هذا المؤتمر عن مجموعة كبيرة من الموضوعات، الحقيقة أنا شايف إن الكلام ده ما كان له داعي على الإطلاق».
ووجه مدحت شلبي، رسائل ل حسام حسن، قائلًا: «أنا هكلمك في 3 مواضيع، كلامك ده عشان لو أخفقت تقول أنا قولت، وده بيصدر مشاعر غير طيبة لدى الجميع، عندما تقول إن الدوري المصري لا يفرز لاعبين دوليين، إنت كده بتصدر الإحباط من البداية، إنت مدير فني لمنتخب مصر».
وأضاف: «أنا أرجو أن تتقبل مني الحوار، مسألة انضمام اللاعبين مبكرًا مع المنتخب هذا الأمر يناقش داخل أروقة الاتحاد بين المدير الفني للمنتخب واتحاد الكرة وبين الأندية، ولا يعلن بهذا الشكل على الاطلاق، حتى لو النادي الأهلي أعلن عن رفضه انضمام لاعبيه للمنتخب قبل مباراته في كأس مصر. ولو لا قدر الله حصل إخفاق سيكون أمامك مساحة للحوار، والإعلام هيستمعلك وهتكون وجبة دسمة للإعلام، ولكن الكلام ده ميتقلش في هذا التوقيت».
وتابع: «إنت بتقول قاعد في المقصورة بتفرج على المباريات ولا يوجد لاعبين مميزين يستحقون الانضمام للمنتحب، ده تقليل من الدوري اللي انت كنت مدير فني فيه، عندك كيروش، (مدرب منتخب مصر السابق)، مين اللي لقط محمد عبدالمنعم، لمنتخب مصر وخلاه لاعب دولي، وبعدها عاد للأهلي، عمر كمال عبدالواحد، مين قدمه للمنتخب؟ كيروش، عمر مرموش، مين اللي قدمه،؟ كيروش، إمام عاشور، تألق مع كيروش، مهند لاشين مين اللي اكتشفه؟ كيروش، ولا واحد من هؤلاء اللاعبين كان انضم قبل كده للمنتخب، ده دورك اكتشاف اللاعبين، الدوري هو إللي أفرز مصطفى شوبير»، مضيفًأ: «كلامك يصدر إحباط للاعبي الدوري، اللي نفسهم يتألقوا، بعد تصريحاتك لن يتألقو».
وواصل: «أنت عارف إن احنا في زمن الإنترنت وأنا شخصيًا يبيجبولي فيديوهات من 15 سنة، أكيد فتحت منصة (إكس) وشوفت فيديوهات قديمة ليك وإنت بتقول إن المنتخب عنده مجموعة مميزة من اللاعبين ولن يتأثر بغياب أي لاعب، ده كلامك، يجب أن يكون لديك حنكة في تصريحاتك وكل كلمة بتطلع منك محسوبة عليك.. لازم تبقى عارف قولت إيه قبل كده».
وأردف: «لما تقول مصر مفيهاش إلا زيزو وإمام عاشور، طيب بقيت اللعيبة في المنتخب هيشعروا بنفسهم ازاي! طيب محمد عبدالمنعم، وحسين الشحات ولا رمضان صبحي وأحمد فتوح هيبصوا لنفسهم إزاي إذا كان مدير منتخب مصر بيقول (لو سألت أي حد من أفضل لاعب في مصر هيقول مفيش إلا زيزو وإمام عاشور)».
وزاد: «النقطة اللي بعد كده، مسألة انتقادك لنظام الدوري، ده شغل الإعلام لأنك بتشتغل في حضن اتحاد الكرة ورابطة الأندية، لما تنتقد نظام الدوري يبقى إنت بتضرب كرسي في الكلوب، للناس إللي اختارتك مدربًا لمنتخب مصر، إنت بتخسر الناس اللي اختاروك ودعموك».
واسترسل: «هروح لنقطة خطيرة وهقولها عشان متحصلش، انا بقولها للمصلحة، حديثك عن عمر مرموش، مينفعشس إنت بتعمل فجوة مع اللاعب، دي تتقال في الغرف المغلقة».
وأتم: «دايمًا كان في مثل بيقول لسانك حصانك، مش هكمل الجملة، كنت أتمنى ومازالت، اطوي كل اللي إنت قولته والصمت الكامل في المرحلة المقبلة، أنت قائد والقائد لا يعطي مبررات مطلقًا».