«شكله مريب».. والدة «فتاة الشروق» تكشف آخر كلماتها عن «سائق أوبر» (مستند)

حصلت «المصري اليوم»، اليوم الاثنين، على نص أقوال دينا إسماعيل، والدة حبيبة الشماع الشهيرة ب«فتاة الشروق»، التي قفزت من سيارة أوبر بعد محاولة سائق خطفها على طريق السويس، ما أدى لإصابتها بنزيف على المخ ووفاتها بعد نحو 3 أسابيع من رقودها بغرفة العناية المركزة، إحدّدت محكمة استئناف القاهرة، جلسة الدور الثاني من إبريل المقبل، لنظر أولى جلسات محاكمة المتهم.
شكله غريب
والدة «فتاة الشروق» كشفت تفاصيل الحادث وما قالته بشأن السائق المتهم خلال آخر مكالمة هاتفية دارت بينهما، إذ قالت: «اللي حصل إن بنتي كانت رايحة التجمع الخامس، وأنا كنت واخدة العربية بتاعتها، وهي طلبت أوبر وكلمتني الساعة 6:50 مساء الموافق 21 فبراير 2024، وقالتلى إن هي ركبت العربية وصوت المزيكا حواليها اللى كان مشغله السواق كان عالي، فهي قالتله ممكن بعد إذنك توطي المزيكا، أنا مسمعتش رده كان إيه بالظبط بس هي كانت مستغربة الرد قوى وقالتلي ده غريب قوي وشكله مريب، فأنا قولتلها طيب خلاص إنزلي واطلبي أوبر تاني، بس هي قالتلي لا خلاص إحنا طالعين الشارع أهو متقلقيش أنا هكلمك لما أوصل وقفلنا المكالمة على كده».
وأضافت والدة حبيبة الشماع، في أقوالها أمام النيابة العامة: «بعد كده على الساعة 7:55 مساءً لقيت واحدة صاحبتها اسمها (دينا) بتكلمني وبتقولي إنها عملت حادثة بأوبر، وإن هي معاها في العربية اللى وراها وإنهم رايحين على مستشفى الشروق، فأنا رحتلهم على هناك ولقيت ضابط شرطة من القسم بيسألني في المحضر، وبعد كده نقلناها على المركز الطبي العالمي، وأنا قاعده معاها من إمبارح والنهاردة لقيت النيابة بتكلمني، وبيقولولي إن هما عاوزني اتسأل في المحضر فجيت على هنا».
وتابعت أم «فتاة الشروق»:«اللي أنا عرفته إن هي نطت حوالي الساعة 07:00 بالظبط على طريق السويس اتجاه القاهرة قبل الكارتة بتاعت التجمع الأول.. وكانت رايحة التجمع، بس أنا معرفش بالظبط بس هي كانت رايحة مكان إيه في التجمع، بس هي كانت رايحة عشان تشتغل، وطلبت أوبر، وأنا فتحت الأبليكيشن بتاع أوبر من الأكونت بتاعها وطلعت منه بيانات الرحلة والعربية والسواق».
نزيف على المخ
وقدمت والدة المجني عليها، صورًا مقتطفة من تطبيق «أوبر» تفيد رقم السيارة استقلال المصابة حبيبة الشماع، وأن مدة الرحلة هي من الساعة 06:50 م إلى 07:01 مساءً وأن مكان انتهاء الرحلة هو على طريق السويس بجوار الشروق وكذا صورة مقتطفة من هاتف المحمول لصورة سائق الأوبر بالرحلة التي كانت تستقلها وكذا صورة من ذات التطبيق تفيد بأن اسم السائق على التطبيق هو «محمود».
واختتمت أقوالها: «بعد كده أنا لقيت واحدة صاحبتها اسمها دينا بتكلمني وبتقولي إنها عملت حادثة بأوبر، وقالتلى إن هي راكبة في العربية وراها عشان هي عملت حادثة على طريق السويس وهى راكبة أوبر وإن هما رايحين على مستشفى الشروق، وأنا رحت بسرعة على مستشفى الشروق، وهي كانت في غيبوبة ودماغها كانت مفتوحة كانوا بيخيطوها والأرض كانت كلها دم ولبسها كان مقطع وكان عليه دم، وكانت في غيبوبة وارتشاح في المخ ونزيف في المخ وضغطها على وسخنت وجروح وكدمات في جسمها كله وفاقدة الوعي والتنفس ومكنتش بتتكلم».