شوبير يكشف كواليس رفض محمد صلاح الانضمام لمنتخب مصر بعد استدعاء حسام حسن

كشف الإعلامي أحمد شوبير كواليس رفض محمد صلاح قائد منتخب مصر وهداف فريق ليفربول الإنجليزي الانضمام لمنتخب مصر بعد استدعاء حسام حسن المدير الفني للفراعنة له ضمن قائمة المحترفين لمعسكر المنتخب المقبل في الشهر الجاري.
وقال أحمد شوبير في تصريحات إذاعية: «هتوقف عن اللاعبين المحترفين اللي اختارهم حسام حسن 7 لاعبين هم: عمر مرموش ومحمد صلاح وتريزيجيه وأحمد حجازي ومصطفى محمد وحمدي فتحي ومحمد شريف، بس عايز أقف عند قصة محمد صلاح وهنا الموضوع محتاج منتهى العقل والتروي والتفكير، لإن حسام حسن اختار محمد صلاح بس صلاح بقاله 4 مباريات لا يشارك مع ليفربول بعدما تجددت الإصابة التي تعرض لها مع منتخب مصر في بطولة أفريقيا بعدما استعجل وشارك في مباراة برينتفورد مع ليفربول اللي سجل فيها هدف وصنع هدف وبعدها اتجددت إصابته وغاب ال 4 مباريات اللي فاتوا مع فريقه».
اقرأ أيضًا: حقيقة وصول عروض احتراف لمحمد عبدالمنعم في إسبانيا وفرنسا
وأوضح شوبير: «معسكر منتخب مصر هيبدأ يوم 12 والمحترفون هينضموا يوم 18 لكن نادي ليفربول بعت إمبارح بيقول إن محمد صلاح مصاب ولن ينضم لمنتخب مصر ولكن الجهاز الفني وحسام حسن قالوا دي أجندة دولية واللاعب يييجي واحنا نقرر هنضمه ولا لأ وفقا لتقرير الجهاز الطبي لمنتخب مصر وده حق حسام حسن الكامل محدش يقدر يلومه فيه».
وتابع شوبير: «إحساسي الشخصي فيه حدوتة مش إحساسي لأ حقيقة لإن الناس كلها عارفة إن صلاح كان زعلان من تصريحات حسام حسن قبل ما يتولى مسؤولية تدريب منتخب مصر وده مش غايب عن أحد وصلاح بني آدم حساس ومتأثر كتير من كلام حسام».
وأضاف شوبير: «حسام تولى في المؤتمر الصحفي لتقديمه كمدرب لمنتخب مصر تحدث بكل احترام وتقدير عن محمد صلاح واهو في الاختيارات ضمه، طيب نحسبها بشكل تاني لو كان حسام حسن أعلن الأسماء ولم يضم محمد صلاح كان إيه اللي هيحصل كانت الدنيا هتولع وشوف بيعمل أيه وبيكرهه وازاي وسابه ومش عارف إيه».
وواصل أحمد شوبير: «سيبك من إن محمد صلاح يلعب الدورة الودية اللي جايه في الإمارات ولا لأ لكن علاج الموضوع لازم يكون بشكل خاص عشان إحنا كده هنبدأ الموضوع بحساسية، ويهمني نوفر أجواء صحية مناسبة للمنتخب المصري عشان يحقق النجاحات في المرحلة المقبلة».
وأردف حارس الأهلي السابق: «صلاح واخد على خاطره وماله نطيب خاطره ده لاعيب كبير، ويتم توضيح الأمور حسام حسن حاول يوضح في المؤتمر الصحفي ويمكن الرسالة ما وصلتش لمحمد صلاح بشكل جيد، وأعتقد إن اتحاد الكرة يجب أن يكون له دور وكذلك يكون دور للدكتور أشرف صبحي وزير الشباب والرياضة اللي كان أساسا اعتقد وراء فكرة سفر حسام حسن لأوروبا لمقابلة المحترفين قبل أن يحول ضيق الوقت دون جولة حسام الأوروبية».
واختتم شوبير: «لازم في النهاية من التدخل العاقل والحكيم لإنهاء هذا الأمر، عشان لا غنى لحسام حسن عن محمد صلاح ولا غنى لمحمد صلاح عن منتخب مصر، وبلاش نشعلل الأجواء في الفترة الحالية ولابد من الهدوء والعقلانية وحسام حسن عمل اللي عليه وأعلن الأسماء وفيها محمد صلاح».