شوبير يوجه رسالة نارية لمن يقلل من إنجاز الأهلي في كأس العالم للأندية

وجه الإعلامي أحمد شوبير حارس مرمى الأهلي ومنتخب مصر السابق رسالة نارية إلى من ينتقص من إنجاز النادي الأهلي في كأس العالم بالأندية بعد حصده الميدالية البرونزية.
وقال أحمد شوبير في تصريحات إذاعية: «مش فاهم الحقيقة البعض عايز أيه هنفترض إن الأهلي في المباراة النهائية وضرب ضربته وخد بطولة العالم.. وأنا في يوم من الأيام قولت هذه البطولة شرفية في البداية لكن لما حضرت البطولة مرتين ولا ثلاثة قولت لأ دي بطولة عالم بجد ومجرد التواجد مع الكبار ده شيء رائع».
وأوضح شوبير: «شوفوا إنفانتينو قال أيه عن الأهلي وشوفوا موتسيبي رئيس الاتحاد الأفريقي لكرة القدم في المباراة النهائية وحماسه للنادي الأهلي وبيشجعه كأنه فريق بلده ده شيء رائع.. لكن في نفس هذا التوقيت عندنا البعض برضه بينفعل جدا مع كل انتصار بيحققه الأهلي اللي يقول لك دي ميدالية نحاس هو فيها حاجة اسمها برونز ده أكثر وحد خسر الأهلي وتخيل برضه لو كسبنا البطولة هيقولك ده كلام فاضي وإن مانشستر سيتي رايح يهزر».
وتابع شوبير: «الأهلي أكثر فرقة في العالم لعبت مباريات في كأس العالم للأندية وأكثر فريق يحافظ على شباكه وعنده أكثر لاعب شارك في كأس العالم وتاني أقوى هجوم بعد ريال مدريد وبرضه ثاني أكثر فريق انتصارا بعد ريال مدريد 12 وإحنا 10 مباريات فوز».
وأضاف: «الحقيقة الأهلي نادي محترم وماشي في سكته ولا في دماغه كل الكلام ده حتى لما اترفض طلبه بتأجيل السوبر ف الغمارات يوم معملش مشكلة وعادي جدا عنده لاعيبة كثيرة ما لعبتش وممكن يبدأ بيهم والبطولة في النهاية مصرية أهلي بيراميدز سيراميكا فيوتشر».
ووجه شوبير رسالة متابعًا: «كان واجبا احترام هذا الإنجاز وما بجبش ارد على ناس مالهاش لازمة ملهاش لازمة فعلاً، كان يجب الاحتفاء بانجاز النادي الأهلي، ومش عارف ليه البعض زعلان ليه البعض متألم ليه فيه البعض غاضب من إنجاز الأهلي، لكن هذه هي سمة البطل دائما يواجه سهام النقد وصراعات والأهلي هو أفضل ممثل للكرة الأفريقية وتصرفات رئيس الكاف بتقول كده وده كلام كل المدربين اللي شغالين في أفريقيا».
واختتم شوبير: «يكفي إن القرعة لما بتوقع أي فريق قدام النادي الأهلي بيقول استر يا ستار».