«أدهم» ضحية تشاجر الصغار.. جاره قتله ب«مطواة» بعد خروجه من صلاة العشاء (فيديو وصور)

«عاوزه حق ابنى.. عاوزه القصاص العادل»، هكذا تحدثت والدة «أدهم»، مضيفة: «ابن عمرى ضاع مش هشوفه تانى، ابن قلبى البكرى اتقتل»، وتتذكر الأم ما حدث لطفلها أدهم هاني، الذي أنهى حياته طفل جاره «يوسف» بطعنة واحدة في القلب، بعد خروجه من صلاة العشاء رابع أيام شهر رمضان الكريم أمام مسكنهما في منطقة فيصل بالجيزة.
أم «طفل فيصل» حزينة: «فين أدهم عايزه؟»
ما قبل الجريمة ترويه والدة المجنى عليه مفجوعة في «سندها وضهرها»؛ تشاجر ابنها الصغير «بسام»، 9 سنوات، مع الطفل «معاذ»، ابن حارس الجراج الملاصق لمسكنها، وتروى: «الثانى له أخ أكبر اسمه (يوسف)، 14 سنة، ضرب ابنى الصغير «علشان أخوه»، ولما ولدى الكبير (أدهم)- 13 سنة، تدخل وقال له «متضربش أخويا تانى هو أصغر منك»، رد عليه «هضربه تانى!»، وابنى بسام اشتكى لأخوه: (بيضربنى كل شوية ومش عارف أبعده عنى ولا أعمل له حاجة)».
حاوطت الأم على نجليها داخل منزلهما، وقالت لهما: «إحنا بنجرى على الرزق المقسوم لنا»، حتى فوجئت بأن «يوسف» ينادى على ابنها الكبير ويسألها وهو يلوح ب «مطواة» بيده: «فين أدهم عايزه؟»، تدمع عين الأم «قلت له: امشى من هنا، والناس قالولى: الواد دا بتاع مشاكل وبيسوق تكاتك وعربيات ميكروباص».
أم المجني عليه: «المتهم ضربه في صدره وكسر المطوة بقلبه»
سبق «أدهم»، والدته لصلاة العشاء بالمسجد، وتضيف قلت له: «روح يا حبيبى، وأنا جايه وراك»، تذكر أنه «استعجل ومصلاش التراويح، ويدوب خرج للشارع لقيت الناس بتقوللى: ابنك مضروب بمطوة اطلعى شوفى في إيه؟»، وتلطم خديها «عاوزه حق ابنى، مش عاوزه يروح هدر، ده البكرى بتاعى ابن قلبى، والله شقيانه عشانه»، بطلوع الروح تردد «ابنى أنفاسه اتقطعت في ساعتها، خد الخبطة ونزل على الأرض، يا قلبى امتحاناته كانت الأسبوع الجاى وكان جايب مجموع 95% وقال لى: (يا ماما هعوضك شقائك إنتِ وأبويا وهذاكر علشان أريحكم وأكون حاجة كويسة)».
وعند حمله من مشرحة زينهم إلى سيارة للوصول لمسقط رأسه في بنى سويف ليُدفن بمثواه الأخير، تندب الأم: «المتهم جه لحد باب البيت، وشوفت بعينى بإيده (المطوة) بيلوح بيها بإيده، والناس حذرتنى من شره ولم آخذ كلامهم على محمل الجد، لأننا ناس بحالنا وليس لنا اختلاط بأحد وراح ابنى صلى في بيت ربنا وطلع منه اتقتل»، تواصل كلماتها الحزينة «عاوزه القصاص، حق ابنى، نار قلبى تبرد، المتهم ضربه في صدره وكسر المطوة بقلبه، دخلت شوفت ولدى بالمشرحة، الجرح كان 5 سنتى، وأجزاء من السلاح مغروزة فيه».
الأب مصدوم: «ده أبوالمتهم كان ماشى جنبي»
أم «أدهم»، تستوقف نعش نجلها تطالب باحتضانه «خدنى في حضنه يوم وفاته بس مشبعتش منه»، وكأنها تلومه «طلبت منى أعمل لك أكل على الفطار حلو، عشان نفسك مفتوحة»، وتشير بيديها «أكلت حتة صغيرة قد كده»، وتحكى وعده لها «هروح دروسى وأجيب أعلى الدرجات»، تشعر بضيق «تبقى آخرته كده طالع من بيت ربنا، فين العدل؟، بأناشد الدنيا كلها يجيبوا لى حق ابنى، مش هشوف حبيبى البكرى تانى، كنت مسندوة عليه أنا وأبوه، ده وردة مفتحة».
والد المجنى عليه، تسبق الدموع كلامه وهو يشير إلى أنه كان داخل المنزل وهرول للشارع «لما العيال الصغيرة جت لىّ يقولولى: ابنك مضروب وسايح في دمه»، ويحكى «ده أبوالمتهم كان ماشى جنبى، ومعرفش أن ابنه ضارب (أدهم)، ولما رحت له حبيبى كان قاطع نفس، وحملته للمستشفى برضه أكدوا الوفاة».
داخل محل جزارة بالمنطقة تحفظ الأهالى على الطفل المتهم لحين حضور الشرطة، واعترف بجريمته: «كنت عاوز أأدبهم».