منعًا لإيذاء نفسها.. «أم شيماء» تُكبّل ابنتها بسلاسل وتستغيث: «أبيع بيتي بس تتعالج»

في عام 2004، ولدت شيماء، لأب يعمل في مهنة الصيد، وأم ربة منزل، بمدينة المطرية بالدقهلية، حمدت العائلة الله على رزقه، فهي الطفلة الثالثة لهم، في عمر العامين بدأت تشك الأم في الحالة الصحية للطفلة، بحكم خبرتها مع شقيقيها السابقين، فإنها الآن في عمر البدء في الحديث ولو قليلا، إلا أن الأم اكتشفت أن طفلتها لم تنطق كلمة واحدة بعد، شدت الرحال إلى محافظة المنصورة، وهناك أخبرها الطبيب أنها تحتاج إلى الذهاب إلى طبيب مخ وأعصاب.
داخل إحدى عيادات أطباء المخ والأعصاب بمحافظة المنصورة، وقع الخبر على الأم كالطامة الكبرى: «بنتك عندها نقص في المخ»، لم تعرف الأم المكلومة ماذا تفعل، ضيق الحال والحالة الاقتصادية للأسرة لم تسمح لها بالبحث عن علاج، لكنها قررت بحنية الأم وطيبتها أن تبحث عن علاج لطفلتها مهما كلفها الأمر.
تقول السيدة خديجة، والدة الطفلة شيماء: «قالولي في علاج هيكلفكم 1200 في الشهر، قلت مش مهم المهم عندي إن بنتي تتعالج وتبقى زي باقي البنات، مر عام والثاني والثالث، والنتيجة مافيش أي تقدم، بنتي مبتتكلمش خالص، ومتأخرة عن باقي الأطفال، كنا الأول بنصرف من جيبنا، بعدين ولاد الحلال قالولنا اعملوا ورق العلاج على نفقة الدولة هيوفر معاكم، خاصة إن جوزي صياد على باب الله».
تم تحويل «شيماء» إلى مستشفى الأطفال بمدينة المنصورة، التي تبعد مسافة بالقطار تصل إلى 3 ساعات ذهابا، ومثيلها إيابا، كانت المهمة ثقيلة على الأم، إلا أنها قررت أن تقدم كل ما هو غالي ونفيس من أجل طفلتها، تقول السيدة خديجة: «كنت بروح مرة في الأسبوع، بركب 3 مواصلات عشان أوصل للمستشفى، الطريق بياخد 3 ساعات، بيعملوا هناك كل حاجة، رسم مخ وكشف وعلاج، كنت بخلص الإجراءات على أخر اليوم، الشمس كانت تغيب وأنا لسه في المستشفى، في أيام مكنتش بلاقي مواصلات كنت بمشي أبكي في الشارع».
احتقنت الكلمات في فم السيدة خديجة، حاولت أن تتماسك لتروي ما تبقى من الحكاية المأساوية، تعيد الحديث: «رحت لأكبر دكتور في المنصورة، كنت هبوس على إيده عشان يعالج بنتي، قلتله مافيش عملية ولو حتى هبيع البيت وأعملها العملية عشان تكون زي غيرها من البنات، بس الدكتور قالي إن الحالة دي مالهاش علاج وبنتك هتفضل كدة طول حياتها».
قبل 6 سنوات، قررت الأم المكلومة أن ترفع يديها عن العلاج، واكتفت بأن تراقبها ليل نهار، تحول المنزل إلى مستشفى خاص، لكن الخطأ جائز، تقول السيدة خديجة: «لدي 4 أبناء بخلاف شيماء، كنا بنتابعها زي الورديات، بس العيال كبرت وكل واحد بيسرح على أكل عيشه، وبدأت الكوارث تحصل من شيماء، مرة خرجت من البيت من ورانا وكانت هتغرق في الترعة، ومرة تانية وقعت على رأسها على الأرض جرينا أنا وأبوها للمستشفى وخدت حوالي 40 غرزة في راسها، بعدين قررنا نربطها بسلسلة حولين بطنها، ونخليها جنب الحيط، ما إحنا مش عارفين نعمل إيه معاها وخايفين تروح مننا، دي بنتي وشيلتها في بطني 9 شهور، مقدرش استغنى عنها دي بركة بيتنا».
تختتم السيدة خديجة حديثها: «أنا مش طالبة حاجة من حد، كل اللي طالباه علاج لبنتي، هبيع اللي قدامي واللي ورايا عشان تتعالج، خلاص فقدت الأمل أنها تبقى زي باقي البنات، أنا بس عايزاها تعرف تروح الحمام لوحدها، لأني تعبت من خدمتها وسني بيكبر».