أبو السعود محمد يكتب: عبد الفتاح والسيسي

ممكن يكون خدمك حسن طالعك أو دعوة أمك، وتعبها 5 سنين، أو ممكن يكون لقبك "عبد الفتاح"، أو انت واحد من ملايين الشباب الذين عانوا ويعانون مما يحدث في مصر من تدهور في الصحة وتخلف في التعليم وخوف من المستقبل ونقص من الأموال والأنفس والثمرات، لكنك كنت صابر مع الصابرين ،وربنا قالك في كتابه العزيز " وبشر الصابرين".
الحديث هنا إلى المواطن الذي صرخت أمه أمام مجلس النواب خلال زيارة الرئيس له فأمر بعلاج ابنها على نفقة الدولة.
فكم واحد يا "حسين محمد عبد الفتاح" ينتظر العلاج مثلك، ولا حول لهم ولا قوة، ينتظروا قرارات علاج علي نفقة الدولة دون جدوى، كم واحد جريت أمه على مستشفيات مصر، ومعاملها، وراحت لمسئولين مصر تتحسبهم وتتودد لهم وتملأ مسامعهم بصرخاتها دون فائدة.
هي "بقت كدا مصر" يا "عبد الفتاح"؟.. اللي يقدر يوصل للرئيس يحصل على علاج؟.. وفين؟.. في مستشفيات القوات المسلحة، وكمان يبقي نجم علي شاشات التلفزيون، واللي ما يعرفش يا عبد الفتاح يعمل إيه؟.. يموت يعني يا عبد الفتاح؟.. طيب هو الرئيس السيسي بيروح مجلس النواب كل يوم ،ولا كل شهر ولا كل سنة حتي عشان الناس أمهاتهم تروح تستناه هناك، يمكن ياخد باله منهم فتتعالج فلذات أكبادهم، طاب أقولك ده حتى أحوج ناس لتعاطف الرئيس قريبين من مجلس النواب، تلاقيهم في مستشفى أبو الريش للأطفال، انت عارف ياعبد الفتاح إن فيه تلات مستشفيات قريبين من مجلس النواب في شارع قصر العيني وأبو الريش والمنيرة المفروض يعالجوا أطفال مصر، لكن أطفال مصر وأمهاتهم لا لاقيين فيهم علاج ولا مكان أصلا.
أوعي تفتكر يا عبد الفتاح إني بأحسدك على إنك لقيت اهتمام من الرئيس بحالتك، فربنا يشفيك وتبقي شاب نافع للبلد وناسها، ولا باحسدك على أمك الست الصبورة اللي طفحت المر عشان تعالجك، وراحت واتبهدلت على باب كل مسئول شوية بقالها 5 سنين، زي ما قالت في برنامج أختنا لبنى عسل إنها حاولت توصل لمجلس الوزراء ووزارة الصحة ورئاسة الجمهورية، وقعدت تصرخ والشرطة تمنعها، ولم تفقد الأمل، وخلي بالك ياعبد الفتاح قالت مجلس الوزراء ووزارة الصحة ورئاسة الجمهورية، ولم تقل رئيس مجلس الوزراء أو زير الصحة أو رئيس الجمهورية، يعني حتي لم تستطع الوصول لديوان وزارة الصحة مش الوزير كمان.
5 سنين يا عبد الفتاح عمر الثورة العظيمة ثورة 25 يناير عارفها يا عبد الفتاح ،أمك عملت ثورة لوحدها ثورة إنسانية عشانك يا عبد الفتاح عشان تعمل لك عملية ليزر على المخ وبعدين تعمل عملية تدبيس المعدة وتخس وتبقى طبيعي، والله الست دي ماهي طبيعية ياعبد الفتاح، لكن أقولك إيه ما هي لازم ماتبقاش طبيعية في بلد مش طبيعي.
من الآخر أنا بحملك أمانة يا عبد الفتاح تقولها للريس، يمكن يعطف عليك تاني ويزورك في مستشفي القوات المسلحة، أمانة يا عبد الفتاح تقوله إنه حالة صحة كثير من شباب مصر تعبانة، مش بس الشباب لكن كمان الأطفال والكبار، وإنه كتير منهم مش هيقدر يقابله في الشارع خاصة من ولاد عمنا اللي ساكنيين في القرى والنجوع بالصعيد وبحري، أمانة تقوله إنه الحل الفردي غير مُرضي.
قوله إلحقنا ياريس، إلحق مصر العيانة، المرض بينهش في شبابها، وبيدخل عليهم من الباب والشباك، ومن كل مكان ، قوله ناس مصر ياريس مش هيقدروا يكونوا "أيوب" كتير.