«جنايات الجيزة» تنظر أولى جلسات محاكمة المتهم بقتل «محامي كرداسة»

تنظر محكمة جنايات الجيزة، بعد قليل، أولى جلسات محاكمة محمد فرحات، كهربائى سيارات وصائد حيوانات، 33 سنة، المتهم بقتل «محامى كرداسة» عمدًا مع سبق الإصرار والترصد داخل مكتبه بمنطقة أبورواش، بأن أطلق عليه وابلًا من الرصاص من بندقية آلية، للانتقام منه، زاعمًا عمله مع أهل طليقته ضده في قضايا متداولة.
اعترافات المتهم بقتل «محامي كرداسة»
قال المتهم، في اعترافاته أمام النيابة العامة: «هو اللى حصل إن أنا كنت شارى قطعة أرض من ناس، وبعد ما اشترتها دخلت كردون مبانى وكانوا عايزين يرجعوا في البيعة، وأنا مرضتش فراحوا ضاربينى بالعصى وعورونى بالمطاوى، وأنا روحت عملت محضر بالواقعة دى وروحت وكّلت الأستاذ بندارى والناس دى خدت براءة، وبعدها بفترة أنا كنت رايح الشغل لقيت نفس الناس دى مستنينى على الطريق وراحوا ضاربينى بالنار، ورحت المستشفى وعملت محضر باللى حصل وكان الأستاذ بندارى هو المحامى بتاعى وروحت له علشان أسأله الناس دى خدت براءة إزاى!».
وأضاف المتهم بقتل «محامى كرداسة»: «بندارى قاللى إن هما عملوا إعادة إجراءات في القضية، والضابط شهد ضدى في المحكمة وعلشان كده خدوا براءة، وقبل الواقعتين دول كنت أنا خاطب واحدة اسمها «ن»، وكانت قريبة الأستاذ بندارى من بعيد وسِبتها، وبعد الواقعتين دول اللى حصلوا لقتها جيالى البيت وقالت لى إن هي غضبانة من جوزها ومش عايزة ترجعله وعايزة تتجوزنى وأنا قلتلها الكلام ده مش هينفع وخدتها وودتها بيت خالها، ووقتها خالها وقرايبها قعدوا يضربونى وعورونى».
ويكمل في اعترافاته: «أنا اتنقلت المستشفى والنيابة جت سألتنى وأنا في المستشفى وبعد كده قلت للأستاذ بندارى يتابع القضية وبعد فترة لقتهم بيضغطوا عليا هي والأستاذ بندارى علشان أتجوز (ن)، فأنا اتجوزتها وخلفت منها بنتى «م»، وبعد فترة عرفت إن أهلها خدوا براءة في القضية اللى كانوا ضربونى فيها فأنا قلت خلاص مفيش مشكلة وأنا كده كده اتجوزتها وكبرت دماغى وبعد فترة من جوازنا وبعدما خلفت «م» عرفت إن مراتى بتشد بودرة هي وأمها وسلوكها وحش».
واستطرد قائلًا: «فأنا طلقتها وكان معايا بنتى وبعد كده أهل طليقتى جم ولعوا في بيتى وأبويا عمل محضر بالكلام ده وبعد فترة من الموضوع ده لقيت طليقتى خدت حكم إن هي تاخد البنت معاها فأنا بعت للأستاذ بندارى أبويا وكلمته في التليفون وقلتلته وطلبت منه إن هو يعمل قضية علشان آخذ البنت تانى قاللى خلى أبوك وأمك يعملولى توكيل وأبويا وأمى عملوله التوكيلات وادناله جزء من الأتعاب بتاعته 3 آلاف جنيه، وفى الفترة دى كنت أنا بفضل أكلمه في التليفون وأوقات كتيره مكنش بيرد عليا».
وتابع في أقواله: «حتى لما كان بيرد كان بيقفل في الكلام ويقوللى هكلمك بعدين. وفى مرة قاللى إنه أهل مراتى بيقولوا إن البنت مش بنتى وكان أبويا بيروحله المكتب علشان يتابع معاه مكنش بيرضى يقابله، وآخر مرة قابل أبويا من حوالى سبعة أيام قبل ما أقتله طرد أبويا من المكتب وهزأه ورماله التوكيلات وقاله أنا مش عاملكم حاجة وقاله متجيش هنا تانى وأنا كنت سامع اللى حصل ده كله في التليفون لأن أنا كنت مع أبويا على التليفون وقلتله متقفلش الخط علشان أسمع هيقوله إيه.. وبعدها في نفس اليوم».
وشرح المتهم: «بعد ما أبويا مشى من عنده اتصل بيا أهل (ن)، وقالوللى إن بنتى (م) مش بنتى، هي متسجلة على اسمى بس، وفيه ناس بعتوا لأمى نفس الكلام وقالولى هو أنت مفكر إن الأستاذ بندارى معاك من الأول إنت عبيط، الأستاذ بندارى والدنيا كلها معانا ده إحنا شغالين في البودرة لحساب الأستاذ بندارى، وقالوللى إن الأستاذ بندارى قايلهم يضربونى ومش هيخليهم يتحبسوا، وبعد كده أنا قعدت أرن عليه علشان أفهم منه الموضوع ومكنش بيرد عليا فأنا قلت أنا لازم أقتله هو وأهل طليقتى علشان هما السبب في كل اللى حصلى ده، وآخر مرة أهل (ن) اتصلوا بيا كانوا بيقوللى إنهم قاعدين مع الأستاذ بندراى في مكتبه في المضيفة».
ويكمل اعترافاته: «فأنا قلت أنا هروح أخلص عليهم كلهم وهما مع بعض وأنا عارف واحد صاحبى اسمه أحمد أشرف طبلية كان معاه بندقية آلى وطلقات وأنا عارف هو مخبيهم فين، فَرُحت آخد السلاح والطلقات وكانت الطلقات دى معاها خزن وفى شنطة سودا خدتهم وركبت الموتوسيكل بتاعى وعلقت السلاح على كتفى والشنطة على كتفى التانى وكان معايا عباية لونها أصفر لبستها علشان أدارى السلاح».
ويتابع: «رحت على مكتب الأستاذ بندارى علشان أنتقم منه هو وأهل (ن) طليقتى، وأول ما وصلت ركنت الموتوسيكل وقلعت العباية ورمتها على الأرض ورحت ماسك السلاح وواقف على مكتب بندارى ولقيته قاعد في المضيفة في وش باب المدخل، وكان فيه عيل صغير في المدخل، فأنا ضربت نار ناحية بندارى علشان أموته ووقتها أنا كنت واقف على باب المكتب من برّه ودخلت ضربت فيه من جوه لحد ما شفته اتعور ورحت خارج».
وقال: «كان السلاح في إيدى، ووقتها ضربت حوالى 3 طلقات في الجو علشان محدش يقربللى علشان الناس كانت بدأت تتلم، وركبت الموتوسيكل بتاعى وهربت عند أبويا في مساكن كفر الجبل لحد ما الحكومة جت وخدتنى من هناك وخدوا السلاح والخزن والطلقات والموتوسيكل بتاعى وجابونى على هنا، وهو ده اللى حصل».