«عاليا» بنوتة جميلة رقيقة جدًّا وحساسة بتحب أصحابها جدًّا بس على طول ترجع من المدرسة زعلانة ولمامتها تشتكى وتعيط وتقول أنا مفيش حد من أصحابى بيحبنى كلهم مش عايزين يصاحبونى. مامتها تقولها: إزاى بس دا انت بنوتة جميلة روحى انتى العبى معاهم، راحت «عاليا» المدرسة تانى يوم وقربت من صحبتها «مريم» وكانت بتحبها جدًّا وطلبت منها تلعب معاها وافقت «مريم» وقالت بس بشرط أنا هختار نلعب إيه، وطبعًا على طول «عاليا» وافقت وبقت معاها على طول وتسمع كلامها عشان تفضل صاحبتها لحد ما فى يوم جت صاحبتهم «تاليا» وقالت ل«مريم» تيجى نلعب مع بعض بس بشرط من غير «عاليا»، راحت «مريم» تلعب مع «تاليا» وأصحابها ولما جت «عاليا» تلعب معاهم ردت «تاليا» وقالت لا مش هتلعب معانا، طلبت «عاليا» من «مريم» تيجى تلعب معاها بس «تاليا» قالت: لو روحتى معاها مش هتلعبى معانا تانى خالص، مشيت «عاليا» وهى حزينة وزعلانة وفضلت تعيط لحد ما روحت البيت وحكت لمامتها ومكنتش عايزة تروح تانى المدرسة بسبب «تاليا» اللى بتخلى كل البنات محدش فيهم يرضى يبقى يصاحبها وأنها بتجمع كل البنات حواليها، مامتها قالت ليها: لازم تكونى شجاعة وتعرفى إزاى معاها تتكلمى وتانى يوم فى المدرسة راحت «عاليا» ل«مريم» وقالتها أنا النهارده بعد المدرسة هروح النادى إيه رأيك تيجى معايا؟ سمعتهم «تاليا» وقالت: لا هى هتخرج معايا وخليكى انت بقى هنا عيطى زى ما عملتى إمبارح، وكل البنات قعدوا يضحكوا عليها ويقولوا (قماصة). انهارت «عاليا» من العياط شافتها الميس جريت عليها وعرفت منها اللى حصل وطلبت منها إنها لازم تعرف تدافع عن نفسها وما تسمحش لأى حد يتنمر عليها أو يأذيها وقالت لها إنت بنوتة حساسة ودى ميزة جميلة وكونك بتحترمى مشاعرك ومشاعر أصحابك ومش بتأذيهم دى حاجة جميلة منك مش ضعف ولازم تفهميهم دا، وجابت الميس «تاليا» وقالت ليها إنها غلطانة ولازم تعتذر ل«عاليا» اللى قالت أنا معملتش حاجة دى هى اللى بتضايقنى دايمًا ومنى غيرانة. قالت الميس: إحنا أصحاب حلوين نلعب مع بعض من غير ما نضايق بعض، وتانى يوم جمعت «تاليا» كل البنات وأول ما شافوا «عاليا» قعدوا يضحكوا ويقوله (قماصة) وهتروح تشتكى للميس قوام لكن «عاليا» ردت عليهم كلهم وقالت: على فكرة أنا واحدة حساسة وبحترم مشاعرى ومشاعر أصحابى مش زيكم كلكم، أنا أقدر أضايقكم كلكم بالكلام وأعمل زيكم بس دا تصرف مش تمام وماحبش أعمله أكيد. بصت «مريم» ليها وقالت لها خلاص ماتزعليش أنا ألعب معاكى شدتها «تاليا» وقالت إنت رايحة فين إحنا متفقين زعقت فيها مريم وقالت لها كفاية بقى إنت عايزة تمشينا على مزاجك تتحكمى فينا نصاحب مين ونسيب مين! أنا أصلًا مش عايزة ألعب معاكى تانى ولا أصحابك دول لأنهم كلهم ضعاف عشان خايفين منك. ردت واحدة وقالت: معاكى حق وأنا كمان يا «تاليا» من النهارده مش هكون ضعيفة ولا هخاف منك إنك تاخدى أصحابى منى وهلعب مع «مريم وعاليا». ردت واحدة وقالت: وأنا كمان وفضلوا كدا لحد ما بقت «تاليا» لوحدها خالص مش لاقيه حد يلعب معاها وقاعدة زعلانة وحزينة وكلهم مع بعض مبسوطين، ولأن «عاليا» حساسة قالت لأصحابها طب ما نخليها تلعب معانا لكن كلهم رفضوا خالص وبقت «عاليا» بتقسم وقتها تلعب مع «تاليا» شوية عشان متبقاش لوحدها وتلعب مع أصحابها شوية، وفى يوم وهى بتلعب مع «تاليا» قالت ليها أنا آسفة بجد إنى كنت بضايقك إنت طلعتى أحن واحدة فيهم، ردت عليها «عاليا»: طب ما تيجى تعتذرى ليهم ونلعب كلنا مع بعض وأخدتها من إيديها وراحت لكل البنات واعتذرت «تاليا» ليهم ولعبوا كلهم مع بعض وبقوا أحلى وأجمل أصحاب.
