«بنجيب 7 مليون طن من برة».. الرئيس السيسي يعلق على ارتفاع أسعار الأعلاف والذرة ويعد بإنهاء الأزمة

علق الرئيس عبدالفتاح السيسي على أزمة ارتفاع أسعار الأعلاف والذرة خلال الفترة الأخيرة، والتي يعاني منها مربو الدواجن.
وأضاف «السيسي»، خلال حديثه مع أهالي الدقهلية اليوم الخميس، «الفترة الأخيرة عرفنا أن فيه أزمة في الذرة والعلف اللي غلي أوي أو أنه مش موجود»، قائلا «طيب إنتوا عارفين يا مزارعين مصر، لما أقولكم خلوا بالكو من الأرض بتاعتكم دي غالية أوي.. إنتوا عارفين إن إحنا بنجيب 7 مليون طن ذرة من برة».
واستطرد «أنا بقول يعني أجيب الأكل اللي غلي ولّا مستلزمات الإنتاج اللي ممكن أصبر عليها شوية، ولكن أنا بطمنكم إن شاء الله خلال الشهرين كل الكلام ده هينتهي ويارب يعينا ويبعتلنا رزق نراضي به الناس كلها».
وعلّق الرئيس عبدالفتاح السيسي على دعوات 11-11، قائلًا: «الصراع والمعركة مانتهتش وهو ده حكم ربنا على الدنيا، وأنا بقول علشان فيه محاولة هما دايما عايزين يخلوا الناس عايشة في قلق يقولك طيب 10- 11 طيب 11-11 طيب 25- 11 الموضوع بقاله سنين».
وقال «السيسي»، خلال لقائه بعدد من مواطني محافظة الدقهلية عقب افتتاح المرحلة الأولى من مدينة المنصورة الجديدة، «كل سنة وانتم طيبين وأهل الدقهلية بخير وفي سلام وأمان، لازم تكونوا مطمنين على بلدكم مصر».
وأضاف «أنا لما بقول أكرمتموني وانتم جبرتوا بخاطر اللي منكم وده بيوصل للمصريين، على مدار الشهور والسنين اللي فاتت واللي جاية كلام كتير يقلقكم ويخوفكم ويقولك هيحصل إيه، ولكن طول ما ربنا معانا اللي بيحصل واللي بتسمعوه وده الكلام اللي عايز أتكلمه معاكوا وللناس في مصر».
وقال الرئيس السيسي عقب تفقده نادي شربين الرياضي: «أنا سعيد إن أنا معاكوا يوم جميل وبقول لأهل المنصورة أنتم أكرمتمونا بجد، شوفت أصالة المصري أنا بشكرهم»، ليرد الحضور بهتافات «بنحبك يا ريس».
ليعقب الرئيس السيسي «أنتم جبرتم بخاطري النهارده في كل مكان روحته، أنا بقول إن أهل الدقهلية جبروا بخاطري النهارده في كل مكان روحته، خلي بالك أنا راجل بسيط أوي خالص وربنا اللي أراد إن أنا أبقى هنا».
.