المصري كيدز: «حدوتة».. «القرد الأنانى»

القرد ميمون ذكى جدا جدا ونشيط كمان، وعلى طول بيجرى ويلعب فى كل مكان وينط من الشجرة دى للشجرة دى وهو آخر انسجام، بس وقت الجد والمسؤوليات يقعد يقول مش قادر وتعبان ويقعد يضحك على السنجاب الغلبان ويخليه يعمل كل المسؤوليات إللى عليه بداله وكل دا عشان يلعب وينبسط وكان ميمون بيستخدم ذكائه فى إنه ازاى يهرب من أى مسؤولية عليه.
مرة يقول أصلى تعبان ومرة تانية جعان وساعات يشغل نفسه بحاجة مش مهمة ويقول مشغول، طب أعمل إيه ويفضل كدا ميمون على الحال دا كل يوم ما يروحش يجيب الأكل ولا يساعد مامته أو ياخد باله من القرود الصغيرة.
وفى يوم طلبت مامته منه يروح يجيب أكل لاخواته الصغيرين رد، وقال أنا تعبان جدا وهاخلى السنجاب يروح، بس السنجاب كان زهق من انه يعمل ليه كل حاجة، والمرة دى رفض بشدة وقاله روح انت دى مسؤوليتك، قال له أنا تعبان ومش قادر أروح. حتى بص رجلى ازاى تعبانة، السنجاب قال له خلاص هروح بس دى آخر مرة لأنى بكون عايز ألعب ومش بلحق.
وراح السنجاب وفضل ميمون يلعب، كان مبسوط جدا، أما السنجاب كان طول الطريق يقول أنا كان نفسى ألعب النهارده، بس أنا بعمل خير كبير انى بساعد القرد وهو تعبان، ولما رجع السنجاب شاف ميمون وهو بيلعب ومبسوط قاله إنت بتكذب عليا وبتخدعنى كل مرة عشان أروح وانت تقعد تلعب.. إنت أنانى مش بتفكر غير فى نفسك أنا من النهارده مش ها اساعدك تانى، وعلى فكره إنت كذبت عليا وأنا أخدت حسنات كتير لانى كنت عايز أساعدك بجد.
ضحك ميمون وقال له خلاص ياعم مش هطلب منك حاجه تانى، وبدأ يدور على حد تانى عشان يضحك عليه ويخليه يعمل المشاوير بداله، بس كلهم عرفوا إنه بيضحك عليهم ومحدش بقى راضى يساعده.
وفى يوم كان القرد تعبان بجد ومش قادر يعمل أى حاجة وكل ما يطلب مساعدة من حد يرفض ويقول له إنت كذاب وأنانى لحد ما بقاش عنده اكل ولا ميه هو واخواته الصغيرين، وكلهم كانوا جعانين وجت مامتهم بشويه أكل صغيرين يدوبك أكل الصغيرين ومابقاش حاجة لميمون، وساعتها عرف إنه خسر كل اصحابه إللى كانوا بيحبوه، وانه لما كان بيهرب من مسؤوليته كان بيخلى حد تانى يعملها، ودا بيكون صعب عليه وعرف إنه لازم يكون مسؤول ويفكر فى كل الناس إللى معاه عشان يكون الكل مبسوط.