المصري كيدز.. حدوتة: «الأرنب الجائع»

أرنوبى أبيض وجميل، بيحب كل يوم الصبح يخرج يتمشى مع أصحابه فى المزرعة، وكان دمه خفيف، ويحب يجرى، ويهزَّر كتير، وكان أسرع من كل الأرانب اللى معاه فى المزرعة، وكان ذكى جدًا، وخطير، وفى الإنجاز مالوش مثيل، يحب يخلّص كل اللى وراه على طول عشان يكون فاضى للعب، بس كان دايمًا ضعيف، ومش بيخلّص أكله كل يوم، والجزر، اللى مليان فيتامين، كان ياكله يوم، وما يرضاش يومين، أما الخس بقى فكان ما يحبوش أبدًا، ويقول ده أكل وِحِش، أنا مش واكل، وكل يوم على الخناقة دى، ومامته تسأله: تحب تاكل إيه يا أرنوبى بكرة؟ ويتفقوا على الأكل اللى بيحبه، وييجى تانى يوم ما يرضاش ياكله، ويقولّها: ما بحبوش، تقولّه: مش انت اللى قلت عايز الأكل ده، وكان باتفاق؟!، يقولّها: ارميه، أنا مش عايزه، تقولّه: بس كده حرام يا أرنوبى، وفضلت مامته على الحال ده كل يوم، تعمل أكل وأرنوبى يقولّها: مش بحبه، ويفضل ياكل فى أكل مش مفيد ليه، وفى يوم مامته سألته: هتاكل إيه بكرة يا أرنوبى؟ قالّها: عايز سلطة خس يا مامتى، قالتله: وهتاكلها المرة دى؟ قالّها: أكيد، وتانى يوم برضه أرنوبى ماكَلش، فضلت مامته منه زعلانة وواخدة على خاطرها منه وحيرانة، ومش عارفة تعمل إيه معاه، لحد ما قالت له: إنت كده بتدّلع يا أرنوبى، وأنا مش هعملّك أكل تانى غير لما تخلّص سلطة الخس اللى انت طلبتها، بس أرنوبى ماسمعش الكلام وماكَلش منها.
وقعد يدوّر على أى أكل تانى ماكانش لاقى، وخرج، وقال أكيد لما ارجع ماما هتعمل أكل تانى، ماهى مش معقول تسيبنى جعان، وفضل يلعب أرنوبى مع أصحابه، لحد ما حس انه جعان ومش قادر يروّح البيت، ولسة بيقول: عايز أكل، مامته قالتله: سلطة الخس بتاعتك أهى، يلّا كلها قوام، فضل يدبدب فى الأرض، ويقول: يووه يووه أنا مابحبهاش، ومش عايز اكلها، ردّت مامته عليه: إنت كنت بتاكلها وبتحبها، قالّها: لا مش هاكلها، قالتله: خلاص خلّيك جعان، ودخل أرنوبى ينام وهو جعان، وحلم انه كان ماشى فى طريق طويل، وكان فيه وحيد من غير مَيّة ولا أكل، وأكيد كان نفسه ياكل أى حاجة لحسن من التعب هيضيع، وفضل يمشى يدوّر على أكل، ماكانش لاقى خالص، لحد ما شاف شوية أكل باقيين من المعيز، قال لما آكله لحسن انا جعان، وكمان هفتان، ومن العطش تعبان كمان، وصحى أرنوبى من النوم وهو مفزوع وقال: الحمد لله انه كان حلم، أنا ازاى كنت هاكل من باقى أكل المعيز ده؟، أنا كنت قرفان وما ليش نفس ليه!، بس الجوع ده صعب قوى، وأنا لسة حاسس بيه، قعد يدوّر على مامته عشان تعملّه أكل، بس ماكانتش موجودة، قعد يدوّر على أكل فى البيت، ما لقاش غير سلطة الخس، وكان الخس شكله دبلان، وريحته مش تمام، بس قال أكله بقى وأمرى لله، وأكل أرنوبى الخس، وتانى يوم كان تعبان، ومن الوجع حرام مش دريان، سألته مامته: إنت أكلت إيه؟، قالّها: سلطة الخس، قالتله: إنت قعدت تدّلع وماكلتهاش فى وقتها، وسبتها لحد ما باظت، ووجعت معدتك كمان، قالّها انه كان ميت من الجوع، ومالقاش أى أكل تانى، وانه خلاص اتعلِّم الدرس، وبيحمد ربنا كتييير على نعمة الأكل، وعمره ما هيدّلع تانى وقت الأكل.