«لماذا لا يتحدثون عن ظلم الأهلي ؟».. شوبير تعليقًا على أزمة مباراة الإسماعيلي

علق الإعلامي أحمد شوبير حارس مرمى الأهلي ومنتخب مصر السابق، على الأزمة المثارة حاليًا حول ملعب مباراة الأهلي والإسماعيلي، وعدم لعب الإسماعيلي في الإسماعيلية، وخوض مباريات الفريقين على ملعب برج العرب وفقا لتعليمات الأمن.
وقال أحمد شوبير في تصريحات إذاعية صباح اليوم الثلاثاء: «إحنا بنحب نعمل أزمة من غير لازمة، ورجب عبدالقادر نائب رئيس النادي المصري والمتحدث الرسمي كان معايا هنا وسألته الأزمة هتوصلوها لفين؟ قاللي لا إحنا متمسكين واخترنا نلعب في السويس أو استاد هيئة قناة السويس، والمجلس بيضع كل أمام مسؤولياته، وهنستقيل لو مش هنلعب في الملاعب اللي حددناها ومش هنلعب في برج العرب».
وأوضح شوبير: «بعد كده المجلس تراجع عن تهديداته بالاستقالة وهنلعب في برج العرب ومجلس الإدارة مش هيستقيل، أنا بس أرجو عشان سياسة التصريحات الغاضبة اللي ظهرت في السنوات الأخيرة دي نسيبنا منها، الأمور دايما مفاوضات تنجح أو تفشل، وفيه أمور مفيهاش هزار، الأمن مفيهوش هزار».
وأضاف أحمد شوبير: «الإسماعيلي قال ألعب في الاسماعيلية، وقال السويس، وقال ألعب المباراتين مع الأهلي في القاهرة.. الموضوع اترفض.. فين بقه الناس اللي بتتهم النادي الأهلي، ما بياخدوش في الاعتبار إن الأهلي لو راح الاسماعيلية هيلعب برضه في ملعبه في القاهرة الماتش التاني، مش عارفين إن الأهلي محروم من اللعب في القاهرة ،والإسماعيلي محروم من اللعب في الاسماعيلية، يعني الاثنين متساويين».
واختتم شوبير :«الناس سابت كل حاجة وقالك الأهلي والإسماعيلي والليلة والهيصة، بس الأمن هو اللي عنده الصورة الكاملة، ولو تفتكروا آخر مباراة بين الأهلي والإسماعيلي قامت بعض الجماهير وهاجمت أتوبيس النادي الأهلي مع إنه ماتش مالوش لازمة والأهلي بيلعب بالعيال الصغيرة، وعملوا لنا مشكلة وكسروا الاتوبيس وباتوا في النيابة.. هل حد هيطلع يتكلم ويقول ظلمنا النادي الأهلي».
واختتم شوبير :«مجلس الإدارة تعامل بكل احترام، والأهلي بيظل صامت وبيرحب بأي مكان يلعب فيه، معندوش مشكلة، لكن ماينفعش الأهلي اللي هو جزء من الحل بيصدروه على إنه هو المشكلة».