نجل أحمد عبد الحليم يكشف كواليس انتقال نجم الجزيرة الإماراتي إلى الزمالك

كشف إيهاب أحمد عبدالحليم، نجل نجم الزمالك احمد عبدالحليم، عن كواليس انتقال سيد الغديري، لاعب الجزيرة الإماراتي السابق والمنضم حديثا لنادي الزمالك.
وشهدت الساعات الماضية عقب اعلان انضمام اللاعب الشاب لنادي للزمالك، بعض الحديث عن وجود أزمة تخص اللاعب متعلقة بأوراق خاصة به وبإجراءات تعاقد الزمالك معه.
وأوضح نجل النجم احمد عبدالحليم عبر صفحته على موقع التواصل الاجتماعي «فيسبوك»، «بخصوص سيد الغديري هوضح شوية حاجات عشان شايف كلام كتير ايجابي وسلبي».
وأضاف «أولا اللاعب ورقه سليم مليون ف المية، ثانيًا الغديري كان لاعب في نادي النصر وانبي اشتراه ب 65 الف جنيه وقعد معاهم 4 سنين وفي خلال الفترة دي انضم لمنتخب القاهرة وسافر معاهم اليابان وبعد كدة راح من إنبي لنادي اف سي مصر لعب معاهم موسم وبعدين راح الجزيرة الإماراتي وتم دفع 500 الف جنيه لنادي اف سي مصر ولعب 4 سنين في الجزيرة الإماراتي وكان المفروض يلعب فريق اول بس طبعا في اعتبارات تانية منعت الموضوع ده لأن في شروط عندهم وقوانين للاحتراف وعشان سنه صغير محصلش نصيب وقرر انه يرجع مصر وتواصلنا مع بعض وبعت الفيديوهات بتاعته لكابتن حسين ياسر وكابتن اسماعيل يوسف وكابتن أسامة نبيه وكابتن عصام مرعي وكابتن تامر عبدالحميد دونجا وجه الزمالك لكن كان في ظروف عندنا منعت انه يوقع عقد وقتها في شهر 7 وراح طلائع الجيش عمل معاهم فترة الإعداد بحكم قرابته من كابتن طارق العشري وبعد ما الناس شافوا مستواه قرروا يعملوله عقد وتواصلنا مع بعض ووقع بس من غير ولي أمره عشان هو تحت السن القانوني وفضلنا بنتكلم لغاية ما كابتن طارق خلص الموضوع بالتراضي مع الجيش ورجعلنا تاني واتمرن عندنا وكان المفروض يوقع العقد بس جاله سموحة الفريق الأول وراح وعمل عقد محترم بس حصل تغيير في الكلام وكانوا عايزينه يلعب مع فريق الأمل فهو قرر انه لو هيلعب ناشئين يلعب في نادي الزمالك وفعلا كابتن طارق خلص الموضوع هو ودكتور عطية السيد ورجع الغديري ووقع عقد عندنا على بياض وإن شاء الله هيكسر الدنيا وهيبقى إضافة كبيرة.. مبروك عليك وجودك في أكبر نادي في مصر يا غديري وربنا يوفقك».