«أنا مغلطش ومش هعتذر لحد».. رد ناري من بشير التابعي على هجوم جماهير الزمالك

رد بشير التابعي، نجم نادي الزمالك الأسبق، على هجوم جماهير نادي الزمالك عليه في الأيام الماضية.
تعرض بشير التابعي، لانتقادات لاذعة من جماهير الزمالك، بسبب ظهوره في إعلان لمنتج دوائي، تعرض فيه للسخرية لكل من يقابله لتسببه في الهزيمة الثقيلة التي مني بها نادي الزمالك أمام الأهلي بنتيجة 6-1.
وقال بشير التابعي في تصريحات تليفزيونية عبر فضائية «ام بي سي مصر»: «أنا مش مزعل الزملكاوية.. الناس بتسمع بس مبتشوفش لو شافت في هيبقى في زعل».
وأوضح: «الكلام كله في الإعلان على نفسي أنا مش على نادي الزمالك، أنا قبل ماتش 6-1، كنت حاجة وبعد الماتش بقيت حاجة تانية خالص».
وتابع: «نادي الزمالك لم يذكر في الإعلان لا من قريب ولا من بعيد»، مضيفًا: «أنا الوحيد عندما أظهر في الإعلان بدافع عن الزمالك بكل جرأة، أنا عمري ما أقدر أسيئ لنادي الزمالك».
وواصل: «أنا مقدرش أسئ لنادي الزمالك لأنه صاحب فضل عليا، وده مش تطبيل ولا انحناء ولا اعتذار»، مضيفًا: «مش هعتذر لحد لأني مغلطش في الزمالك».
وأكمل: «اللي أنا شوفته على السوشيال ميديا الفترة اللي فاتت ممكن يخليني أجيب سكينة وأدبح أي حد.. أنا مبخفش من حد ومحدش يقولي أقول إيه ومتقولش إيه».
واختتم: «انتوا لسة فاكرين بشير التابعي دلوقتي.. بشير التابعي كان متعين نائب رئيس قطاع الناشئين مع طارق يحيى وجمال عبدالحميد والكابتن بدر حامد، قالي أنا معرفكش أنت مين، ومحدش أتكلم وقتها».