قال الفنان باسم سمرة «أنا زوج عملي ومش رومانسي خالص، وبحب أحافظ على البيت وبحب كل حاجة تبقى مترتبة وبتوقيتات وقبل ما أتجوز كنت راجل مقطع السمكة وديلها، بس دلوقتي لا عشان خلاص كبرنا وبقى عندنا عرايس». وأضاف باسم خلال لقاءه مع الاعلامى دكتور عمرو الليثى ببرنامجه واحد من الناس على شاشة الحياة: «أنا صاحب الكلمة في البيت، مش عشان الذكورية ولا حاجة بس بما أن أنا أكتر خبرة وحريص على بيتي وبحب بيتي جدا فالمركب اللي ليها ريسين بتغرق.. وفي مرة معجبة جات قالتلي عايزة اتجوزك قولتلها كلمي مراتي لو وافقت أنا تمام». وكشف باسم سمرة عن تفاصيل علاقته ببناته وهل كان يتمنى أن يكون لديه ولد، حيث قال: "كان نفسي يبقى عندي ولد، بس جاتلي تجربة كانت قاسية جدا عملنا محاولة والبنت توفت بعد شهرين من الولادة فأثرت فيا جدا فحمدت ربنا على اللي عندي". وتابع باسم: «بحبب بناتي وهما بيحبوا الحيوانات جدا والخيل والزراعة والرسم والرحلات، بس للأسف هو الجيل دا خرجنا من ثورة دخلنا في كورونا على أوكرانيا، ربنا يكون في عونهم الجيل دا، يعني أنا عامل لهم اشتراك في النادي مرحوش غير بتاع عشر مرات وبحاول أنهم يكون عندهم رأيهم، ومش هجوز بناتي، هقعدهم معايا.. وأنا مش مودرن، أنا لو شايف الحاجة صح هعملها، وأنا عمري ما اتضربت من أبويا لأنه كان بيحبني جدا».
