بسبب رنّ الجرس.. 6 أشخاص ينهون حياة جارهم بطعنة بالصدر فى كفر طهرمس (فيديو وصور)

كان فى زيارة لأمه يوم إجازته، عندما رنّ جرس الباب مرات متتالية أفزعت الأم «العجوز»، ما إن طل من الشرفة يهتف بصوتِ عالٍ: «مين اللى بيرن ويجرى؟»، وحين لم يجد إجابة، توعد وشتم: «اللى رن دا قليل الأدب وأهله معرفوش يربوه».
هرج ومرج.. وناس تحمل شوما وسلاحا أبيض تواجدوا فى الحال أمام المنزل بكفر طهرمس بالجيزة، «طلع اللى رن طفل عمره 6 سنين، جاب جده وأعمامه وضربوا ابنى طعنة فى صدره، مات نور عينى»، تدمع عين الأم وهى تستذكر التفاصيل.
والدة عمرو السيد، سيدة فى أوائل السبعينيات، وكان ابنها يعولها ويأتى فى زيارة أسبوعية لها، «علشان يعطينى مصاريف العلاج والأكل والشرب»، تقول الأم: «حالى تدهورت، وبيت ابنى اتخرب، عنده طفلين أصغرهم 11 سنة، مين هيصرف عليهم؟.. دا حرام».
مع تدهور صحتها، زارها «عمرو» يوم إجازته من أحد المصانع بمدينة السلام، وبينما يطمئنها: «هتكونى بخير يا أمى.. وهتقومى بالسلامة»، كان جرس الباب- وفق كلامها- «بيرن عمال على بطال، يمكن أكتر من 10 مرات، وكل ما يطل يشوف مين لا يجد أحدًا، وفى المرة الأخيرة شتم اللى بيرن ويجرى من غير ما يعرف هو مين؟».
الأم استشعرت خطرًا، وكأن حدسها يخبرها بحلول كارثة، قالت لابنها «عمرو»، الشاب الثلاثينى: «متنزلش يا حبيبى من البيت، شكله فى شر برا»، تحكى: «بعدين نزل يفتح باب البيت ويشوف فى إيه، وكان 6 من جيرانا جايين بيكسروا الباب بعصى وآلات حادة، وملحقناش نمنع ابنى من الخروج، كانوا كسروا الباب وابنى رفع إيده لفوق ونطق الشهادتين، بينما تغرس السكين فى صدره ليسقط غارقًا فى دمائه».
المعتدون لم يمهلوا أسرة «عمرو» لتوضيح الأمور وأنهم لم يقصدوا سبّهم، وتكمل والدة المجنى عليه: «عرفنا إن طفل عمره 6 سنين، كان بيلعب وبيرن الجرس ويجرى على الفاضى، وراح جاب جده (شكرى) وعمه (أيمن) وأقاربهما، وبلا مقدمات حطموا باب البيت.. وما إن وجدوا ابنى حتى طعنه (أيمن) فى صدره ومات».
بملابس البيت التى كانت ترتديها هرولت «أسماء» إلى الشارع، حاولت التصدى للجيران: «وهما بيضربوا أخويا يوسف لمحاولته منعهم من تسديد طعنات جديدة لعمرو»، لكن «شكرى» هددها بسكين، فما كان منها إلا أن «مسكت خرطوم ميه وضربته علشان يبعد»، وبأعجوبة «خلصت أخويا يوسف من أيديهم».
والدة الشاب الثلاثينى، من بين كلماتها الحزينة تعاود كلامها: «كانت آخر زيارة لابنى لى، كانت وداعا حزينا وقاسيا، لن أنساها طيلة حياتى.. وعلشان نار قلبى تبرد عاوزه حقه بالقانون ومحاكمة عاجلة للمتهمين».
طفلا المجنى عليه كانا فى انتظار والدهما، لكن تكرر السؤال بلا فائدة: «فين بابا؟.. وعاوزين بابا؟.. راح عند تيتة ومجاش»، تحكى أسرة الضحية: «دا كان شغال بمصنع، وحاله على قده، وولاده محتاجين من يعولهم»، مستنكرين: «إزاى روح بنى آدم تزهق لسبب تافه زى كده؟».
عقب الجريمة، غادرت عائلة المتهمين من المنطقة، والأهالى يقولون إن «عمرو كان مؤدبا وخلوقا»، أجهزة الأمن ضبطت المتهم «شكرى»، والنيابة العامة أمرت بحبسه احتياطيًا، وطلبت من أجهزة الأمن تكثيف جهودها لكشف ملابسات الواقعة وتفريغ كاميرات المراقبة.