«فيريرا ده تروح تتعلم منه يعني إيه تدريب» .. خالد الغندور يوجه رسائل نارية إلى رضا عبد العال

وجه الإعلامى خالد الغندور، رسائل نارية إلى رضا عبدالعال نجم الأهلى والزمالك السابق، وذلك بسبب هجومه على البرتغالى جوسفالدوا فيريرا المدير الفنى للفريق الأول لكرة القدم بنادى الزمالك.
وقال خالد الغندور، في تصريحات تليفزيونية عبر فضائية «الزمالك»: «الكابتن رضا عبدالعال، أنا بحبه جدًا وهو رجل زملكاوى، ليه آراء قوية جدًا، وأنا كنت بستضيفه بشكل دائم ببرامجي وأنا أكتر واحد أظهرته للإعلام وهو يعلم هذا جيدًا، ولكن يا كابتن رضا، أنت في المباراة الماضية قولت إن بيراميدز هيكسب الزمالك بنتيجة كبيرة، أنا عارف إنك عاوز الزمالك يكسب، ولكن مش لازم التشبث بالرأي والعند في الرأي».
وأضاف: «مينفعش يتقال على فيريرا مدرب عادي وإنه بيكسب بالحظ، وإن تاكيس جونياس، (مدرب بيراميدز)، قد فيريرا، 100 مرة، مينفعش يا كابتن رضا، مينفعش اللي بيعمله فيريرا، يتقال عليه كده».
وواصل: «مفيش حاجة اسمها إن لولا الهدف المبكر الذي أحرزه الزمالك في أول 27 ثانية، لما فاز بالمباراة، ما الكورة كده، الكورة أخطاء، الكورة انتهاز للفرص، الكورة خطة وتكتيك، إزاي كمدير فني تغلق المساحات وتفوز بثلاثية، ومدير فني فتح خطوطه ولم يسجل أهداف».
وأردف: «إزاي يا كابتن رضا تقول على فيريرا كده، فيريرا ده تروح تتعلم منه يا كابتن رضا، تتعلم منه يعنى إيه تدريب، أنا والله بتكلم بجد، كلنا نتعلم من فيريرا، والمدربين المصريين لازم يروحوا للبروفيسور يتعلموا إزاي طلع اللاعبين الشباب، إزاي قعد سيف الجزيرى، وهو معندوش رأس حربة، إزاي يكون مغلوب أمام الأهلى ويرجع للمباراة، إزاي يكسب بيراميدز 3-0 اللي لسه كسبان والأهلى 2-0، وبيراميدز معرفش يجيب ولا هدف، في ظل الاسكواد إلى عنده، إزاي يكون ماشى من عنده رزاق سيسيه وأشرف بن شرقي ومحمد أوناجم وطارق حامد ومحمد أبوجبل، ويكسب الماتشات دى يا كابتن رضا».
واسترسل: «مش معقولة يا كابتن رضا، الآراء ليها حدود، مش كل ما المدرب يكسب نقول معندوش فكرة، أنا عاوز أقولك أنا ليا أصحابى في بيراميدز بيقولوا إن تاكيس جونياس مدرب عادى جدًا، مدرب عاوز يستحوذ وخلاص».
واختتم خالد الغندور تصريحاته قائلًا: «لا تقلل من فيريرا، لأنه مدرب كبير جدًا مع مجلس إدارة محترم يحفز اللاعبين مع لاعيبة رجالة».