علق الإعلامي أحمد شوبير، على الفوز الذي حققه الفريق الأول لكرة القدم بنادي الزمالك على بيراميدز، في بطولة الدوري الممتاز. فاز الزمالك على بيراميدز بثلاثية نظيفة في المباراة التي أقيمت بينهما مساء الإثنين على استاد القاهرة ضمن مباريات الجولة الثامنة والعشرين من بطولة الدوري الممتاز. وقال أحمد شوبير، في تصريحات تليفزيونية عبر فضائية «أون تايم سبورتس»: «مبروك لنادي الزمالك، ليس فقط الفوز على بيراميدز ومن قبله فيوتشر، ولكن أقدر أقولها بالفم المليان مبروك بطولة الدوري العام، محدش يزعل ولا حد يغضب ولا حد يتضايق، الفرقة اللي بالروح دي والإصرار ده واللي مبتفرطش في فرصة واحدة ومن أقل فرصة تسجل أهداف، وإللي لاعبيها الصغار بيتألقوا مثل سيد نيمار وحسام عبدالمجيد ويوسف أسامة نبيه وسيف فاروق جعفر، الفرقة اللي كبيرها بينزل في الآخر يسجل أهداف، وبيشتغل على الخط كأنه مساعد مدرب، وأقصد شيكابالا، الفرقة إللي فيها لاعيب بيقاتل في الملعب زي إمام عاشور، وإللي فيها حارس زي محمد عواد، وفيها لاعب بروح الونش وفيها هداف زي سيف الجزيري، وإللي عندها لاعب مثل أشرف بن شرقي، يرحل قبل انتهاء الموسم، والكل يتوقع وأنا منهم أنه سيحدث هزة بعد رحيله وكأنه لم يرحل على الإطلاق، الفرقة اللي عندها كل المقومات دي، دي فرقة بطولة». وأضاف: «الفرقة اللي عندها مدرب زي فيريرا دي فرقة بطولة، الفرقة اللي عندها 7 مباريات، 5 مباريات لم تهتز شباكها وتحصد 21 نقطة، دي فرقة بطولة، الفرقة إللي عندها احتياطي بينزل يغير شكل المباراة زي شيكابالا ويوسف أسامة نبيه ومحمد أشرف روقا، دي فرقة بطولة، الفرقة اللي عندها لاعب مش مهاجم يحتل صدارة هدافي الدوري وهو زيزو، يسجل من التسديدات وضربات الجزاء وضربات الرأس دي فرقة بطولة، الفرقة إللي عندها جمهور بالشكل ده وموت نفسه وراهم في كل ثانية، دي فرقة بطولة، بمنتهى الأمانة والوضوح». وتابع: «فرقة في الأوقات الصعبة بتعرف تلم نفسها وتشتغل على هدفها اللي عاوزه وعندها مدرب مسيطر وإدارة وفرت لها كل حاجة، لديها مشرف عام على الكرة صديق للاعبين»، مضيفًا :«اللي كان بيحصل من سنين في الأهلي دلوقتي بيحصل من سنتين في الزمالك، دي فرقة تستحق التحية وجهاز فني يستحق التحية وإدارة تستحق التحية». وواصل: «فرقة عاوزة تستعيد جماهيرها وتستعيد نفسها، وفرقة ملمومة في غرف الملابس بشكل كويس، فرقة عرفت المفتاح اللي كان غايب لفترات طويلة، حتة الأنا مبقتش موجودة، حتة المجموعة بقت موجودة، أنا دايمًا بقول البطولة عمرها ما كانت بتاعة شخص، روح الجماعة تولد النجاح والانتصارات، إحنا مبنلعبش لعبة فردية إحنا بنلعب كرة قدم». واختتم: «كل التحية لنجوم ولاعبي واحتياطي ومدرب نادي الزمالك، لأنهم بيشتغلوا صح».