السوشيال ميديا تُشيد بدعم مسلسل وش وضهر لذوى الهمم

«محمد صلاح يلعب الكرة عشان يتبسط، وأنا كمان بلعب الكرة عشان أتبسط»، جمُلة عفوية قالها كريم لؤى، شاب من ذوى الهمم، وأحد أبطال مسلسل وش وضهر، الذى يجسد دور شقيق الفنانة ريهام عبدالغفور، الذى لفت انتباه المشاهدين بحضوره الطاغى فى أكثر من مشهد، ولم يكن الوحيد الذى شارك بالمسلسل، بل شاركت إحدى الفتيات من ذوى الهمم أيضًا فى الحلقة الأخيرة.
وأشاد رواد مواقع التواصل الاجتماعى، خلال الأيام الماضية، بدعم مسلسل وش وضهر لذوى القدرات الخاصة، وعلقت إحدى الصفحات على فيسبوك: «جميل أن نبدأ نشوف فى الأعمال الفنية دمجا لأولادنا من ذوى الهمم واستغلالا لمواهبهم وقدراتهم، هو ده الدمج الحقيقى والتقبل الحقيقى للاختلاف، شكرا لصناع العمل».
وعلقت توتة حسن: «فعلا كانت لفتة جميلة وإنسانية جدا والولد اللى عامل دور أخوها زى العسل وقريب للقلب والبت اللى ظهرت فى الآخر مع إنه لثوانى بس سابت أثر جميل جدا»، وعلقت صول: «فعلا لفتة جميلة وفرحت لما شفت أدوارهم وياريت نفضل ندعم يكتشفوا مواهبهم ويستغلوها صح».
بينما كتب حساب باسم شريف سليم: «الجميل إنه تم توظيفهم بشكل غير مباشر وده أحلى حاجة»، وعلقت هبة يحيى: «التعامل معاهم كان عادى جدا بعيدا عن نظرات الشفقة ودى من أجمل الحاجات اللى حصلت».
وعلقت حياة: «فعلا حاجة حلوة جدا إنهم يخلوا المشاهد عينه تاخد على إن الناس دى بينا وفى حياتنا اليومية هما مش حاجة نستغرب لما نشوفها هما زينا زيهم عندهم حياتهم وشغلهم وهواياتهم واسمهم ذوو القدرات الخاصة». وعلق حساب باسم محمد شريف: «مسلسل وش وضهر مسلسل رائع جدا ويناقش قضايا تحدث فى مجتمعنا المعاصر، ويارب يكون فى جزء ثان من هذا المسلسل».
مسلسل «وش وضهر» من تأليف ورشة سرد، وسيناريو وحوار أحمد بدوى وشادى عبدالله وإخراج مريم أبوعوف، بطولة إياد نصار وريهام عبدالغفور وإسلام جمال وشريف دسوقى وميمى جمال ومحمود قابيل وثراء جبيل.